Ads by Google Ads by Google

Molia se Tina i lona fa’aoolima i se Tina matua


[ata: SN]
ausage@samoanews.com

Pago Pago, AMERIKA SAMOA - Ua taofia nei i le Toese i Tafuna se Tina talavou ona o tu’uaiga i lona faia o sauaga faasaga i lana tama e 9 tausaga le matua, atoa ai ma lona faaoolima i se Tina matua i lona ripotia o sauaga sa ia faia i lana tama i le Ofisa o Leoleo.

 

O le masina o Iulai o le tausaga e 2018 na tula’i mai ai lenei fa’alavelave, peita’i o le vaiaso na te’a nei na faatoa pu’e faapagota ai e Leoleo le Tina ua molia.

 

E pei ona taua e le malo i le latou tagi e fa’apea, o le mataupu e fa’atatau i sauaga na faia i le tamaititi e 9 tausaga na tula’i mai i le aso 9 o Iulai 2018, ae o le aso 20 o Iulai na tula’i mai ai le fa’alavelave e pei ona tu’uaia ai e le malo le ua molia i lona fa’aoolima lea i le Tina matua na a’afia.

 

Talu ai tulaga i fesuiaiga o Loia latou te tauaveina mataupu tau solitulafono mamafa i le Ofisa o le Loia Sili, o le mafua’aga lena na tuai ai ona tuuina atu le poloaiga e pu’e faapagota ai le ua molia i lenei mataupu. 

 

SAUAGA FAASAGA I FANAU

 

O le mataupu e faatatau i sauaga na faia e le ua molia faasaga i lana tama pe a ma le 9 tausaga le matua, na tofu atu i le Ofisa o Leoleo i Tafuna ina ua faafesoota’i e se Tina matua Leoleo mo se fesoasoani, ona o se tamaitiiti laititi na matua manu’a lona tino ina ua faia i ai e lona Tina sauaga ia te ia.

 

Na taua e le malo e faapea, o le aso 9 o Iulai 2018 na tula’i mai ai lenei fa’alavelave, ina ua faatonu e le ua molia lana tama e 9 tausaga le matua e nonofo atu ma nai ona tei laiti i le fale, ae se’i alu i lana feau ona toe vave mai ai lea. 

 

E fo’i mai le Tina o lo o tafafao atu lana fanau laiti i fafo o le fale, e le o lelei ona vaavaai e lana tama matua. O le ita tele a le ua molia na ia faaaogaina ai loa le ‘au o le pulumu ma sasa ai le tino o lana tama, ma unaoa ai vaega o lona tino. 

 

Na aga’i atu Leoleo ma auina atu le ua molia i le Ofisa i Tafuna mo le faatalatalanoaina o le mataupu e faatatau i tu’uaiga o sauaga sa ia faia i lana tama. Na faailoa e Leoleo i le ua molia i le aso lea, e mafai lava ona ia tula’i ma aga’i ese atu ma le Ofisa o Leoleo pe afai ae loto i ai, e le o ai fo’i o ia i lalo o le vaavaaiga a Leoleo.

 

I lea faatalatalanoaga, na ta’utino ai le ua molia i Leoleo, o lona ita na mafua ai ona ia faaoolima i lana tama. Sa ia ioeina lona fa’aaoga o le pulumu e fa’aoo ai manu’a i le tino o lana tama.

 

E pei ona taua e le malo i le latou tagi e fa’apea, o le Tina matua na ia logoina Leoleo e faatatau i lenei mataupu e le mamao lava lona fale ma le fale a le ua molia. E i ai le talitonuga, o le ita tele o le ua molia i le Tina matua ina ua ia logoina le Ofisa o Leoleo e tusa ai o sauaga na ia faia faasaga i lana tama, na aga’i atu ai loa o ia ma faaoolima i lea Tina matua.

 

FAAOOLIMA I LE TINA MATUA

 

O le aso 20 o Iulai, tusa lea ua silia i le vaiaso atoa talu ona tuana’i le fa’alavelave na faia ai e le ua molia sauaga i lana tama, ae tula’i mai ai loa le fa’alavelave e pei ona faaoolima ai le ua molia i le Tina matua na aafia.

Na talosagaina e le Tina matua na aafia se fesoasoani a Leoleo, ina ua mae’a ona faaoolima le ua molia ia te ia. Na taunu’u Leoleo ma latou molimauina ai le Tina matua na aafia, o lo o tagi i totonu o lona fale, ma ona foliga o loo fulafula ma maosiosia uma. O lo o gatete fo’i lona tino i le fefe a o ia taumafai e faamatala i Leoleo le faalavelave sa tula’i mai. 

