Ads by Google Ads by Google

Loka e Leoleo i le faaoolima i lona to’alua ae maua ai fualaau faasaina


[ata: SN]
ausage@samoanews.com

Pago Pago, AMERIKA SAMOA -

 

O le ali’i lea na pu’e faa pagota e Leoleo i le masina na te’a nei ona o tu’uaiga i lona faaoolima lea i lona to’alua, ua molia nei o ia i le moliaga mamafa o le umia faasolitulafono o vaega o le pauta faasaina o le aisa.

 

Na musu Setu Tesimale e talanoa i Leoleo e tusa ai o fualaau faasaina na maua ia te ia, ina ua fesiligia ma suesue o ia e Leoleo e uiga i lenei mataupu. 

 

O le masina lava fo’i na te’a nei na tula’i ai loa Tesimale i luma o le Fa’amasinoga Faaitumalo mo lana ulua’i iloiloga. Ua molia nei Tesimale i le moliaga o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000, poo le faasala foi i faasalaga uma ia e lua. 

 

O lo o tu’uaia fo’i o ia i le faaoolima i le tulaga tolu faapea ai ma le faatupu vevesi i totonu o lona aiga, o le vaega A lea o solitulafono mama, lea e mafai ona faasala ai se tasi i le toese mo le umi e oo atu i le tasi le tausaga, pe faasala foi i le salatupe e le silia i le $1,000, poo le faasala foi i faasalaga uma ia e lua.

 

E $5,000 lea ua faatulaga e le Faamasinoga Faaitumalo e tatala ai le ua molia i tua. Na teena e le afioga i le alii Faamasino ia Elvis P. Patea le talosaga na faaulu e ele itu tete’e mo se avanoa e faaitiitia ai le tupe e tatala ai le ua molia i le $2,000. 

 

Afai ae tatala i tua le ua molia, ua fautuaina o ia e le Fa’amasinoga ina ia auai i soo se taimi e valaau ai lana mataupu, ma ia fesootai fo’i ma lana loia i soo se taimi. E le mafai ona ia taumafai e tuua le atunuu pe sola ese foi, sei vagana ua tuuina atu se poloaiga a le Faamasinoga. 

 

E le mafai ona ia taumafai e faafesootai molimau a le malo poo i latou o loo aafia i lenei mataupu, e aofia ai lona to’alua. A ia avea o ia ma tagatanuu e tausisi i tulafono a le malo.

 

TAGI A LE MALO

 

E pei ona taua e le malo i le latou tagi e fa’apea, o le aso 25 o Aperila, 2020 na taunu’u ai i le Ofisa o Leoleo i Tafuna se telefoni mai se Tina i Vailoa, e talosagaina ai se fesoasoani ona o se faalavelave na tula’i mai i lona aiga, i le va o ia ma lona to’alua. O le to’alua o le Tina na aafia, o le susuga lea a Setu Tesimale, le o lo o molia i lenei mataupu.

 

E to’atele Leoleo na tali atu i le valaau ma maua ai le avanoa e feiloa’i ai ma le Tina na talosagaina se fesoasoani, ma amata loa suesuega e faatatau i le faalavelave e pei ona tula’i mai i le va o ia ma lona to’alua. O le mae’a ai ona fesiligia e Leoleo o le Tina na aafia, na auina atu ai loa le ua molia i le Ofisa o Leoleo i Tafuna mo isi suesuega faaopoopo.

 

E pei ona masani i auala e faatino ai galuega a Leoleo, soo se tasi lava e taofia i lalo o le latou vaavaaiga, e tatau lava ona saili lona tino i ni aupega poo ni fualaau fa’asaina, ina ia mautinoa le tulaga saogalemu o Leoleo faapea ai le tagata ua taofia. 

 

Ina ua saili e Leoleo le tino o le ua molia, na latou maua i ai se malo i le taga pito i tua o lona laei sa faia. Na fesili Leoleo i le alii ua molia poo le a le mea o lo o i totonu o le taga o lona ofu, na lulu le ulu o le ua molia ma tali atu i Leoleo, “ou te le iloaina”.

