Ads by Google Ads by Google

Molia se ali’i mai Samoa i le solitulafono o le fasioti tagata pa’i valea


[ata: foa'i]
ausage@samoanews.com

Pago Pago, AMERIKA SAMOA - E 48 tausaga o se ali’i mai Samoa ua molia nei i le solitulafono o le fasioti tagata pa’ivalea, e mafua mai i le fa’alavelave lea na maliu ai se alii i le faaiuga o le vaiaso na te’a nei ina ua aafia lona fatafata i se manu’a e mafua mai i se naifi.

 

O le ali’i ua molia, Tusi Fala ma le ali’i ua maliu, o ni tagata faigaluega uma a le Kamupani o le Titanic Cooperation mai Vaitogi, 

 

O le vaiaso nei lea na tula’i ai Fala i luma o le Fa’amasinoga Faaitumalo mo lana ulua’i iloiloga. E tasi le moliaga ua tu’uaia ai e le malo ia Fala, le moliaga o le fasioti tagata pa’ivalea, o le vaega C lea o solitulafono mamafa, lea e mafai ona fa’asala ai se tasi i le Toese mo le umi e le silia i le 7 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

 

E $20,000 le vaega tupe lea ua fa’atulaga e tatala ai i tua Fala. O le aso Tofi o le vaiaso fou, Me 28th lea ua fa’atulaga e faia ai le ulua’i iloiloga faapitoa o lenei mataupu.

 

TAGI A LE MALO

 

O le te’a laitiiti o le itula e 3:19 i le vaveao o le aso Toona’i na te’a nei, Me 16, na faafesoota’i ai e se alii faigaluega a le Titanic Cooperation le Ofisa o Leoleo i Tafuna mo se fesoasoani, ina ua ia maua atu se isi ali’i o le latou aufaigaluega o lo o maliu mai i luga o le moega i totonu o lona fale.

 

E to’atele Leoleo na tali atu i le valaau ma latou fesiligia ai nisi o tagata faigaluega a le kamupani a le Titanic Cooperation e uiga i lenei mataupu. O le ali’i ua maliu ma le ali’i ua molia, o i laua uma o tagata faigaluega a le kamupani a le Titanic, e pei ona maua e Leoleo i le latou suesuega. 

 

O le faamatalaga la lenei na mafai ona tuuina atu e tagata faigaluga i Leoleo e tusa ai o le fa’alavelave e pei ona tula’i mai.

 

O le afiafi o le aso Faraile, Me 15 i le va o le 4:30 ma le 5:00 i le afiafi, na aga’i atu ai le Pule o le kamupani a le Titanic Cooperation ma ana tama faigaluega e to’alima, e aofia ai le ua molia ma le ali’i ua molia e tala a latou siaki i se tasi o Faleoloa, e ala i le faatauina o a latou pia ma sikaleti. 

 

O le isi to’alua o alii faigaluega na aga’i atu e tali i le valaau mai le Vaega a le Suavai ma le Eletise (ASPA), e fesoasoani lea i le faaleleia o se paipa sa faaletonu. O le isi to’alua e aofia ai le ali’i ua maliu na aga’i atu i le nofoaga o lo o i ai le Laulau Piliati ma ta’aalo ai. O le alii ua molia na toe fo’i i le fale ina ua mae’a ona tala lana siaki.

 

E pei ona maua e Leoleo i le latou suesuega, sa aitalafu e Fala le $20 mai le alii ua maliu i le vaiaso ua tuana’i. Sa i ai la le manatu o le alii ua maliu e tatau ona toe totogi uma atu e Fala lana tupe atoa e $20 pe a maua lana siaki. Ae ina ua maua le siaki a Fala, e na o le $5 na ia toe totogi i le alii ua maliu.

 

O le mae’a ai o le tusa ma le 2 itula talu ona taalo piliaki le ua maliu, na toe fo’i ai loa i le fale e taele ma fai sina meaai. Sa ia taunu’u i le fale ma ia vaaia ai Fala o loo i ai fo’i i le fale, ona ia fai lea ia Fala poo fea lana tupe sa ia aitalafu, ae na tuli ese e Fala le ua maliu ina ua mae’a ona ia tuu atu i ai na o le $5 ma fai i ai e alu ese ma ona luma.