 

Na taua e le Tina matua na aafia i Leoleo e fa’apea, o ia sa taele i totonu o le Fale Taele o loo tu i fafo o lona fale. A o faamalu le Tina matua, na faafuase’i ona ulufale atu i totonu o le fale le ua molia ma fesili atu ia te ia, pe aisea na ia taua ai i Leoleo le faalavelave e pei ona ia sauaina ai lana tama. 

 

E le i toe fa’atali le ua molia ae na ia faaoolima loa i le Tina matua e ala i lona ta tu’i o ona foliga ma futi solo lona ulu. Sa ia tago fo’i ua uu le ulu o le Tina matua ae ta aga’i i le puipui o le Fale Taele, ma fa’aauau ai lava lana gaioiga mo ni mai minute seia oo loa i le taimi na ia titina ai le ua o le Tina matua pe tusa ma le 10 minute le umi.

 

Na taua e le Tina matua i Leoleo lona tafiti solo ma alaga i le fia maua o se fesoasoani, a o fa’aauau pea ona faaoolima le ua molia ia te ia. Sa i ai le taimi na faapea atu ai le ua molia i le Tina matua, “ua e vaavaai i le mea o le a ou faia ia te oe”.

 

O le vaiaso na te’a nei na tula’i ai le ua molia i luma o le Fa’amasinoga Faaitumalo mo lana ulua’i tula’i. O le ali’i Loia Fautua lagolago ia Bob Stuart o lo o tula’i mo ia, ae o le tama’ita’i Loia Sili lagolago ia Laura Garvey o lo o tula’i mo le malo.

 

O loo molia e le malo le ua molia i tagi e lua. I le tagi muamua, o lo o tu’uaia o ia i le faia o sauaga i fanau faapea ai ma le fa’aoolima i le tulaga lua, o le vaega D lea o solitulafono mamafa, e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, pe faasala fo’i i faasalaga uma ia e lua. 

 

I le tali lona lua, o lo o tu’uaia ai e le malo le ua molia i le moliaga o le faaoolima i le tulaga lua, o le vaega D lea o soltulafono mamafa, e mafai ona faasala ai se tasi i le Toese mo le umi e le silia i le 5 tausaga, pe fa’asala foi i le salatupe e le siliai le $5,000, poo le faasala fo’i i faasalaga uma ia e lua; faatasi ai ma le moliaga o le soli fua o le fanua o le isi tagata, o le vaega A lea o solitulafono mama, lea e mafai ona faasala ai se tasi i le Toese mo le umi e le silia i le tasi le tausaga, pe fa’asala foi i le salatupe e le silia i le $1,000, poo le faasala fo’i i faasalaga uma ia e lua.

 

E $25,000 le vaega tupe lea ua faatulaga e tatala ai i tua le ua molia.

 

I le taimi o le ulua’i tula’i a le ua molia, sa ia faailoa ai i le Fa’amasinoga lona mana’o e fa’ataunu’u lana ulua’i iloiloga, ina ia mafai ai ona faalogo i mau o le a folasia e le malo faasaga i lana mataupu.

 

ULUA’I ILOILOGA

 

E toatasi le molimau na valaau e le malo i le taimi o le ulua’i iloiloga o lenei mataupu i le vaiaso na te’a nei, o le tama’ita’i Leoleo Satini lea ia Sgt. Devon Mata’u, o ia fo’i lea na faauluulu i ai le suesueina o lenei mataupu.

 

I le molimau a le Tama’ita’i Leoleo, sa ia taua ai e fa’apea, o le mafua’aga na ala ai ona faatino e le ua molia le solitulafono o le faaoolima i le Tina matua na aafia, o lona ita lea ina ua ta’u e le Tina matua i Leoleo sauaga sa ia faia i lana tama. 

 

Na taua atili fo’i e le Leoleo i lana molimau e fa’apea, e leai se faatanaga na tuuina atu i le ua molia e ulufale ai i totonu o le Fale Taele a o fa’amalu le Tina matua, peita’i, o lona ita na mafua ai ona ia ulufale faamalosi i totonu.

 

Na fesili Stuart i le molimau, pe i ai se sootaga a le ua molia ma le Tina matua na aafia, na tali le molimau na te le iloaina. Na toe fesili Stuart i le molimau, pe na te iloaina o le Tina matua na aafia, o le aunty lea o le to’alua a le ua molia. Na toe tali fo’i le molimau, na te le iloaina lea tulaga.

 

Na teena e le ua molia moliaga faasaga ia te ia ina ua tula’i i luma o le Fa’amasinoga Maualuga i le vaiaso nei. O le aso 20 o Iulai lea ua fa’atulaga e toe valaau ai lana mataupu i luma o le Fa’amasinoga Maualuga.