Ina ua maua mai tusitusiga fa’asea mai i nisi o tagata matutua o le atunu’u e fa’asaga i le faiga fou o faatautaia ai nei “Mea Taumafa” a le polokalama a le TAOA, sa fesiligia fo’i le mamalu o le Ofisa Autu i lona taupulega i se latou fa’amatalaga e tusa o ia faitioga.

O le susuga Kuresa Paopao, le sui faatonu o le TAOA, sa ia tali mai i se talosaga a le Samoa News mo se faamatalaga.  Ua fa’ailoa mai e tagata matutua i a latou faitioga, le tulaga itiiti na’ua o fasi i’a, ae lua mea’ai a’ano, ma le tipiga moli  ma sa sili ai ona le aumaia se mea.

“O fa’asea na ua fai si o’o so’o mai o na vaega i le matou ofisa, ae moni lelei le latou tala. O mea’ai e na’o le 3 aunese e ao ina kukaina atu o le a’ano o manu. O le mea’ai masoa, e ao ina avatu e pei lava o le fa’atonuga, ma e le taitai ona tutusa ma mea tausami e saunia e aiga mo latou matua,” o le tala lea a Paopao.

Sa fesiligia, ae a pe tau fa’alapo’a le fasi a’ano o manu e kuka, ina ia tau talafeagai ma tu fo’i a si tatou atunu’u, e ave mea lelei uma i matua, ae a totoe mai, ua laki ai le fanau, a leai ua tatali fa’amanuiaga mai luga.

Peita’i, ua fa’ailoa mai, “Ua savavali fo’i le kamupani kuka latou i ala o le latou konekarate, e le mafai ona se’e ese ai i latou, aua o le a avea ma mea e motusia ai fo’i lana konekarate mai lea alamanuia o ia maua i le taimi nei.”

I le tulaga lava o taumafa, lea ua fa’ailoa mai, e matua o’ona lava le a’ano o le i’a, o lona uiga o fasi i’a nei e aumai i va’a i’a ua fa’aaoga mai.

 “O le a talanoaina lea tulaga i le matou feutaga’iga o lo’o soso’o nei ma le ‘au kamupani kuka, e le tatau ona fa’aaoga e i latou i’a mai va’a masima a le Kamupani I’a, e moni lelei e o’ona tele a’ano o i’a ia mo le soifua o tagata matutua,” o le tali lea a Paopao.

O le isi fa’asea na fa’ailoa mai i se isi tusitusiga, o le vave tapunia o fale’ai e tufa mai ai mea’ai, ae le’i uma ona ‘a’ai tagata o le latou fo’i vainu’u o tausia. “O la’u tali, e moni lelei, afai ua tapunia le ofisa ona ua leai ni mea’ai o totoe, e moni le fa’asea.”

I se fa’apupulaga o le mafuaga ua faia ai lena tulaga, sa ia fa’ailoa mai ai, “O le tele o taimi e le’o o atu tagata matutua e aumai a latou mea’ai, ona kuka fuafua lea e i matou mea’ai e tau talafeagai ma mea’ai na piki i le aso na muamua atu, ina ia le tele se totoe e i ai. Peita’i, o lea ua o atu tagata uma, o lona uiga, ua le lava ai le fa’asoa mo i latou uma e ala i ipu mea’ai.”

Na fesiligia pe aisea ua fesuisuia’i ai numera. Sa tatau lava ona tamau e fuafua i le aofa’i o tagata matutua ua agava’a i le polokalama i so’o se nofoaga ua fa’atulaga ma nu’u latou te sapalaia.

“O le mea tonu lena sa tatau ona i ai, peita’i, ua matauina, talu ona toe faia lenei faiga fou, e le tumau se fale’ai i se numera e tasi, e fesuisuia’i lava, ua i ai nisi o tagata matutua ua le fia a’ai, pe ua le o’o mai lava e piki atu lana mea taumafa,” o se tala lea a Paopao.

E silia ma le 2,000 o i latou ua mae’a lautogia mo lea tautua o mea taumafa vela. O itula na fa’ailoa mai e tatau ona mautinoa o i ai mea’ai i fale’aiga mo tagata matutua, e afua mai le 9:00am se’ia o’o i le 1:00pm.

Ina ua fesiligia Paopao i tulaga o mea’ai totoe po’o fea e ave i ai e le matagaluega, ae fa’ailoa mai, “E masani ona toe avatu i le Hope House mo tagata matutua o tausia lelei ai.”

Peita’i, o le isi fa’asea mai Vailoa, ua fa’ailoa mai, “E tele na’ua mea’ai e la’u e le vaega laiti o le Ofisa i latou aiga, o lo’o va’aia lava lena mea.”