Ads by Google Ads by Google

Tele isi fa’amatalaga fou fa’asaga ali’i pagota na maua maliu Umukuka

ausage@samoanews.com

E tele isi fa’amatalaga fou ua mafai ona maua e le Samoa News e fa’atatau i le fa’alavelave lea na maua ai se ali’i pagota o lo o maliu i totonu o le umukuka a le toese i Tafuna.

 

O ni isi o ia fa’amatalaga e aofia ai le fa’atamala o ali’i Leoleo sa tiute i le po na tula’i mai ai le fa’alavelave, ina ua talosagaina se fesoasoani e ave ai le ali’i pagota ua maliu i le falema’i, peita’i na mumusu i laua e ave le ali’i pagota i le taimi na tigaina ai lona gasegase.

 

E le i manuia taumafaiga a le Samoa News i le aso ananafi, mo le toe sailiina mai o se finagalo o le afioga i le ali’i Komesina o Leoleo e uiga i fa’amatalaga fou ia ua maua mai e uiga i lenei fa’alavelave, ae na maua le avanoa e fesiligia ai se tasi o ali’i Leoleo o le toese sa tiute i le po na tula’i mai ai le fa’alavelave, o le susuga lea ia Sgt. Leone Faiai.

 

Na taua e Sgt. Faiai i le Samoa News e fa’apea, ina ua talosaga mai le ali’i pagota ua maliu e fia alu i fafo e fa’asavili ai ona ua vevela lona tino, sa la talia ma le isi ali’i Leoleo sa la tiute i le po lea lana talosaga, ma aumai ai loa le ali’i pagota i fafo e fa’asavili ai, fa’atasi ai ma lona aluga ma le ieafu.

 

Na taua atili fo’i e Sgt. Faiai e fa’apea, o le vaveao ina ua usu atu ali’i pagota o lo o kukaina taumafai mo le nofoaga, na latou mauaina ai le tino maliu o le ali’i pagota i le umukuka ma logo ai loa le ofisa i le fa’alavelave sa tula’i mai.

 

Na taua e le Komesina o Leoleo ia Save Liuato Tuitele i le ulua’i fa’atalatalanoaga ma Tusitala e uiga i lenei fa’alavelave e fa’apea, o le ali’i pagota ua maliu, o se ali’i ua tele gasegase e a’afia ai o ia, sa savalivali i fafo, ae fa’afuase’i ai ona pau i lalo ma matapogia, ma i’u ina maliu ai o ia.

 

Ae na taua e se molimau fa’atuatuaina i le Samoa News e fa’apea, pe tusa o le itula e 10:00 na tula’i mai ai le fa’alavelave, ina ua tigaina le ali’i pagota i lona gasegase, ma latou talosagaina ai loa Leoleo e to’alua sa tiute i le po lea mo se fesoasoani e ave le ali’i pagota i le falema’i, peita’i sa mumusu ali’i Leoleo e ave le ali’i pagota i le falema’i, ma mafua ai loa ona aveese mai i fafo le ali’i pagota e fa’asavili ai.

 

O le isi ali’i pagota na ia alu atu ma ave le ali’i pagota ua maliu ma fa’ataoto i totonu o le umukuka i se taimi o le leva o le po, ae na fa’ateia o ia ina ua usu atu i le vaveao, ua maliu le ali’i pagota sa ia fa’ataoto i totonu o le umukuka.

 

O le aso Gafua na te’a nei na aga’i atu sui o le Vaega o Leoleo Su’esu’e (CID) a le Ofisa o Leoleo mo le su’esu’eina o lenei mataupu.

 

Na taua e le molimau i le Samoa News e fa’apea, e le i fa’aaogaina e Leoleo Su’esu’e ni isi o fa’amatalaga e fa’atatau i le mea moni sa tula’i mai i le po na tula’i mai ai le fa’alavelave, ona o popolega “ina nei a’afia ai le Ofisa o Leoleo” i se tagi e ono faila e le aiga o le ali’i pagota ua maliu.

 

E talitonu le Samoa News, o ni isi o vaega sa mafai ona maua e Leoleo Su’esu’e i le taimi na aga’i atu ai mo le su’esu’eina o lenei fa’alavelave, o le tele lea o pepa ma fagu fualaau a le ali’i pagota e le i inuina sa i totonu o lana atopa’u.

 

Na taua e molimau i le Samoa News e fa’apea, o se tasi o fa’afitauli i le ali’i pagota ua maliu, o le musu lea e inu ana fualaau, ona o lona mana’o e ave o ia i le falema’i e taofia ai ma fa’amalulu ai i le ea malulu.