O le ali’i Leoleo Su’esu’e lea na tu’uaia i lona a’afia i se vevesi na tula’i mai i le fale kalapu o le Evalani i Pago Pago i le tausaga na te’a nei, ua molia nei e le malo i moliaga mama e ono, e aofia ai moliaga e lua o le fa’ao’olima i le tulaga tolu, fa’atupu vevesi i nofoaga faitele; umia o se a’upega fa’asaina; umia o se a’upega e aunoa ma sona laisene; ma le moliaga o le fa’aleaga meatotino i le tulaga lua.

E ui o le aso 19 Oketopa 2014 na tula’i mai ai lenei fa’alavelave, o le vaiaso nei na fa’atoa faila ai e le malo moliaga fa’asaga i le susuga ia Det. Ioane Paselio, ina ua mae’a su’esu’ega sa faia e tusa ai o lenei mataupu, atoa ai ma le taumafai e fesiligia molimau sa i ai i le taimi tonu na tula’i mai ai le fa’alavelave.

Pe tusa o le itula e 3:04 i le vaveao o le aso 19 Oketopa na tula’i mai ai se vevesi i le Evelani, lea na a’afia ai ali’i leoleo e to’alua ia Geoffrey Tagaloa ma Det. Paselio e pei ona taua e molimau i leoleo. Sa ofu savili ali’i leoleo ia e to’alua i le taimi na tula’i mai ai lenei fa’alavelave.

Na taunu’u leoleo i le vaega na tula’i mai ai le fa’alavelave, ma latou vaaia ai le ta’avale a le Vaega ‘Vice and Narcotics’ a le ofisa o leoleo, o lo o paka i luma o le fale kalapu, ma le ali’i leoleo ua molia o lo o tu ai i luma o le ta’avale, ae o le ali’i leoleo ia Tagaloa o lo o alu i luga ma toe sau i lalo o le fasitepu o le fale kalapu.

O isi fo’i vaaiga sa molimauina e leoleo i le taimi na latou taunu’u ai, o vaega o se tioata sa ta’e o lo o paepae i luma o le fale kalapu, ma se vaega o ni tagata se to’atele o lo o tumu tumu mai i le isi itu o le fale kalapu, ma maua ai loa le avanoa o leoleo e fesiligia ai ni isi o molimau e tusa ai o le mea sa tupu.

Na taua e molimau i leoleo e fa’apea, o le vevesi na mafua mai i le taimi o le a tapuni ai lava le fale kalapu, ina ua palauvale le ali’i leoleo o Tagaloa aga’i i se tama’ita’i faigaluega a le fale kalapu o lo o pisi i le tapenaina o totonu o le fale kalapu ma alu atu ai loa le Leoleo Faitoto’a o le fale kalapu ma fai ia Tagaloa e le tatau ona ia palauvale i le teine faigaluega, ae fa’afuase’i ai ona oso fa’alava atu le ua molia ma una’i ese le Leoleo Faitoto’a, soso’o ai loa ma lona tu’iina o ia e pei ona taua i fa’amaumauga a le fa’amasinoga.

Na taua e molimau na fesiligia e leoleo lo latou iloaina o le taimi na palauvale ai Tagaloa, atoa ai ma le taimi na fa’alavelave atu ai Paselio ma lona ita tele, ma ia tu’iina ai loa le Leoleo Faitoto’a sa taumafai e fa’ato’a filemu Tagaloa ina ua palauvale.

Na taua e le isi molimau i leoleo e fa’apea, e le gata na tu’i e le ua molia le Leoleo Faitoto’a, ae sa ia tu’iina fo’i le uso o le Leoleo Faitoto’a ina ua taumafai o ia e taofi le ua molia mai lana gaioiga sa faia.

Ina ua uma ona tu’i e le ua molia le Leoleo Faitoto’a e pei ona taua e molimau i leoleo, sa ia savali ai loa i fafo ma le fale kalapu ma ia tu’iina le fa’amalama ma ta’e ai, sosoo ai ma lona savali aga’i i le ta’avale ma aumai ai se laau ma taumafai e toe aga’i atu i le vaega sa tula’i mai ai le vevesi.

Na taua e isi molimau i leoleo e fa’apea, sa latou vaaia le ali’i leoleo ua molia o savali aga’i i lana ta’avale ma aumai ai se fana, ona ia ta’i lea o le fana aga’i i le vaega na tula’i mai ai le fa’alavelave, sa ia alaga fo’i i luga o le a ia fanaina se tagata.

Na taua e le Leoleo Faitoto’a i leoleo, ina ua uma ona tu’i e le ua molia o ia, sa savali aga’i i lana ta’avale ma aumai se fana, ona ta’i atu lea ia te ia ma fai mai o le a ia fanaina o ia.

Na taua i fa’amaumauga a le fa’amasinoga e fa’apea, e le gata e $800 le tupe e toe fa’alelei ai le tioata sa leaga, ae leai fo’i se laisene a le ali’i leoleo ua molia na te umia ai se fana i le teritori.