“Se talofa e ia Satele, ua pei o le pa’u fa’i e fetosoa’i solo e Loi”

Talu ai e le o maua lava se tasi o le Falelima i Sisifo mo se isi na te fa’aauauina le tofi o le Kovana Itumalo, lea sa tauave mai e le afioga a Lualemaga E. Faoa ua tu’umalo, na faia ai loa le fa’aiuga ina ua mae’a le fonotaga lona lua sa usuia i le Ofisa o Mataupu Tau Samoa i le aso Faraile o le vaiaso na te’a nei, o le a tu’uina atu loa le mataupu i le afioga i le ali’i kovana mo sana fa’aiuga, ina ia tusa ai ma le Tulafono Toe Teuteu a le malo o Amerika Samoa.

E to’atolu la suafa lea ua tu’uina atu i le afioga i le ali’i kovana ia Lolo Matalasi Moliga e fai mai i ai sana fa’aiuga, e aofia ai le afioga i le Sa’o ia Tuiasina S. Esera mai le itumalo o Tualatai, o le afioga i le Alala Matuatala ia Fuamatu J.V Fuamatu mai le itumalo o Alataua, mo le afioga ia LeAtualevao Sosene Asifoa mai le itumalo o Leasina/Atiulagi.

O le mataupu lenei na tofu atu i le Ofisa o Mataupu Tau Samoa, ina ua fesiligia e le to’atele o le Falelima i Sisifo le fa’aiuga na faia e Satele, e tofia ai Tuiasina e avea ma Kovana Itumalo ina ua mae’a le ulua’i fonotaga sa usuia i le maota i Asotau i le masina na te’a nei, ma valaau ai loa e le Failautusi o le Ofisa o Mataupu Tau Samoa, le afioga i le Maoputasi ia Mauga Tasi Asuega le fonotaga lona lua e pei ona usuia i le vaiaso na te’a nei.

O le mae’a ai o le saunoaga a le sui failautusi o le Ofisa o Mataupu Tau Samoa, tofa Malemo Tausaga e fa’afeiloaia ai le mamalu o le Falelima i Sisifo na mafai ona fa’atasi atu i le fonotaga, na maua ai loa le avanoa o Mauga e saunoa ai e fa’ataua le mamalu o tulaga fa’aleaganu’u aemaise ai o le va nonofo fa’amatai o loo mafai ai ona maua le filemu ma le fealofaniga i totonu o afioga, itumalo ma le atunu’u.

O le mae’a ai o le saunoaga a Mauga, na tula’i ese ai loa sui o lona Ofisa, ae taoto atu le fonotaga a le Falelima e fa’atautaia e le afioga a Satele, ma o se fonotaga sa sili atu ona si’isi’i saunoaga ma tuleiga na fa’afofogaina ai, ina ua fa’aalia le fa’auliulito o finagalo o Tamali’i ma Tootooau o le Falelima e talia le finagalo o Satele, ina ia fa’atumauina le fa’aiuga ua mae’a ona faia le ulua’i fonotaga e le toe suia.

O le saunoaga a le susuga i le Tama Matua, le afioga i le ali’i Senatoa ia Tuiagamoa Tavai na tomua ai le fonotaga, ma ia tu’uina atu ai lana fautuaga i le tulaga e tatau ona taoto ai le sailiga tofa a le Falelima i Sisifo.

“O la’u fautuaga i le tatou Falelima, aua ne’i o tatou naunau i le tofi aua o le tofi e tumau ae o latou soifua e tu’u fa’asolo e le Atua, o le a fo’i se tulga e finagalo i ai le Fa’asuaga o le tatou Falelima, ia tatou lagolagoina ma le loto maualalo, aua fo’i le naunau i le i’a a ia manumanu i le upega”, o ulua’i fautuaga ia mai ia Tuiagamoa na tomua ai le sailiga tofa a le Falelima i Sisifo.

Na fa’aalia e ni isi o le Falelima lagona fa’anoanoa ina ua fa’ateia i latou i le fa’aiuga ua faia e Satele, o lona filifilia lea o Tuiasina e avea ma Kovana Itumalo, ae le o se fa’aiuga lea na auatasi i ai le Falelima i lana ulua’i fonotaga, e le o se fa’aiuga fo’i lea na faia e le itumalo o Tualatai.

