Pago Pago, AMERICAN SAMOA — E to’a 187 fanau sa fa’au’u mai le Aoga Maualuga a Samoana i lenei tausaga, i se sauniga na fa’ataunu’uina i le taeao o le aso Lulu i le fale ta’alo o le Laumua o le Malie i Utulei. O le ali’i pule aoga, Tupa’i Roderick Atafua, na gafa ma le lauga fa'afeiloa'i i le mamalu o le aofia.

O le sini a le ‘au fa’au’u "Manatua Matatia ua Tatou Ausia, a'o e Tapena mo Lou Lumana'i!"

O tama'ita'i e to'alua ua la'ua maua togisilia o lenei tausaga:

• Karlinna Suluama Afoa-Lutu Sanchez o le GPA- 4.0; amata mai a'oga i le South Pacific Academy; Totino o le EFKAS Utulei; Togisilia i Suega uma nei: SAT 1400; ACT 29; ASVAB 96. Peresetene o le NHS; Teineititi A'oga Muamua ua maua fa'atolu le Tulaga Muamua i le Impromtu Speech i tauvaga Speech Festival ma ua umia ai e ia le Fa'ailoga Fa'apitoa a John Kneubuhl; Teineititi Aoga Muamua ua mauaina le fa'ailoga mo le Fa'afa ona maua le tulaga muamua i le Impromtu Speech ma ua ia umia nei le fa'ailoga na saunia e le afioga le Aloali'i Afoa Leulumoega Su'esu'e Lutu. Na tulaga muamua i le Numera i le teritori i le vasega 9, 10. Tulaga Muamua i le Young Writers i le teritori i le vasega 11 & 12. Fa'alua ona umia sikolasipi e malaga i le Junior Statesman Program. Tulaga muamua i le National History Day. O ona matua fa'aleagaga o Rev. Elder Ioane Evagelia ma le faletua i Utulei a'o ona matua matutua o le afioga le Aloali'i Afoa Moega ma Etenauga Lutu mai Utulei lava. O ona matua Christinna Lutu ma Carlos Sanchez.

• Daisy-Rose F. Crichton mai Pago Pago ma Aua. Sa amata mai ana a'oa'oga i le Uifa'atali Peter Coleman Elementary, GPA 4.0; auai ma lautogia o ia i le Science Symposium, ma le tauvaga a le Scince Fair. Auai fo'i i le Speech Festival, maua e ia togisilia i le Numera ma le Fa'aperetania; tausaga fa'ai'u o ana a'oga i Samoana ua ausia ai e ia togi maualuluga i le Physics ma Numera. O ia o le failautusi o le HOSA Club a Samoana, ma o lana fautuaga ia i latou uma ua fa'au'u fa'atasi i lenei tausaga, "A'o tatou aga'i atu e folau i le isi la'asaga fou o le tatou olaga tausaili, ia manatua tatou te malaga fa'atasi ma le Atua i o tatou ala uma. Ia manuia ou ala!" O ia o se alo e fa'asino ia Clerence ma Lieni Lesa [maliu] ma Oreta Crichton. O lana Ekalesia o le LDS i Pago Pago.

I le tulaga lua mo le ‘au fa’au’u, ua maua e le tama'ita'i o Arizona Fa'apio Sataua Tua. O lana ekalesia o le EFKAS i Fagasa. O ona matua fa'aleagaga o Rev. Uiana & Situfu Tanielu, ao ona matua o le tofa Sili ma Eseta Sataua mai Fagasa lava. O ia o se totino o le NHS i Samoana; O ia fo'i sa malaga i le JSI Program, totino fo'i o le HOSA, tagata faigaluega i le latou Year Book, tauva fo'i i le Islandwide History Day. O le sui Peresetene o le SGA. O lana toe fa'amanuia i lana vasega, "Ia manuia a outou sailiga uma i le lumana'i.

"Ua outou fa'ataua a outou matati'a ua mae'a ausia i lenei tausaga i le Laumua o Samoana, ina ia manatua le tigaina ma le pale o le manumalo ua outou se'e ai e pei o le fa'alauiloaga ua mae'a folasia e lo outou pule a'oga, ua a'e malo faiva i vai, ua aumai fa'atasi e le fanau le manumalo i le itu tau a'oa'oga fa'apea fo'i ma ta'aloga!"

I le saunoaga a Kovana Sili, Lolo Matalasi Moliga, sa ia fa'afetaia matua ma le pulega ma faia'oga i le Laumua o Samoana, ae maise lava le fanau fa'au'u, ona o le latou folauga i lenei 4 tasuaga ua mata'ina ai se 'ai mo Samoana.

Mo le ‘au fa’au’u, saunoa le kovana, “A'o le'i e sopo atu e la'asia le isi la'asaga fou o le olaga tausaili i le atamai, toe tu tasi ma e tepa e fa'afetai mai ia i latou na sapaia au taumafaiga ua e sapi ai, ona e fa'ato'a malaga ai lea i lagima o au filifiliga fai."

"A outou maua le poto ma le atamai saili, aua ne'i galo lou amataga lenei, po'o a lava mea e sofa'i mai ia te oe, ae ia tumau lou fa'amoemoe na e malaga ese atu ai. Aua e te to'ilalo i peau lagavale o le olaga e fa'aleaga ai oe, ma le taunu'u ai lou fa'amoemoe lelei. Na'o le Atua e te mafaia ai mea uma i lona fa'amalosi atu ia te oe,” o le toe tima'i lea a le Kovana ma mae'a ai lauga fa'apitoa o le aso.

O le taliaina o le 187 o fanau a'oga ua fa'ai'uina ma le manuia a'oa'oga i lenei, na tula'i ai le tama'ita'i Fa'atonusili o A'oga, Dr Ruth Matagi-Tofiga, o se tasi o Tama ma Teine Tuai a Samoana. (Tala tusia mo fa'ailoga ausia e le fanau fa'au'u, i se tasi o lomiga o lenei vaiaso).