Ads by Google Ads by Google

Maua ilo i le tino o se pepa alaisa

O le fa’ateia o se aiga i Fagatogo i le vaiaso nei ina ua latou maua ni ilo i le tino o se pepa alaisa sa latou fa’atauina mai i se faleoloa i Fagatogo lava, na mafua ai loa ona latou fa’afeso’ota’iina le Matagaluega o le Soifua Maloloina mo se fesoasoani, mulimuli ane na latou lafo mai ata sa pu’e o le pepa alaisa i le Samoa News.

 

Na taua e le tina na aafia lona aiga i lenei mataupu i le Samoa News e fa’apea, o lana fanau na o e fai mai le latou fa’atau i le aso Lulu na te’a nei, ae te’i ai ina ua o o atu i le fale ae latou vaaia ai ilo o lo o fetolofi solo i le tino o le pepa alaisa.

 

Na taua e le tina e fa’apea, na o atu sui o le Soifua Maloloina ma faia sa latou asiasiga i le faleoloa na fa’atau mai ai le pepa alaisa, ma latou faailoa atu ai le leai o se faaiuga ua latou faia i le faleoloa, ona o lo o tulaga lelei mea uma i le taimi o le asiasiga.

 

E ui o lea ua mae’a ona toe fesuia’i le pepa alaisa fou ma le pepa alaisa na maua ai ilo, ae na taua e le tina i le Samoa News lona le fiafia i le fa’aiuga ua faia e le Soifua Maloloina fa’asaga i le faleoloa, ona e to’atele isi tagata o le latou nu’u o lo o faitio pea i le fa’aletonu o oloa e maua mai i le faleoloa lea.

 

E le i avanoa le Ta’ita’i o le vaega e asia fale’aiga ma faleoloa a le Soifua Maloloina mo sona finagalo e tusa ai o lenei mataupu, peita’i na taua e se sui sinia o le Matagaluega i le Samoa News e fa’apea, e atagia mai i le fa’alavelave na tula’i mai o ilo na pipi’i i le tino o le pepa alaisa e le i afua mai i totonu o le faleoloa, ae na afua mai i se isi nofoaga, e pei o le taimi na kiliva mai ai oloa i le faleoloa.

 

Na taua fo’i e le sui lea e le i finagalo e fa’alauiloa lona suafa e fa’apea, sa asia e sui o le Soifua Maloloina totonu uma o le faleoloa, ma faamaonia ai o lo o saogalemu mea uma, o le mafua’aga fo’i lena e le i tuuina atu ai se pepa sala i le pisinisi.