O le toeaina mai Asia e 82 tausaga le matua lea na ta’usala e le Faamasinoga Maualuga i moliaga mama e lua, o lona tagofia o le itutinosa o se teineititi, ua talia e le faamasinoga lana talosaga na tuuina atu i le vaiaso na te’a nei, ina ia tuua le teritori ma toe fo’i atu i lona atunuu ma aumau ai i le umi o le a faanofovaavaaia ai o ia.

O Daniel Chang Sr na ulua’i tuuaia e le malo i moliaga mamafa e lua, e aofia ai lona tagofia o le itutinosa o se teineititi e 10 tausaga le matua.

O le vaiaso na te’a nei na lauina ai le faasalaga o le susuga Daniel Chang Sr, ina ua talia e le faamasinoga lana tali ioe i moliaga mama e lua na toe teuteu e le malo, i lalo o se maliliega sa ia sainia ma le malo, lea foi na talia e le faamasinoga.

O moliaga mama e lua ia na ta’usalaina ai Chang Sr e aofia ai lona tagofia o itutinosa o se teineititi e laititi i lalo o le tulafono i le tulaga lua, atoa ai ma lona faia o ni gaioiga e ono lamatia ai lona saogalemu.

I faamaumauga a le faamasinoga o loo taua ai e faapea, i le va o Aokuso 2010 ma Ianuari 2011, na faatinoina ai e le ua molia moliaga e pei ona ta’usala ai o ia e le faamasinoga.

A’o le’i tuuina atu le faasalaga a le faamasinoga, na faailoa e le loia a le ua molia ia Sharron Rancourt i le faamasinoga e faapea, ua talosagaina e Chang Sr le faamasinoga ina ia talia lana talosaga, e ala lea i lona tuua o le teritori ma lona loto malie, ma nofo ai i fafo atu mo le umi o le a faanofovaavaaia ai o ia.

Fai mai Rancourt, o le aso Tofi o le vaiaso nei lea ua faamoemoe e taunuu mai ai i le teritori le to’alua a le ua molia o loo i Amerika, ma la malaga faatasi atu ai loa i Taiwan i le aso 19 o le masina nei lava.

E le’i faatuiese le loia a le malo ia Mitzie Folau i le talosaga a le ua molia, ina ia talia lona manaoga e ala i lona tuua lea o le teritori ma lona loto malie.

E le’i umi se taimi na malolo ai le faamasinoga mo le iloiloina o sana faaiuga ae toe foi mai alii faamasino ma fofogaina loa le faaiuga e le alii faamasino sili ia Michael Kruse.

Saunoa Kruse, i le vaavaai atu ai o le faamasinoga i le matua ua i ai le soifuaga o Chang Sr, ua manatu ai le faamasinoga ailoga e gafatia e le toese a le malo ona faatino manaoga uma e moomia e ia mo lona soifua maloloina, pe afai e finagalo le faamasinoga e tuu atu se faasalaga faafalepuipui.

Na tata’i foi le finagalo o le faamasinoga i le molimau a le atalii a le ua molia o Daniel Chang Jr i le vaiaso i ona tua atu, lea na ia taua ai le manaomia tele e lona tama o ana vailaau ma fualaau mo lona soifua maloloina i taimi uma, ina ia mautinoa e maloloina pea o ia.

E tele isi itu na silasila i ai le faamasinoga e uiga i lenei mataupu, ina ia fuafua i ai se faasalaga talafeagai mo le ua molia, ma o nisi o ia itu e aofia ai faafinauga i le leai lea o nisi solitulafono na ulua’i tuuaia ai le ua molia, se’i vagana ai moliaga ua faia faasaga ia te ia i le taimi nei.

Na taua e le atalii a le ua molia o Chang Jr i le faamasinoga, o lona tama o se tama sa galue malosi i le tausiga o i latou lana fanau, ma lona faanaunauga ia i’u manuia ma maua ni lumana’i lelei mo i latou.

Fai mai Chang Jr, o lona tama e  le o se tagata solitulafono, e le saua e le o se tagata e ola faamisa foi, ae o se tama e loto alofa ma tautua aiga.

Na tutu faatasi loia ina ia faanofovaavaaia le ua molia, e aofia ai le aua lea ne’i tuuina atu o ia i le toese i Tafuna.

I le faaiuga o le saunoaga a Kruse sa ia saunoa e faapea, e taua foi le talosaga a le ua molia e toe foi atu i lona atunuu, ina ia mafai ai ona alu ese atu o ia mai le teritori nei, aemaise ai le nofoaga na tulai mai ai le faalavelave lea ua  ta’usalaina ai o ia.

E lua tausaga lea ua faamalumalu ai le tuuina atu o se faasalaga a le faamasinoga mo Chang Sr, ae o le a nofovaavaaia ai o ia i lalo o ni poloaiga e ao ona ia usita’i i ai, ma o nisi o ia poloaiga e aofia ai le aua lea ne’i ona toe soli se tulafono a’o i ai i le teritori, lesitala lona igoa i le lisi o i latou ua ta’usala i solitulafono e aafia ai fanau laiti, ma ia tuua le teritori i le taimi ma le aso e pei ona ia taua i lana talosaga.