O le itula e 8:30 i le taeao nei lea ua fa’amoemoe e toe fofogaina ai i luma o le fa’amasinoga fa’aitumalo le mataupu a le ali’i Amerika lea na sola ese mai i Tonga i le masina o Setema, ao fa’agasolo ai taualumaga o le mataupu e pei ona tu’uaia ai o ia i lona fasiotia o lona to’alua, ina ua talia e le afioga i le ali’i fa’amasino ia Fiti A. Sunia le talosaga a le loia o lo o tula’i mo lea ali’i, mo se avanoa e finauaina ai lana talosaga ina ia solofua le moliaga o lo o tu’uaia ai lenei ali’i e le malo o Amerika Samoa.

O le ali’i o Dean Fletcher, 53 tausaga le matua mai le Setete o Florida, i Amerika, o lo o tu’uaia e le malo o Amerika Samoa i le moliaga mama e tasi, o lona fa’atamala lea e tu’uina mai ni fa’amatalaga e fa’ailoa mai ai lona sauni e ulufale mai i laufanua o Amerika Samoa.

O le aso 3 Oketopa 2016 na ulufale fa’amalosi mai ai le va’a faila o le Sea Oak na folau mai ai Fletcher mai Tonga i Amerika Samoa, e aunoa ma lona fa’ailoaina muamua mai i le Pulega o Uafu ma Taulaga a le malo o Amerika Samoa, o ia lea ua sauni e ulufale mai i lona atunu’u.

O le taeao ananafi na fa’atulaga e toe fofogaina ai le mataupu a Fletcher i luma o le fa’amasinoga fa’aitumalo, ma le fa’amoemoe e fa’alauiloa aloaia ai loa le maliliega lea ua mae’a ona latou sainia a le malo o Amerika Samoa ma le fa’amoemoe e fa’amuta aloaia ai loa lana mataupu.

Ae ina ua valaau le mataupu a le ua molia i le taeao ananafi na fa’ailoa ai e Sunia i ali’i loia e fa’apea, o le maliliega lea na fuafua le itu e lua e fofogaina i luma o le fa’amasinoga, lea fo’i na fa’aleo e le itu tete’e i le iloiloga sa faia i le vaiaso na te’a nei, e manatu le fa’amasinoga e le o talafeagai lea maliliega.

Na fa’auilavea le loia a Fletcher ma ia finau i le fa’amasinoga e fa’apea, afai o le tulaga lea ua oo i ai le fa’aiuga a le fa’amasinoga, ua ia sauni e finau lana talosaga i luma o le fa’amasinoga e solofua ai le moliaga fa’asaga i le ua molia, peita’i na talosaga le loia a le malo ia Jarard Murphy i le fa’amasinoga mo se avanoa e toe tolopo ai le mataupu mo se isi vaiaso, ae se’i toe feutana’i ma le loia a le ua molia.

Ae na fa’amanino e Sunia e fa’apea, talu ai o lea ua mae’a ona tu’uina mai le fa’aiuga a le fa’amasinoga e fa’atatau i le maliliega aufa’atasi lea na taumafai itu e lua e fofogaina i le vaiaso na te’a nei, ua tatau ai la i itu e lua ona fautua atu i le fa’amasinoga i le isi la’asaga e tatau ona oo i ai lenei mataupu.

Ae ina ua toe fa’ailoa e le loia a le itu tete’e ua ia sauni e finau lana talosaga e solofua ai le moliaga fa’asaga ia Fletcher, na poloaina ai loa e le afioga a Sunia le loia a le malo ina ia sauni e tali i le talosaga a le itu tete’e lea o le a fofogaina i le taeao nei.

Na taua e Murphy i le Samoa News e faapea, talu ai ua le taliaina e le fa’amasinoga le maliliega sa latou taumafai i ai ma le itu tete’e, lona uiga e le toe talanoaia lava e le malo ma le itu tete’e se isi lava maliliega, se’i vagana ai lona sauni e tali i le talosaga a le itu tete’e lea ua fa’amoemoe e finauina i le taeao nei, mo se poloaiga a le fa’amasinoga e solofua ai le moliaga fa’asaga ia Fletcher.

Sa auai i totonu o le potu fa’amasinoga i le taimi atoa o le iloiloga ali’i Leoleo e to’atolu mai le malo o Tonga, lea na taunu’u mai i le vaiaso na te’a nei ma le fa’amoemoe mo le toe auina atu o Fletcher e tali i le moliaga o le fasioti tagata fa’asaga ia te ia, e mafua mai i le fa’alavelave lea o lo o tu’uaia ai o ia i lona fasiotia lea o lona to’alua i le masina o Setema na te’a nei i Tonga.