 

E le i alu ese le ua maliu mai luma o Fala ae sa fa’aauau pea ona ia fesiligia Fala e totogi atu lana tupe, ae sa finau fo’i Fala e alu ese ma ona luma. O iina lea na mafua ai loa ona tula’i mai se taugaupu i le va o Fala ma le alii ua maliu ma toeitiiti ai lava pa’i lima i laua, ae na vave ona taofi ina ua oso atu le isi alii faigaluega ma fai i ai e soia le pisa.

 

Na taumafai le ali’i faigaluega e aveese le ua maliu mai le fale, ma fai i ai la te toe fo’i i le Laulau Piliaki la te eva ai. O le taimi fo’i lea na savali ese ai Fala mai le vaega na tau tula’i mai ai le vevesi ma aga’i atu i lona fale, peita’i na toe fo’i mai Fala ma le ita ina ua valaau atu i ai le ua maliu ma faapea atu, “lou mea ai gaoi”.

 

Na toe fo’i mai Fala ma se naifi o loo uu i lona lima ma faalala i le ua o le alii ua maliu ma fai i ai, e toe tautala atu loa ona ia tui ina loa lea o ia i le naifi. Na tula’i mai fo’i le alii ua maliu ma lana fo’i tama’i naifi i lona lima ma faalala i le ua o Fala ma fai i ai, na te tui ina fo’i o ia i le naifi pe afai e toe fai atu sana tala ia te ia. 

 

Na mafai ona vaovao e se alii faigaluega sa i ai i le taimi lea le vevesi na tau tula’i mai i le va o Fala ma le alii ua maliu. 

 

Ae o le taimi na savali atu ai Fala i le pusa aisa e aumai sana faguvai, na faafuase’i ai ona savali atu le ua maliu ma tu’i o ia na ta’e ai lona mata agavale. Na vaaia e Fala le alii ua maliu o loo ia uu se naifi i lona lima, ae o le taimi fo’i lea o loo uu fo’i e Fala se tama’i naifi i lona lima. O le taimi lea na aapa atu ai loa Fala i le sipika sa taatia i ona tafatafa ua uu mai i lona lima, le lima lea o loo ia uu ina ai le naifi ma togi ai loa le ua maliu i le sipika ma la naifi. 

 

Na alu atu le naifi ma tu i le fatafata o le alii ua maliu ma pau ai loa i lalo o le foloa o le fale. O le mae’a ai o le faalavelave, na savali ese ai loa Fala mai le fale ma aga’i atu i totonu o le pasi ma nofonofo ai, seia oo ina alu le pasi ma momoli atu o ia (Fala) i le nofoaga o loo i ai le Fale Piliaki i Iliili ma eva ai seia oo ina tapuni le Fale Piliaki pe tusa o le itula e 2a.m i le vaveao o le aso na sosoo ai, Me 16.

 

Na faalogo le alii ave pasi o faapea se tala a Fala, “O le mea lea e tupu i le tamaititi e fia malosi i le tama matua, talosia ae toe alafa’i mai i le aso fou”.

 

Pe tusa o le itula e 3:00 i le vaveao o le aso na sosoo ai, Me 16, na aga’i atu ai isi alii faigaluega mai le Titanic Cooperation i le fale o loo moe ai le ua maliu ma iloa ai ua maliu o ia. O le taimi lea na logoina ai loa Leoleo mo se fesoasoani.

 

Na taua e se tasi o molimau i Leoleo e fa’apea, ina ua mae’a ona faatino e Fala le solitulafono, na ia taumafai ai loa e ta’ita’i le ua maliu i lona fale ma faataoto o ia i luga o le moega. E ui sa ia vaaia se manu’a i le tino o le alii ua maliu, peita’i sa lei manatu lona mafaufau e matuia tulaga o lona manu’a.

 

Sa alu ma aumai le meaai ma le vai mo le alii ua maliu peita’i sa viga o ia e fia inu i se vai. Sa ia faataoto le alii ua maliu i luga o le moega ma lona manatu atonu o le a moe o ia ma toe ala mai ai i le aso e sosoo ai, peita’i na faateia o ia ina ua vili mai le isi alii o le aufaigaluega ma fai mai ua maliu o ia.

 

O manu’a na aafia ai le alii ua maliu e aofia ai se lavea i lona fatafata, lea na maitauina ai e Leoleo le tele o le toto o lona tino na ma’imau ai.

 

O le taeao lava lea na taunuu ai le tino o le alii na aafia i le Falema’i i Fagaalu, na aumai ai le ripoti mai le Foma’i na siakiina lona tino, ua maliu o ia.