Ads by Google Ads by Google

Tina - “O se Penina Tautele i lona Aiga!”


O se va’aiga i le tina matua 89 tausaga o le soifua, o Ma’ave Sa’ei Paogofie-Jamias i lana asiasiga mai i si ona aiga. O lona ata ma lona alo o Mapu Saei Jamais. [ata: Leua Aiono Frost]

O se va’aiga i le tama’ita’i Faiaoga, Dr Faofua Va’apu’u - Fa’atoafe Ta’ita’ifono o Mataupu Fa’apisinisi a le Kolisi Tuufa’atasi o Amerika Samoa, ma se tasi o ana vasega fa’au’u 2015. [ata: Leua Aiono Frost]

O se va’aiga i le tina Faiaoga ua litaea, Fiafia Seui - Samuelu o Nuuuli, ma ni isi o lana ekalesia. [ata: Leua Aiono Frost]

Le alofa o le Tina, ua fa’ailoa o se alofa ua vavalalata ma le alofa tuona o le Atua soifua. O ia o le fautua i mea lelei i olaga o lana fanau aua latou fatuaiga tausi.

 

MA’AVE SA’EI PAOGOFIE-JAMIAS

 

O lenei tina sa soifua i Pavaiai i le aso 5 Fepuari 1928, i lona tama Sa’ei Paogofie ma lona tina o Amasone Leatuvai Tauala mai Fitiuta, Manu’a. Peita’i, i le 8 o ona tausaga, ae maliu talavou lona tama, na fa’anofo lea o ia i le uso o lona tama Uncle Vili Ava i Pavaiai lava, ma o le taimi fo’i lea sa amata ai ona avea o ia ma totino o le Ekalesia a Iesu o le Au Pa’ia o Aso e Gata Ai, LDS. Peita’i o le amataga mai o lona soifuaga, sa avea lava o ia ma totino o le EFKAS.

 

Na amata ana a’oa’oga iinei, peitai na malaga i Hawaii i le tausaga e 1952, e sailia se isi la’asaga fou o le soifuaga. Lea sa amatalia i lona galue ai i le Pineapple Cannery i Honolulu.

 

Na fa’aipoipo i le alii Filipino o Leonardo Jamias, ma maua ai lana fanau e to’a 15, to’atolu ua maliliu a’o laiti lava, ae o lo’o soifua le to’a 12 o i latou ma fa’alauteleina ai le tautua a lenei tina i lona atunu’u, le malo tele i vaega au, ae maise o Honolulu lea ua faamautu ai pea o ia.

 

I laiti mai o le fanau, e ese lona faigaluega, ae o le toe fai o lana pisinisi. “O la’u pisinisi e gaosia ula o so’o se ituaiga ae matele lava i so’o se ituaiga fatu la’au ma atigi figota e maua i Hawaii. O le taulia latou, ae fa’ato’a 9 tausaga o Sa’ei [Mapu] e alu lava si au tama e fa’atau ma ula, e le fefe ma e fiafia aua e tele ai le tupe e maua mo i latou e tufa pe a o i le a’oga,” o se tala lea a Ma’ave.  O nei uma e fiafia tele i ai tagata ma e fa’atauina lea i Hukilau i Laie.

 

E ui ina ua alaala tumau Ma’ave i lona lava fale i Kalihi, Hawaii, ae ua ia fa’ailoa mai, “E ese lota lagona ina ua o’o mai e asiasi mai ia Mapu ma si ona aiga, ua ou fa’afetaia lava le i ai o ia iinei, le nu’u sa ou fanau ai, e le galo lava i le agaga le lagona o oe o le tagala moni o le eleele. E tele mea sa tausinio i ai le olaga saili, ia maua a’oga a le fanau ma ia i’u lelei o latou olaga, ae ina ua mae’a ona faia lena faiva, ua toe nofo to’atasi nai lo le nonofo fa’atasi ma tau tausi le fanau e to’atele, ua lagona le fiafia ina ua toe o’o mai i laueleele na fa’afaileleina mai le ola talavou. Ua toe tepa i mea sa o e fai i na aso a’o leai se eletise ma ni moli i lenei laueleele atoa,” o sana lea tala ma tau toe mafaufau i tua.

