Ua manino i le ripoti lea ua tauaao e le Fono Faitulafono mai le faigamalo a Lolo ma Lemanu, le tele o atina’e atoa ai ma galuega tetele ua mafai ona fa’atinoina e lenei faigamalo i le ulua’i 4 tausaga o lana nofoaiga ua mavae atu.

O ni isi o ia atina’e e pei ona taua e le afioga i le ali’i kovana ia Lolo Matalasi Moliga e aofia ai galuega mo le toe fausia atoa ai ma le fa’aleleia o vaega eseese o auala i le atunu’u, fausiaina ma le fa’aleleia o auala laupapa, fausiaina o taligalu, fa’apea ai ma ni isi o galuega tau auala o lo o fa’aauauina pea e o o mai i le taimi nei.

I tulaga o aoga, e tele atina’e tau i faleaoga fou ua mae’a ona fausia e le faigamalo, aemaise lava i faleaoga sa fa’aleagaina i le galulolo o le 2009, peita’i o lea ua mae’a ona fausia ni isi o galuega tetele, ae o ni isi o galuega o lo o fa’asolosolo malie pea e o o mai i le taimi nei.

I tulaga o auala o femalagaaiga ma galuega tetele, o lo o taua ai i totonu o lenei ripoti le tele o atina’e tetele na amata fausia mai e le malo ina ua fa’atoa tula’i mai i le 2013 seia oo mai lava i le tausaga na te’a nei.

O ni isi o nai galuega o lo o taua i le lisi tele a le malo e aofia ai le toe fa’aleleia o le Vaega Tosova’a a le malo i Satala, lea o lo o avea ma se tasi o vaega o lo o maua mai ai tupe maua a le malo, o le maota o Tupulaga Talavou i Pago Pago, lea ua tele ina avea ma nofoaga autu o fa’atasiga a le malo aemaise ai o fa’alapotopotoga ma aoga, fa’atasi ai fo’i ma le fa’atinoina ai o ta’aloga eseese.

O le fa’atauaina o le tausia lelei o le soifua maloloina o le atunu’u, o se tasi lea o mafua’aga na taua e le ali’i kovana i lana tusi i le Fono Faitulafono, na mafua ai ona unaia le faigamalo ina ia fa’aleleia tulaga o le falema’i a le atunu’u, lea e pei ona i ai le toe fa’afouina o le tele o vaega eseese o le Falema’i itumalo i Faga’alu, atoa ai ma Falema’i i nu’u i tua, fa’atasi ai ma le fa’atauina mai o masini e fa’aaoga e tagata faigaluega e togafiti ai gasegase.

O se tasi o galuega tele sa mafai ona tatalaina e le faigamalo i le tausaga na te’a nei, o le Falema’i e togafiti ai i latou e a’afia i le gasegase o le mafaufau, fa’apea ai ma le toe si’itia i luga o le tulaga ua i ai nei le Falema’i itumalo i Ofu.

Na fa’ailoa e le ali’i kovana i lana saunoaga i luma o le Fono Faitulafono i le vaiaso na te’a nei e fa’apea, e ui i le tele o fa’afitauli ma lu’itau o lo o fetaia’i ma le malo i le itu tau tupe, ae le mafai lava ona taofia ai le naunau pea o le malo ina ia fa’atino ma fausia galuega tetele mo le soifua manuia o tagata lautele o le atunu’u.

“O le fa’anaunauga o le faigamalo, ia mae’a atu le isi 4 tausaga o lo o lumana’i nei ae ua tino mai le tele o galuega tetele o lo o fa’aauau pea ona fausia i le taimi nei, ina ia mafai ai ona fa’atino le tautua fa’aauau a le malo mo le tausiaina lea o le soifua o tagata lautele i totonu o le atunu’u”, o le saunoaga lea a le ali’i kovana.

O ni isi o vaega tupe sa mafai ona fa’atupe ai le fausiaina o ni isi o galuega tetele e pei ona saunoa le ali’i kovana, e le gata o tupe sa mafai ona fa’ataga atu e le Fono Faitulafono, i lalo o le latou galulue fa’atasi ma le Komiti o le Pone, ae o isi fo’i vaega tupe sa maua mai i le fesoasoani a le Ofisa o le Initeria.