 

Ina ua saili e Leoleo le tagao o le laei a le ua molia, na maua i ai se paipa tioata e masani ona fa’aaoga e ula ai le pauta faasaina o le aisa. I totonu o le paipa tioata, o lo o i ai ni nai vaega o le pauta paepae. Na faia se suega i le pauta paepae ma faamaonia ai, o vaega ia o le pauta faasaina o le aisa.

 

Na taua e le malo e fa’apea, ao uu e le Leoleo le paipa tioata ina ua faatoa mae’a lava ona aveese mai i le taga o le laei a le ua molia, na faafuase’i ona aapa atu le ua molia ma aveese mai le paipa tioata mai le aao o le Leoleo ma taumafai e faaleaga, o le mafua’aga lena na ta’e ai le pito o le paipa tioata, e pei ona taua e le malo i le latou tagi.

 

Ina ua mae’a ona faailoa aia tatau faaletulafono o le alii ua molia, na ia faailoa ai i Leoleo, e le mana’o e fai sana faamatalaga e faatatau i le paipa tioata na maua ia te ia. Pau lana faamatalaga na fai i Leoleo, sa ia faatoese e tusa ai o lana gaioiga sa faia i lona to’alua, lea ua mafua ai ona loka o ia.

 

ULUA’I ILOILOIGA

 

I le taimi na tula’i ai le ua moila mo le taimi muamua, na ia faailoa ai i le Faamasinoga lona mana’o e fa’ataunu’u lana ulua’i iloiloga.

 

I le taimi o le ulua’i iloiloga, e to’atasi le molimau na valaau e le malo mo le latou itu, o le alii Leoleo ia Lt. Abel Penitusi, o ia fo’i lea na autu i ai le suesueina o lenei mataupu.

 

Na taua e Lt. Penitusi, o le paipa tioata lea na maua i le tino o le ua molia, na mafai ona faia i ai se suega faapitoa mo vailaau oona, ma faamaonia ai, o le pauta paepae sa i ai i totonu, o le vaega lea o le pauta faasaina o le aisa.

 

Na fesili le loia a le alii ua molia ia Stuart i le molimau, pe aisea e su’e ai e Leoleo tino o tagata e taofia i soo se tulafono, poo se faiga masani lava lea a Leoleo ina ia saili ai ni fualaau fa’asaina.

 

Na tali le molimau, e mafua ona saili le tino o le tagata ua taofia i lalo o le vaavaaiga a Leoleo, mo le puipuiga lava o le saogalemu o Leoleo faapea ai le tagata ua taofia, ina ia mautinoa e le o umia e le tagata ua taofia ni aupega poo nisi mea maai e ono aafia ai le soifua o se tagata.

 

Na fia malamalama le alii Loia ia Stuart pe na faapefea ona taumafai le ua molia e faaleaga le paipa ina ua maua e Leoleo. Na taua e le molimau e fa’apea, ao uu e le Leoleo le paipa tioata, na faafuasei ona tago atu le ua molia ma se’i ese mai le paipa tioata mai le lima o le Leoleo ma taumafai e gagau. 

 

O le mae’a ai o le ulua’i iloiloga o lenei mataupu, na finau ai loa le itu a le malo i le Fa’amasinoga ina ia tuu atu loa le mataupu a le ua molia i luma o le Fa’amasinoga Maualuga e faaauau ai ona taualumaga, ona o lea ua manino mau sa latou folasia e lagolago ai lana solitulafono.

 

Na faamalieina le Faamasinoga Faaitumalo i mau na folasia e le malo, ma faia ai loa e le afioga Patea le faaiuga ina ia tuuina atu le mataupu a le ua molia i luma o le Fa’amasinoga Maualuga.

 

O le aso Faraile na te’a na tula’i ai le ua molia i luma o le Faamasinoga Maualuga, ma ia teena ai le tagi a le malo. O le masina o Iuni lea ua fa’atulaga e toe valaau ai lana mataupu.