“O lea sa tatou ave le fa’aaloalo maualuga ma le fa’aeaea ia Satele na te tauaveina ai le tofi, peita’i e le gata sa ia teena ao lea fo’i ua ia toe tofia lava lona Itumalo e tauaveina le tofi, ao lea o loo tagisa atu isi itumalo o Falelima e fia tautua fo’i latou, o le mafua’aga lena e lagona ai le fa’anoanoa”, o le saunoaga lea a le afioga i le Sa’o, le ali’i senatoa ia Magalei Logovi’i na lagolagoina e le afioga i le Malu o le Fale, le ali’i senatoa ia Fai’ivae Godinet.

Saunoa Fai’ivae e fa’apea, o le mafua’aga tonu lea na ia le sainia ai le pepa na tu’uina atu e le Fa’alupega, ona e leai se fa’aiuga a le Falelima i Sisifo e avea ai Tuiasina ma Kovana Itumalo.

Na tula’i le afioga i le Sa’o ia Tuiasina Dr. Salamo Laumoli ma ia fa’amalulu i le Falelima, pe afai ua ta’uleagaina le itumalo ma le suafa o le aiga i le fa’aiuga e pei ona fesiligia.

“Lau afioga Satele, ia e alofa i le itumalo ma le Falelima, o oe o loo i ai le maopoopoga o le afioaga ma le itumalo, ae ou te fia fa’ailoa atu i le Falelima, e le i faia se faaiuga a le itumalo o Tualatai i se tasi na te nofoia le nofoa, o le fa’aiuga lava sa fai to’alua e Satele ma Tuia [Tuiasina Esera], ou te talosaga atu ina ia aveese le igoa o Tuiasina ma le ta’uvalea o le Falelima”, o le saunoaga lea a Tuiasina Laumoli ma ia tuua ai loa le fonotaga.

Na fa’aalia e le afioga i le Fofoga Fetalai ia Savali Talavou Ale le tumau pea o le finau a Alatua i le tofi, ona ua tele tausaga e le o amanaiaina lava Alataua, ae na finau fo’i Tuiagamoa ina ia toe lafo atu le tofi e toe fa’aauau e Leasina/Aitulagi.

Ina ua latalata i le fa’aiuga o le fonotaga, na lafo ai loa e le afioga Moananu Va le tofi ia Satele na te tauaveina, peita’i sa toe teena fo’i e le Alo o Salamasina ma ia taua ai e fa’apea, “E oo mai lo’u oti ou te le toe oo mai i le Ofisa lenei o Mataupu Tau Samoa, ona o le mea sa tupu ia te a’u i tausaga ua mavae”, o le saunoaga lea a Satele e fa’atatau i le taimi na aveese ai e le kovana le tofi o le Failautusi sa ia umia ae tu’u atu ia Mauga.

“E lagona lo’u fa’anoanoa ona o lea ua mae’a ona faia la tatou fa’aiuga i le ulua’i fonotaga, e taoto mai le tofi i lo’u itumalo ao lea ua foliga mai tou te le amanaia sa’u fa’amatalaga. O la’u tala i le aso lenei, e le toe suia le fa’aiuga ua uma ona fai, ae afai o lea ua outou fai mai tou te le taliaina, e ma’imau la le taimi e fa’alupe ai fua a’u o se Fa’asuaga o le Falelima, ao lea tou te le amanaia sa’u tala, ua atagia mai ai se Falelima e leai se tofa, leai se ‘ava, leai se tautua”.

“Se talofa e ia Satele, ua pei o le pa’u fa’i e fetosoa’i solo e Loi, fai mai o le fa’aao ae se’i fa’auta i mea ia ua aliali mai, o lena ua avatu la’u tala, e le toe suia le fa’aiuga ua uma ona fai, ae afai e i ai se isi e le fiafia ai, tatou i le fa’amasinoga”, o le saunoaga lea a Satele na toe talifuaitau ai Magalei, ma ia taua lona fa’anoanoa i le malolosi o saunoaga a le Alo o Samoa, e pei lava o loo fa’atonu lana fanau.

I le fa’aiuga o le fonotaga, na talia ai loa le fautuaga ina ia taoto atu loa i le kovana mo le faia o se fa’aiuga i le tofi Kovana Itumalo o le Falelima i Sisifo.