Ads by Google Ads by Google

Tala I Vaifanua


O se suiga matagofie ua va’aia i luma o le Malumalu Tele “O A’u Nei o le Vine Moni!” Ekalesia Metotisi i Nuuuli. Matagofie le galuega na feagai ai ma le susuga le Fa’afeagaiga Rev. Sailiai & Faletua Tava’e Tuma’ai ma le pa’ia lasilasi o le Ekalesia i Nuuuli lava. Fa’amalo le galulue i le tino o le Keriso o lana ekalesia lea i lona tino mai. [ata: Leua Aiono Frost]

Pago Pago, AMERIKA SAMOA

 

MALUMALU METOTISI - MAEA GALUEGA TOE FA’ALELEIA

 

Afai ae toe a’e mai le Ekalesia Metotisi i Nuuuli mo a latou sauniga masani e fa’atautaia i aso Sa ta’itasi, o le a amatalia nei sauniga uma i se Malumalu ua mae’a toe fa’alautele ma fa’aleleia atili aua sauniga osi i le Atua.

 

O le aso Faraile na te’a nei sa fa’atasia ai le Ekaslesia i Nuuuli i le latou Malumalu “O A’u Nei o le Vine Moni” ua mae’a toe fa’alautele ma fa’aleleia mo a latou sauniga. O le galuega na fa’atino mo le 17 vaiaso talu mai Fepuari 17, se’ia pa’ia mai Me 28, 2020.

 

O le galuega na nafa ma le Agaiotupu Tuiava Iliili ma le falefa o le Aiga Salemalama fa’apea fo’i nisi sa avanoa o le malosi o le Ekalesia i Nuuuli lava.

 

O le latou fa’atasiga sa fa’aitiiti lava ina ia usita’ia fo’i le fa’asa o lo’o fa’amamaluina nei, ae o le fa’afetai a le Tama o le Ekalesia, Rev. Sailiai Tuma’ai, ina ia mae’a lelei fo’i le galuega na feagai ma le Ekalesia a’o le’i toe amatalia sauniga tetele a i latou.

 

O le sauniga e tatala aloa’ia ai le fa’amoemoe na ootia ai lava e le faletua, le tina o le galuega i Nuuuli, Tava’e Tuma’ai le lipine ma fa’apea lava ona ta’ita’ia e le tama lea sauniga mamalu. O le tau o le galuega atoa na toe fa’aleleia ma fa’alautele ai le malumalu lea ua suia nei lau taga’i mai i lona lumafale, ua fa’ailoa mai e $61,000.

 

WELLS-PESE - TOGISILIA KOSI PISINISI ASCC FA’AU’U 2020

 

O le toega lava o tapenaga a le Vaega o Kosi Fa’apisinisi a le Kolisi Tu’ufa’atasi e le’i fa’atinoina i le fa’aiuga o lenei tausaga aoga mo le fanau faai’uaso ma fa’ailoga maualuluga fa’apisinisi, o le fa’alauiloa lea o le sui ua avea le tulaga o le togisilia.

 

O LaPaloma Fola’alela Wells-Pese na soifua a’e i Nuuuli ma Ta’u Manu’a. Na aoaoina o ia i lona la’ititi mai i le Manulele Tausala Elementary i Nuuuli, ma o le alo e fa’asino ia Matamatapese Ioasa Pese ma Ianeta Wells Pese.

 

Na fa’aauau a’oa’oga i le Tafuna High School ma fa’au’u mai ai ma ulufale ai loa i le tatou Kolisi Tuufa’atasi ma tau’avea ai ana kosi fa’apisinisi ae fa’aautu ana sailiga i matata fa’a-Tausitusi ma Su’etusi.

 

O ia o se tasi o talavou sogasoga mai le Ekalesia Metotisi i Nuuuli lava lea o lo’o galulue fo’i i ai nai ona matua ma le aiga atoa i Nuuuli.

 

O lana fa’afetai tele i ona matua fa’aleagaga Rev. Sailiai ma Tavae Tuma’ai i le tele o talosaga molia mo i latou uma le fanau aoga a le Ekalesia ma le afio’aga. “Lagona le mafanafana i taumafaiga e sailia le atamai, ona o le fa’amalosi fa’ale-agaga e tumau i le sailiga o le atamai lautele. Fa’afetai tele mo talosaga molia i aso uma mo i matou ia manuia le taumafai. Fa’apea fo’i nai ou matua ma le aiga atoa i Nuuuli ma le Manuatele. O a outou fautuaga, tima’iga ma talosaga ua a’e malo ai faiva i le sailiga o le poto lautele.”

 

O lo ua mae’a nei ona fa’atulaga le fa’aauau atu o sailiga ma suesuega mo faailoga maualuluga o LaPaloma Wells-Pese i le Iunivesite i Dixie State mo lona fa’ailoga o le Bachelor in Accounting.

 

O lana fa’afetai mulimuli o le vasega o latou faia’oga uma i le Kolisi Tuufa’atasi ae maise ai le fa’atina o le Vaega o Kosi Fa’apisinisi Dr Faofua Va’apuu Fa’atoafe.

