E ui o lea ua toe maua le ali’i pagota Asia lea na sola ese mai i le toese i le vaiaso na te’a nei, peita’i na taua e le afioga i le Komesina o Leoleo i le vaiaso na te’a nei i le Samoa News e fa’apea, e tele isi fa’amatalaga e le o silafia e le Matagaluega o Leoleo e fa’atatau i lenei mataupu, o le mafua’aga lena o le fa’aumiumi o su’esu’ga o lo o fa’agasolo i le taimi nei, i le sailia lea o le mafua’aga tonu na ala ai ona sola ese le ali’i pagota mai le toese i Tafuna.

E lei mafai e le afioga i le ali’i Komesina o Leoleo ia Save Liuato Tuitele ona fa’ailoa mai i le Samoa News, po o a isi fa’amatalaga e le o silafia e le Ofisa o Leoleo e uiga i lenei mataupu.

Pau lana saunoaga sa tu’uina mai, o lo o fa’agasolo pea i le taimi nei su’esu’ega a le Ofisa o Leoleo i le tau sailiina o le mafua’aga tonu na ala ai ona sola i tua le ali’i pagota o Tao Liu mai le toese i Tafuna i le fa’aiuga o le vaiaso i ona tua atu.

O le afiafi o le aso Gafua o le vaiaso na te’a nei, Oketopa 3, 2016 i le itula e 5:30 i le afiafi na toe maua ai le ali’i o Liu.

Na taua e se molimau fa’atuatuaina i le Samoa News e fa’apea, e leai ma ni vaaiga i le nofoaga na taofia ai Liu i le toese i Tafuna e fa’amaonia ai sa sola fa’amalosi o ia i tua, e ala i lona talepe o se fa’amalama poo se faitoto’a fo’i ina ia mafai ai ona sola i tua.

Na taua atili e le molimau fa’atuatuaina e fa’apea, e tasi lava le auala e mafai ai ona alu ese mai se pagota mai totonu o le fale poo le potu o lo o loka ai, ua na o le faitoto’a o le fale, ae se’i vagana le ki ona fa’atoa mafai lea ona tatala le faitoto’a.

E talitonu le Samoa News, o se tasi o itu o lo o mamafa i ai su’esu’ega a Leoleo i le taimi nei, o le taumafai lea e saili pe sa i ai se isi na fesoasoani e fa’asola Liu i tua.

O Liu o lo o tu’uaia i moliaga eseese e aofia ai le umia o se a’upega mata’utia, umia o pulufana, atoa ai ma le umia o vaega o fualaau fa’asaina, ma o lo o taofia pea o ia i le toese i Tafuna se’i vagana ua totogi le $50,000 ona fa’atoa mafai lea ona tatala o ia i tua.