Ads by Google Ads by Google

23 fanau fa’au’u A'oga Maualuga a Iakina Adventist Academy 2018

A look at some of the 23 graduates of Iakina Adventist Academy class of 2018 during their commencement ceremony on Sunday, June 24, at Gov. Rex Lee Auditorium.Iakina Adventist Academy class of 2018 Valedictorian, Ingrid Papalii. Iakina Adventist Academy class of 2018 Salutatorian, Darryl Ulufale Meyer.

Pago Pago, AMERICAN SAMOA — I lenei tausaga ua tomuli ai le fa'asologa o fa'au'uga mai Vasega 12 i le atunu'u i le fa'au'uga a le A'oga Maualuga a Iakina Adventist Academy i Iliili. Ma e to'a 23 le ‘au fa’au’u ma o le latou manulauti, "Lo Matou Tala'aga” po'o le “Our Great Legacy".

Ina ua tula'i Pr Uili Solofa mo le tatalo amata ma lana upu fa'amalosi i le 'au fa'au'u, sa matua ia fa'apupula atili le tala'aga e ao ina fa'amau ma fa'amanatu ai pea lenei vasega faai'uaso.

"I lo outou tala'aga ua outou fia faia ma se pine fa'amau, ia manino ma atili fa'amauina ai ni matati'a lelei o mea ua mae'a ona outou faia i totonu o le a'oga i Iakina Adventist Academy. Ae ia silisili ona fa'amatala a'ia'i ai le alofa, o le su'ega sili lea o le ola fa'akerisiano, aua o se fa'anaunauta'iga lea i soo se tagata lava e agaalofa, ia avea ma pine fa'amau sa i inei lava o ia."

O le autu o lana tautalaga sa ia si'ia mai ai le Esekielu 16: 6-8. "Ua osia lau feagaiga ma le Atua ina ia e amatamea i so'o se galuega lelei e fa'ailoa mai ai lou alofa, ma ia atagia ai le agalelei o le Atua ia te oe. O le a se mea na e faia e ono manatua ai pea oe e ou matua, manatua ai oe e lau a'oga, o lau ekalesia ma lou nu'u? Ia agaga i galuega lelei ma le alofa atu, e mautu atili ai lou tala'aga i ou tagata."

O le ua maua togisilia o le vasega fa’au’u, o le tama'ita'i ia Ingrid Papali'i. O ia o le alo e fa'asino ia o se alo e fa'asino ia Mr & Mrs Papali'i ma na soifua mai o ia ia Fepuari 27, 2000. E tele ana galuega na tolaulauina ma ua ia te ia fo'i agava'a e avea ai o ia ma togisilia o le vasega fa'ai'uaso. O ia fo'i o le totino o le Close Up lea sa avea o ia ma Sui Peresetene o lea Sosaiete i le Iakina Adventist Academy (IAA), o le totino o le National Honor Society.

O le tulaga lua ua mauaina e Darryl Ulufale Meyer ma o ia o se tasi e fiafia tele i le ta'aloga Soka. Ua mae'a ona avea o ia ma Fitafita tauto i le US Marine Corps. O ia o se alo e fa'asino ia Pr Lance ma Iliganoa Ulufale.

I lana tautalaga i lana vasega fa'au'u sa ia tima'i ai, "O atu e fa'atino tatou sailiga i faiva po'o a'oa'oga ua manatu le tagata na te faia e tausili ai le lumana'i manuia, ae ia manatua, ia mafai ona manatua i tatou ona o mea lelei ua tatou mua'i faia mo tatou aiga, ekalesia, aiga ma le tatou Malo ma ona tagatanu'u."

O le ta'ita'ifono o le Komti Fa'afoe a le IAA, Dr Siaumau E. Ropeti, sa ia tula'i e fa'alauiloa le vasega fa'aiaso i le tama'ita'i fa'atonu sili fa'atasi ai ma le ta'ita'i o le Komiti o A'oga a le SDA i le vasa pasefika. Na talia aloaia e Dr Ruth Matagi-Tofiga, fa’atonusili o aoga  le malo, le ‘au fa’au’u mai IAA ua umia tipiloma.

Tufatufaga o Fa'ailoga Fa'apitoa:

Fa'ailoga fa'apitoa na saunia e Fetuiai Siologa mo le na avea le togisilia. Fa'ailoga mo le tulaga lua na tapena e Ausage & Associates.

Fa'ailoga o le Amio Lelei, Usita'i ma Fa'alogo, na saunia lea e Ropati & Ropeti Families na maua e Ingrid Papali'i.

Fa'ailoga na saunia e le Aiga o Curry ma Tavita mo le tama po'o le teine fa'au'u e maualuga ona togi i le Suega SAT ua maua e Sinaleto'oa Su'a.

O le fa'ailoga mo le fanau fa'au'u e sili ona togi i le Mataupu Silisili o le Tusi Pa'ia  na saunia e Mr & Mrs Lupe Tapua'i, na maua e Aveipepa Fua ma Kuresa Taga'i.

Fa'ailoga mo le Taitai Iloga i le tausaga na tapena e le Ti'iti'i family ma ua mauaina lea e Aveipepa Fua, peita'i o lea filifiliga o le ta'ita'i mataala toe mataalia na sailia lea e faia'oga uma o le a'oga.

O le fa'ailoga mo le tamaititi e matua iloga lona fia aoga i le a'oga i IAA, ma fiafia e faia so'o se tiute e fia maua ai sana fesoasoani lea na tapena e Queen Mora o le Tiitii Family, ua taua'aoina e Elijah Apulu.

Fa'ailoga o le Sui Ta'a'alo lelei i le vasega fa'aiuaso ua mauaina e sui e to'alua, peita'i na tapena uma nei fa'ailoga e Uputaua Ludgate o le ASDOE. O i la'ua nei o Darryl Ulufale ma Kuresa Tagai.

Fa'ailoga o le tamaititi ua sili ona aga'i i luga lona ola taumafai i le vasega fa'ai'uaso na maua lea e le tama'ita'i o Leahnetta Fa'alogo. O lea fa'ailoga na tapena e le susuga le Faipule Tualauta Samuel Ioka Meleisea.

Fa'ailoga na tapena mai e le US Marine Corp e to'afa i latou na fa'amau fa'ailogaina ma sa taua'aoina mai e Sgt Leapaga, Panitila Kesi. O i latou ua agava'a ai o Kuresa Taga'i, Marvin Mose, Ingrid Papali'i ma le fa'ailoga o le avea ma Fitafita o le US Marine ua mauaina lea e Darryl Ulufale Meyer.

O le fa'ailoga na tutulai fa'apitoa le sui o le Komiti o A'oga a le SDA mo lona fa'alauiloaga o le fa'ailoga lea mo le Faia'oga Mata'alia ma le Mataala i ona tiute fa'afaia'oga. Ua mauaina lea e Tavita Namusua.

O Tusi Fa'alauiloa fa'apitoa fo'i na saunia e le susuga le Faipule I le Konekeresi Aumua Amata mo le ‘au fa’au’u mai Iakina na tolaulauina fa'apitoa e le sui mai lona Ofisa Fausitina Suani ae taua'ao fa'apitoa e le tofa Uta Tagoilelagi.