Ads by Google Ads by Google

Toe sauni fo’i Senate fesiligia Komiti Fa’afoe Faletupe fou a le malo

ausage@samoanews.com

O le taeao nei lea ua fa’atulaga e faia ai le isi iloiloga fa’apitoa a le Komiti o le Fa’agaioiga o le malo a le Senate, ma sui o le Komiti Fa’afoe o le Faletupe fou a le malo lea ua fa’amoemoe e tatala i le masina fou, mo le fa’amaninoina o ni isi o mataupu e tatau ona silafia atili e le atunu’u.

 

O le afioga i le ali’i senatoa ia Tuiasina S. Esera na folafolaina le iloiloga ananafi, ma ua fa’amoemoe e komiti aoao i ai le maota maualuga.

 

Saunoa le afioga i le ali’i senatoa ia Tuaolo M. Fruean i luma o le maota maualuga ananafi e fa’apea, o ia le isi sui na talosagaina le iloiloga lenei ina ia fa’ataunu’uina, ina ia mafai ai ona maua le avanoa o le Komiti Fa’afoe o le Faletupe latou te fa’amalamalamaina ai ni isi o mataupu o lo o fia malamalama i ai le Fono Faitulafono ma le atunu’u.

 

“O ni isi o ia mataupu ona o le mataupu e fa’atatau i le leai o se kamupani inisiua latou te puipuia vaega tupe uma o le a teu i totonu o le faletupe, ae o le fesili e tatau ona malamalama i ai le atunu’u, e fa’afefea ona maua le kamupani inisiua (FDIC) mo le faletupe pe afai o lea e le i amataina se faletupe”, o le saunoaga lea a Tuaolo i luma o le maota ananafi.

 

Na fa’amanino e le afioga i le ali’i senatoa e fa’apea, e le mafai ona agava’a le faletupe a le malo i se kamupani inisiua a le feterale, se’i vagana ua amata aloaia lana tautua ma vaavaai mai i ai le FDIC po o ausia uma e le faletupe a le malo aiaiga uma e tatau ona latou fa’atinoina.

 

“Afai loa e ausia tulaga uma ma mautinoa ua tulaga lelei manaoga e tatau ona i ai, ona fa’atoa maua loa lea o le avanoa e puipuia ai tupe i lalo o le vaega a le FDIC, e pei fo’i o le faletupe a Amerika Samoa i le ulua’i taimi na fa’atoa tau amata ai, pei lava e 4 tausaga talu ona tatala fa’atoa maua le FDIC, o le mataupu la lea e tatau ona matua manino i ai le atunu’u ina ia mautinoa e leai se tulaga e popole ai fua i le tatala aloaia ai o le tautua a le faletupe”, o le saunoaga lea a Tuaolo lea fo’i na lagolagoina e le afioga i le ali’i peresetene o le Senate ia Gaoteote Palaie Tofau.

 

Na taua e Gaoteote e fa’apea, o le taua o le iloiloga, o le a manino ai le atunu’u i le tele o fesili o lo o latou fia malamalama i ai, aemaise ai le fesili i le mafua’aga ua ala ai ona manatu le malo latou te fa’atautaia lenei faletupe, ae o tiute ia e tatau ma alaga tatau i pisinisi tua.

 

“E le o po se lilo i le atunu’u, o lea ua sauni le faletupe o Hawaii e tula’i ese, afai la e o ese, o fea e tua i ai le atunu’u i tulaga tau faletupe. Ua leva ona ave e le malo le avanoa i ni isi o kamupani tua latou te tapenapena ai mo se isi faletupe, ae e o o mai lava i le taimi nei e na o saunoaga i luga o le ea e aunoa ma se gaioiga ua tino mai, ma mafua ai loa ona manatu le malo e saili se auala e fesoasoani ai i le atunu’u”, o le saunoaga lea a Gaoteote.

 

Na saunoa atili le afioga i le Tama’ita’i o le Ao i luma o le maota e fa’apea, o le agaga atoa o le malo na mafua ai ona tula’i mai le manatu e fa’atatau i le faletupe fou, o se auala e fesoasoani ai i le atunu’u mo se isi faletupe fou, ma foia ai le fa’afitauli ua tele taimi o fetaia’i ma le atuu’u, o le tutu mai lava i le laina i le taeao e oo lava i le afiafi o laulaututu i se tasi o faletupe.

 

E tusa ai o fuafuaga ua fa’ataoto e le malo mo le faletupe fou, o le masina fou o Oketopa lea ua fa’amoemoe e tatala aloaia ai le faletupe mo le atunu’u, i lona nofoaga autu i Utulei, le nofoaga tuai sa i ai le faletupe o Hawaii.