I le tapunia ai o le Fonotaga lona 7 a Vaega o le Soifua Maloloina a Samoa e lua i le vaiaso na te’a nei, na taua ai e ta’ita’i a itu e lua tulaga manuia na mafai ona fefa’asoaa’i i ai sui usufono i aso e 3 o le fonotaga.

O se tasi o suiga na mafai ona fa’amauina i le aso Faraile na te’a nei ina ua tapunia lenei Fonotaga, o le a le toe usuia i tausaga uma lenei fonotaga, ae o le a ta’i 2 tausaga ma fa’ataunu’uina, ina ia mafai ai ona lava le taimi e galulue ai aufaigaluega ma Ta’ita’i o Vaega o Soifua Maloloina a atunu’u e lua e saili auala e fa’atinoina ai le fa’aleleia atoa ai ma le tausiaina o le soifua maloloina o tagata lautele.

“O se fonotaga taua lenei fonotaga mo Samoa e lua, e le gata ua tele metotia ma fa’amaumauga ua mafai ona fetufaa’i, ae ua mafai ai fo’i ona maua auala e foia ai fa’afitauli tau i le soifua maloloina o lo o alia’e mai i totonu o Samoa e lua”, o le saunoaga lea a le Faatonusili o le Matagaluega o le Soifua Maloloina a Amerika Samoa, Motusa Tuileama Nua i se fa’atalatalanoaga ma le Samoa News i le aso Faraile na te’a nei.

Na viia e Motusa i latou na afuaina maia lenei fonotaga i le 7 tausaga talu ai, lea ua mafua ai ona vaaia suiga tetele i le soifua maloloina o tagata i Amerika Samoa ma Samoa i Sisifo.

“E le mafai ona tulaga manuia soifua maloloina o tagata se’i vagana ua galulue fa’atasi sui o vaega o Soifua Maloloina, e le manuia Amerika Samoa pe afai e galulue na o i latou e fa’apena fo’i i Samoa tuaoi, e le manuia a latou sailiga pe afai e saili lava na o i latou, ae o le taua o le fetufaa’i o fa’amaumauga ma metotia e fa’aleleia ai tulaga tau i le soifua maloloina o tagata, o le a mafai ai e le isi itu ona malamalama i mea o lo o tutupu i le isi itu”, o le saunoaga lea a Motusa.

E ui la o lea ua ta’i 2 tausaga ma usuia lenei fonotaga, peita’i ua malilie itu e lua e tofia a latou Komiti Fa’apitoa e galulue i le tausaga lea e le o usuia ai se fonotaga, mo le toe fa’amautuina o tulaga e tatau ona fa’atinoina ia latou galuega, a o lumana’i ai le tausaga e usuia ai le isi fonotaga, o le masina lea o Novema 2018.

O le aso mulimuli o le fonotaga na mafai ai ona fefutaa’i sui o Samoa e 2 i auala e tatau ona fa’atinoina ina ia foia ai le tele o fa’afitauli o lo o a’afia ai soifua maloloina o tagata o le atunu’u.

Na taua e le Minisitia Lagolago a le Matagaluega o le Soifua Maloloina a Samoa, afioga Salausa Dr. John Ah Ching le taua o lenei fonotaga, ua mafa ai ona maua e tagata faigaluega fa’apea ai ma ta’ita’i o Vaega o le Soifua Maloloina le auala e fetufaa’i ai i fa’amatalaga ma auala eseese o lo o mafua ai ona a’afia le soifua maloloina o tagata.

“O se tasi o itu o lo o pito sili ona a’afia ai le soifua maloloina o tagata, o le malosi o le taumafa ae leai se fa’amalosi tinio, peita’i e taua tele le tatau lea ona paleni itu e lua ina ia maua ai e le tagata soifua le ola maloloina, o ni isi la o metotia ua mafai ona matou fetufaa’i ai i lenei fonotaga, ia tele auala e fa’amalosia ai tagata ina ia fa’amalosi tino ma fuafua lelei taumafa mo lo latou ola maloloina”, o le saunoaga lea a Salausa.

Sa ia taua fo’i e fa’apea, o le taua o lenei fonotaga, ua molimauina ai le tele o vaega o lo o tutupu i Samoa e lua, o lo o a’afia ai le soifua maloloina o tagata, ma o ia vaega ua tatau ona foia.

Ina ua fesiligia poo ai ia vaega, na saunoa Salausa e fa’apea, “O se tasi o itu ua maitauina, o lo o tuai le faia o siaki ina ia mafai ai ona iloa ituaiga gasegase o lo o a’afia ai tagata, afai ae vave ona faia siaki ina ia iloa ai gasegase o lo o a’afia ai tagata ta’ito’atasi, o le a fa’a faigofie ai fo’i iina ona sailia auala e foia ai ia gasegase, ae afai e tuai ona fa’atinoina siaki nei, o le a tuai fo’i se lavea’i o i latou ua a’afia, ma o o atu ai i se tulaga e o no a’afia ai ma le soifua”, o le saunoaga lea a Salausa.