O le toe fa’aolaolaina o le tomai o tagata Samoa i le fausiaina lea o va’a e fa’aaoga i ai laau Samoa, e pei ona faia e Tuaa i aso ua mavae, o le agaga atoa lea na mafua ai ona a’e se tofa i ni isi o Tufuga fau va’a i le atunu’u, ma amata ai loa ona la fausia ni va’a se 3 e fa’aaoga ia i laau eseese o loo ola i le vaomatua o le atu Samoa, lea na fa’apaiaina i le aso Faraile na te’a nei i le matafaga i Utulei e ala i se sauniga lotu puupuu.

A o pisi solo ai le atunu’u i fa’atauga o le Kerisimasi o lenei tausaga, aemaise ai le to’atele o turisi na malaga asiasi mai i le va’a meli o le Costa Atlantica, na fa’ataunu’uina ai se sauniga lotu puupuu e fa’apaiaina ai va’a e 3 ua mae’a ona fausia i laau Samoa, lea na ta’ita’ia e le susuga Rev. Tini Filisi, o le Faifeau o le Ekalesia EFKAS mai Gataivai.

O le mae’a ai o le tatalo e fa’apaiaina ai lenei galuega, na sosoo ai loa lea ma le fa’atinoina o tulaga masani i le aganu’u a Samoa, o le tata’eina lea o le niu ae sa’asa’a le suaniu i luma o le taumua o le va’a e fa’apaia ai le fa’aaogaina o le va’a.

O Tufuga Fauva’a sa la fausiaina nei va’a e 3 o le susuga a Su’a Wilson Fitiao ma le ali’i Foma’i ia Malouamaua Dr. Tuiolesega.

Na taua e Su’a e fa’apea, o le masina o Tesema o le tausaga e 2014 na amata fausia mai ai va’a nei e tolu, ma le fa’amoemoe e avea o se auala e amata ai se taumafaiga ina ia toe fa’aolaola le fausiaina o va’a sa folau ai tagata Samoa i aso ua mavae, ae fa’aaoga i ai laau Samoa o loo maua i le vaomatua.

“O le agaga atoa o lenei fa’amoemoe, ia avea i maua le ali’i foma’i ia Dr. Tuiolosega o ni isi e amataina se taumafaiga taua, e toe fa’aolaola ai le fausiaina o va’a i laau Samoa, lea sa fa’aaoga e Tuaao i aso ua mavae e folau ai i atuvasa o le Pasefika”, o le saunoaga lea a Su’a.

Saunoa atili Su’a e fa’apea, o le isi mafua’aga o lenei fa’amoemoe, o le toe fa’ata’ita’i lea ona fausia o va’a sa folau ai tagata Samoa e fa’aaoga i ai le La o le va’a, lea e pei ona i ai le va’a fai la e tasi ma paopao e lua ua mae’a ona fausia.

Ae na taua e le ali’i Foma’i ia Malouamaua e fa’apea, o se tasi o itu taua o lenei fa’amoemoe, ia mafai ai ona momoli se feau taua i tupulaga talavou aemaise ai tagata Samoa, e mafai lava ona latou fausia va’a i laau Samoa, e fa’aaoga i ai le poto ma le atamai na aumai e le Atua.

“E le o maua o ni Tufuga Fauva’a”, o le saunoaga lea a Malouamaua i le Samoa News, “Ae o le taumafai lava ina ia toe fa’aolaola galuega sa fa’atino e Tuaa ua lagomau mai Tiasa, o le mafua’aga lena o lenei fa’amoemoe, e le gata e taua mo tupulaga, ae momoli atu ai fo’i se feau taua i soo se tasi, e mafai lava ona tatou galulue fa’atasi e toe fa’aolaola galuega sa amataina mai e Tuaa o aso ua mavae”, o le saunoaga lea a Malouamaua.

O laau sa fausia ai va’a nei e tolu e aofia ai le va’a e tasi e i ai lona la ma paopao e lua e aofia ai laau sa aumai i Upolu, Savai’i, Tutuila ma Manu’a.

“O laau masani lava o loo ola i vaomatua o Samoa o loo fausia ai va’a nei e pei o le Mosooi, Ulu ma le Tamaligi, lea la ua tu’u fa’atasi e fau ai va’a e 3 lea ua mae’a ona fausia”, o le saunoaga lea a Malouamaua.

O le mae’a ai o le sauniga o le fa’apaiaina o va’a e 3, na faia ai loa fa’aaloaloga fa’a Samoa masani a le atunu’u mo le susuga i le ali’i Faifeau sa taitaia le sauniga lotu.