Ads by Google Ads by Google

Vevela sailiga siamupini o le Liki Kirikiti o le Mosooi


Se tasi o gaioiga mataina a le au kirikiti a le Tanifa o le Vao mai Sili, Savai’i i le tatalaina o le sailiga siamupini o le Liki Kirikiti o le Mosooi i lenei tausaga, lea o lo o tausinio ai ‘au e 4 mai Amerika Samoa nei, ma ‘au ta’itasi mai Samoa ma Niu Sila. [ata AF]
ausage@samoanews.com

Na tumutumu le mamalu o le atunu’u i le molimauina o le tatala aloaiaina o le sailiga siamupini i le Liki Kirikiti mo le Mosooi o lenei tausaga, lea na amata i le afiafi o le aso Faraile o le vaiaso na te’a nei, i le ta’aloga fa’atamali’i i le va o le ‘au masi’i mai Samoa, Tanifa o le Vao mai Sili, Savai’i, ma le ‘au a le La’u Samoa mai le afioaga i Faleniu.

 

O le mae’a ai o le tatala aloaiaina o le Liki Kirikiti o le Mosooi o lenei tausaga i le aso Faraile na te’a nei, na sosoo ai loa ma isi ta’aloga e tolu i le aso To’ona’i na sosoo ai, i le malae masani i le paka i Fagaalu.

 

O ‘au e 6 o lo o sailia le siamupini o le Mosooi o lenei tausaga e aofia ai le ‘au masi’i mai Aoteroa i Niu Sika, Tama o le Malaka, o le ‘au masi’i mai Samoa, Tanifa o le Vao mai Sili, Savai’i, ma ‘au e 4 mai Amerika Samoa nei e aofia ai Faleniu, Vaitogi, Masefau ma Alofau.

 

Na taua e sui o le Komiti o lo o fa’afoeina le ta’amilosaga e fa’apea, o le agaga atoa o lenei ta’amilosaga, ia mafai ona fa’aolaola ta’aloga fa’a Samoa e pei o le kirikiti, ina ia avea o se auala e fa’amasani ai tupulaga lalovaoa mo le lumana’i.

 

TANIFA O LE VA vs LA’U SAMOA

 

Na muamua tata le Tanifa o le Vao, ma maua ai a latou ‘ai e 67 ae atoa loa a latou pe e 19, ma maua ai loa le avanoa o le La’u Samoa latou te tuliina ai ‘ai o le ta’aloga. E le i umi ona fa’aaoga e le ‘au a le La’u Samoa tulaga o le lelei o a latou ta ma auala na maua ai ‘ai e 68 ae fa’atoa 13 a latou pe, ma manumalo ai loa le La’u Samoa i le ulua’i ta’aloga o le ta’amilosaga.

 

O se tasi o itu sa maitauina i le ta’aloga lea, e le gata i le lelei o fa’ate’a a le La’u Samoa, ae toe lelei fo’i a latou ta, peita’i o le Tanifa o le Vao, e tau fa’aletonu laititi lava a latou fa’ate’a.

 

Na taua e se sui o le ‘au a le Tanifa o le Vao i le Samoa News e fa’apea, toeititi o le ‘afa o le ‘au e le o malaga mai, ona o tuatuagia i galuega aemaise ai o le tausiga o aiga, ae o le a latou taumafai lava i le mea sili e gata ai lo latou malosi i le fa’atinoina o le ta’aloga.

 

TA’ALOGA O LE ASO TO’ONA’I:

 

TANIFA O LE VAO vs VAITOGI

 

Ua faiaina le ‘au a le Tanifa o le Vao i le ‘au malosi a Vaitogi i le aso To’ona’i na te’a nei, ma ua sosoo ai faiaina e 2 a le ‘au masi’i mai Samoa. E 100 ‘ai a Vaitogi na ta i le afa muamua, ae fa’atoa 13 pe, ona fa’amalolo loa lea o le ta’aloga ae tu’u le avanoa e tuli ai e le Tanifa o le Vao ‘ai e 100 a Vaitogi, ae o se tulaga fa’anoanoa na oo i ai le taumafaiga a nai uso mai Savai’i, ina ua atoa a latou pe 19 ae fa’atoa 68 a latou ‘ai na maua, ma manumalo ai loa Vaitogi.

 

MASEFAU vs ALOFAU

 

E 100 ‘ai a Alofau na maua i le afa muamua o le ta’aloga ae 13 a latou pe, ona taofi loa fo’i lea o le ta’aloga ae alo ane Masefau e tuli ‘ai, peita’i e na o le 98 ‘ai a Masefau na maua ae mae’a loa a latou pe e 19, ma manumalo ai loa Alofau i le la ta’aloga.

 

TAMA O LE MALAKA vs LA’U SAMOA

 

E 51 ‘ai a Tama o le Malaka mai Niu Sila na tuli i le ‘afa muamua o le ta’aloga ae atoa a latou pe e 19, ona tuli loa lea e le La’u Samoa, ma maua ai ‘ai e 52 ae fa’atoa 6 pe, na manumalo ai loa le ‘au a La’u Samoa.

 

O le tulaga la lea ua i ai le ta’amilosaga i le taimi nei, o lea ua 2 manumalo a le ‘au a La’u Samoa, ta’itasi manumalo a Alofau ma Vaitogi, ae ua 2 faiaina a le ‘au masi’i mai Samoa, le Tanifa o le Vao mai Sili, Savai’i, ae ta’itasi faiaina a Masefau ma Tama o le Malaka mai Niu Sila.

 

O le vaiaso nei lea ua fa’amoemoe e toe fa’aauau ai lenei ta’amilosaga, ma ua talosagaina fo’i e le komiti le mamalu o le atunu’u ina ia aga’i atu i le malae i Fagaalu i le itula e 3:00 i le afiafi o aso o lenei vaiaso, mo le molimauina o tulaga i ta’aloga o lo o fa’agasolo ai.