 

Mai le to’a 12 o le fanau: Ua liteau mai Trevor USArmy Reservist. Litaea fo’i Mapu Saei Jamias o se Lt. General mai le US Army ma o se faipisinisi i le teritori, Maliu Mai Beach Resort, o le Peresetene fo’i o le Asosi Fusu, ASBF ma o le Komesina fo’i o le AIBA ma le Oceania Boxing i Ausetalia. O le lona 4 o le fanau o Abraham Jamias o se ali’i faipisinisi i Iliili, Amerika Samoa. O Leonardo Jamies Jr ua litaea mai o se Chaplain Lt General mai le USArmy.

 

Mai ona alo tama’ita’i e to’avalu ua fa’ailoa mai o Flower Salas o lo’o alaala i Saipan CNMI o se tamaita’i faipisinisi. Darleen Verburg ua litaea mai le FEMA ma le USArmy fo’i. O Renee Husky ua litaea mai GS13 ma lana tautua i le Malo. O Hope Bean ua litaea mai o le CW4 mai le USArmy. O Claudia Fuata ua litaea mai le Kamupani a le Quick Silver ma o lo’o alaala tumau i Hunnington Beach.

 

O Rosie Stone o lo’o fa’aauau pea lana tautua i le feterale ma Lourdes Jamais Andrews o lo’o fa’aauau pea lana auaunaga i le Associate Press i Niu Ioka, ma o ia fo’i lea ua manatu e ao ina faia auaunaga e fagaina ai tagata nonofo solo i le a’ai ae maise o ana malaga asiasi i Aferika e fa’ao’o uta o lavalava ma mea’ai mo e matitiva,  le ui’i fo’i lea o le fanau.

 

FIAFIA SEUI-SAMUELU

 

O lenei tina ua loa lana tautua i le atunu’u e ala i le tofi Faia’oga. Sa avea o ia ma faia’oga i le A’oga Tulaga Muamua a Manulele Tausala.

 

O ia o se tasi ua litaea mai lea tofi, ae ua iloga ona aoga lona soifua i le aotauina o fanau, ma e to’atele fo’i le fanau a’oga, ua latou toe fa’afo’i ia te ia, le fua o ana galuega.

 

“O lena tina, e kaisi lava ia, e leai se isi e fia fai se lavale i le a’oga e faia’oga ai. Uma sao le fia kama ma le fia keige o matou pe a o’o loa ina vala’au mai Mama Fiafia e sau. Amaka Kau lava ga fa’amaka salamo e le’i kaikai i le mea o gofo mai ai le sifi,” o tala ia a le fanau ua avea ma tagata faigaluega i le taimi nei, ae sa a’o’oga mai a’o avea Fiafia ma Pule Lua i le Manulele Tausala.

 

O le to’atele o i latou na fa’auia mai latou fa’afetai ia te ia, ina ua fa’aoso atu ata o lea tina i le Facebook, e matua to’atele lava. “Fa’afetai Mama Fiafia i lou alofa ia i matou, sa sasa ma fa’atonu lea ua maua le atamai e pasi ai le aoga ma ua maua galuega, ua fai aiga, fa’afetai e le galo oe, o le fa’afetai lava ia, o lo’o silasila le Ali’i i lou loto faitama lelei na fa’asalafa ia i matou uma lava, le fanau ulavavale i Manuelle Tausala Elementary.”

 

O Fiafia na soifua i Nuuuli ma o ia sa Ta Pese i le Ekalesia Metotisi, ae o’o mai loa le tama mai Avao i Salafai, ma fa’aipoipo ia Malaefono Iakopo Samuelu Folau ia Setema 23, 1968.

 

E to’a 8 o la’s alo, ae to’a 5 a la’ua fanau tausi. Mai ona uso ma tuagane, ua toe lava o ia o lo’o totoe nei.

 

Na atoa le 35 tausaga o le tautua a Fiafia i le Matagaluega o A’oga, ona litaea ai lea.

 

“E leai se mea e sili atu nai le va’aia ua gasolo mai le fanau e fa’atasi ma a’u i lea vaitau. E ui ina o mafuaga e fa’anoanoa, ae ua toe foa’i mai e le Atua se fiafiaga i le va’aia o i latou uma, ua toe o mai i le matou fale e pei ona sa i ai a’o laiti. Peita’i, ua lava ma totoe fo’i le mafutaga ma le tama, ua iloa fo’i e tatau lava ona malolo pe a oo ina matutua, ae se’i foai e le Atua manuia i le fanau mo le tausiga atoa ai ma le agaalofa ia i tatou matua,” o se tala lea a Fiafia.