 

“Mom Dr Fa’ato’afe, e le galo lou naunauta’i ia matou iloa lelei fa’atino tiute tau faipisinisi, lou naunauta’i e fa’asoa mai uiga, tu ma aga e ao ina matou faia e fa’atau atu ai oloa o le a matou sauni e fa’atau atu mo fefa’ataua’iga i le lumana’i o matou taumafaiga uma nei. E le galo a’oa’oga, ae maise o lou naunau ia matou ola manuia i le lumana’i ma avea i matou e toomaga i ai le Malo, i sailiga o ni faipisinisi e lauolaola e tautua ma faigaluega i ai nisi e to’atele. Ia manuia oe ona o lou agaga i lou tofi o le faia’oga i so’o se mea i o matou olaga taumafai.”

 

 

FUAFUA VAEGA LUA TUFATUAF SIAKI STIMULUS $4.8 MILIONA

 

Fa’ailoa e le teutupe a le Malo, Ueligitone Tonumaipe’a, o le a fa’aoo atu i le falemeli i le aso Tofi, Iuni 4 ia saiki mo le vaega lona lua o stimulus check mo i latou faila lafoga ma e mafai ona maua i pusemeli i le aso Faraile, Iuni 5th. 

 

O le vaega muamua o siaki ua mae’a tufatufaina i pusa meli o le masina ua te’a ia Me. 

O le vaega lona lua o le stimulus checks faitauina e to’a 2,800 i latou ua fa’atulaga ai le $4.8miliona e fa’aalu ai i nei siaki stimulus. Pe afai ua e lagona e tatau ona maua sau siaki stimulus ae ua le maua i le meli, e tatau ona e oo ane ina ia fesiligia le Ofisa o Lafoga mo le mafuaga o le le maua o sau siaki.

 

Pe afai ua le maua fo’i lau siaki i lau pusa meli, e mafai ona e oo ane i le Ofisa o le Disbursing, telefoni 633-4155 ma fa’afesili pe le’i se atu i se pusa meli a se tasi lau siaki, ma ua fa’ao’o ane i lea ofisa mo le toe taua’ao sa’o ane ia te oe.

 

Afai ae i ai se tasi e maua fa’alua ana siaki o le Stimulus, fa’amolemole e ao ina e toe fa’afo’i mai le isi siaki lona lua, aua e maua ane lava ua fa’alua ona e mauaina lenei penefiti pe a oo ina e talaina i le faletupe.

 

Mo i latou uma lava e maua penefiti o le Saogalemu, e ao ia i latou ona fa’ao’o ane latou tala o tupe maua mai le saogalemu fa’aletausaga, ma latou ID i le Ofisa o lafoga mo se latou fesoasoani mo outou uma na, tusa lava pe le o maua sau lafoga toe totogia mai.

 

Ma o le aso Faraile, Iuni 5, tufatufaina ai le isi vaega # 11 mo tax refund checks i lona aofaiga $2 miliona mo i latou sa faia lafoga i le va o Mati 4, 2020 se’ia oo ia Aperila 03, 2020. 

 

O lo ua nofo saunia fo’i faletupe i totonu o le tatou malo ina ia latou tali atu i le tautuaina o le mamalu lautele o le atunuu o le a gasolo mai mo le latou tautua, e talaina a latou siaki stimulus ma siaki lafoga.

 

TOE VALA’AUINA TAUSIMA’I - FA’AUAU LE GALUEGA UA MANA’OMIA

 

Na talo se fonotaga fa’apitoa a Tausima’i uma i le atunuu ina ia auai, ona o le manomia pea o le tautua e le Matagaluega o le Soifua Maloloina ma le Falema’i o le LBJ.

 

O le tama’ita’i fa’atonu o Tausima’i i le atunuu, Simamao Tuatoo ua ia saunoa mai, “E le’i lelei a’ia’i ona fa’aauala fa’asalalauga fa’alaua’itele mo nisi o le mamalu lautele o lo’o i ai tomai fa’atausima’i, ina ia toe fo’i mai e fa’atalanoa le avanoa e toe faigaluega ai, i lenei vaitau o le mana’omia tele o le tatou matafaioi.”

Peit’ai e fa’afetaia lava sa i ai nisi na pa’au mai, ma ua fa’atalanoa fo’i, ina ia toe saunia lelei le ala o fa’asalalauga ia oo atu i a i latou uma o agava’a i lenei matata, e oo mai i le Ofisa autu o Tausima’i mo se talanoaga ma lou sui.

 

I le taimi nei i le falema’i LBJ ua fa’afaigaluegaina ai le to’a 80 o tausima’i, ae 150 moega o gasegase tausia o lo’o ua fa’atulaga ai. O lea numera o tausima’i ua le talafeagai mo le 150 gasegase pe a oo ina tutumu uma potu taofia.

 

“Ua mana’omia le isi 80 o tausima’i mo le tausiga lava o tatou gasegase tumau nei, ma e leai la se isi mea e mafai ai e le tatou Asosi Tausima’i ona fa’auia mai ai le isi 80 tausima’i o mana’omia,” os se saunoaga lea a Tuatoo.

 

Ua ia fa’ailoa, “O tausima’i uma lava e le o auai i le falema’i ua fa’atulaga ina ia latou fesoasoani i le galuega i totonu of Potu Talavai eseese ma potu taofia mo gasegase.”