 

DR. FAOFUA VA’APU’U-FA’ATOAFE

 

O lo’o faigaluega pea le tina o Dr. Faofua Va’apu’u-Fa’atoafe e avea ma Faia’oga o Mataupu Fa’apisinisi i le Kolisi Tu’ufa’atasi o Amerika Samoa. Peita’i, e tetele lu’iga o lo’o ia te ia, ua toe o le 20% o lana va’aiga, o lo’o mafai ai e ia, ona fa’ataunu’u ona faiva uma. Peita’i, ua ia fa’ailoa mai, “Ou te fa’atuatua, e amai e le Tama i le Lagi, le malosi e fa’atino ai tiute, pe tau segosego le va’ai, ae le tu’ua ai le galuega, e ao ina faia pea ao i ai le avanoa!”

 

Sa soifua a’e o ia i Aleisa i Samoa. Na muai a’oga i Aleisa Intermediate School ma fa’au’u ai. Soso’o ma le a’oa’oina ai i le a’oga CCWS i Pesega. Maua ai ma le sikolasipi i le Iunivesite o BYU Laie. Maua mai lona fa’ailoga fa’afaiaoga  i A’oga Maualuluga  ma toe taliu mai e toe faigaluega i le A’oga i Pesega, sa aoaoina ai o ia. Sa avea ai Faufautua mo le fanau i le CCWS Pesega ae fa’ai’u ina avea ma Pule A’oga mo le lua tausaga aoga mulimuli o le ono tausaga sa toe galue ai i Samoa.

 

Si’itia mai o ia i Amerika Samoa ma avea ai ma Faia’oga i Tafuna High School mai le 1987 - 1989, ma o ia sa avea ma Faia’oga o le Tausaga i lena vaitausaga. Siitia i le Nuuuli VocTech i le tasuaga 1989-1990 ma toe manumalo ai fo’i i le Faia’oga o le Tausaga, ae maise sa fa’atuina ai mo le taimi muamua le Sosaiete a le Fanau ua ausia togi maualuluga, le National Honor Society. I le aoga lava lea sa la’ua fa’atula’ia ma To’afa Vaiaga’e le Cooperative Skill Program lea e mafai ai ona ave tamaiti aoga i matata eseese e faigaluega ina ia fa’amasani i nisi o Kamupani ua agavaa ai i matata o a’oa’oina ai.

 

1992-93 na avea ma faia’oga o Pisinisi ma Matata Eseese i le aoga Maualuga a Samoana, ma sa avea fo’i ma Taitaifono o Mataupu Fa’apisinisi i lea a’oga. I le 1993 na ulufale ai loa i le Kolisi Tu’ufa’atasi ma amata ai o se faia’oga i mataupu fa’apisinisi. Peita’i i le tausaga 1996 se’ia oo mai i lenei tausaga, o lo’o tumau pea i le tofi “Ta’ita’ifono i Vaega o Mataupu Fa’apisinisi a le Kolisi Tu’ufa’atasi.”

 

I le tausaga 2000 seia oo 2006 sa maua ai e ia le tulaga “Who’s Who teacher of America,” ma o lea fa’ailoga e palotaina fo’i e le fanau aoga. O le tausaga fo’i e 2006 na sainia ai e Kovana Tauese Sunia le MOU e fa’ataga ai ona avatu uma le vasega pisinisi a le Kolisi Tu’ufa’atasi ina ia latou fesoasoani e faila lafoga a tagata faigaluega o le atunu’u, ma ia maua ai fo’i ma le tomai fa’afaigaluega e i latou.

 

Tausaga e 2004 na mafai ai ona fa’ataga mai e le pulega a le Kolisi Tu’ifa’atasi ma le Komiti Fa’afoe le vasega fa’au’u o pisinisi ina ia malaga i nisi atunu’u e faalautele ai latou tomai mo mataupu tau pisinisi. O lo’o faia lava nei malaga i tausaga ta’itassi ma ua faamaonia le aoga i le taumafaiga a le fanau aoga. O lo’o fa’aauau pea le galuega.