Ads by Google Ads by Google

Olaga Le Tumau

Vaega: 140

 

Taeao manuia i le mamalu o le atunu’u ae maise o i latou o lo’o fiafia e tulituliloaina la tatou tala, fa’atalofa atu ma fa’afeiloa’i atu i lou alafa’i mai i le manuia i lenei aso aso fou, ae alo maia, o le a toe fa’aauau atu la tatou tala mo lenei aso.

 

Na fa’apea mafaufauga o Keisi, mata ua iloa e Pesi ua mafai ona ou pupula, ma te ua na iloa ua ou iloa ona foliga. Pe tatau ea ona ou ta’uina ia Pesi ua mafai ona ou pupula ma ou iloa atu ia.

 

“Keisi, ua ou fiu e vala’au mai ae le talia le telefoni, ae na ou sau e avatu lo’u ofu, ua galo i totonu o le kolisi i le potu lea sa ou nofo ai. Na i ai lo’u manatu ua toe ave oe i le falema’i, a’o lea, ua tia’i na oe, ae e tatau fo’i ona ou alu ‘ese ma ni a’u meaalofa, e sa’o a’u Keisi.”

 

Fai mai, e fai lava tala a Pesi ma savali atu i le itu o lo’o i ai le kolosi o lo’o tautau ai ‘ofu o Keisi, ua u’u mai le sikafu lea na mana’o lava i ai, ma fa’asino ane i a Keisi. O le taimi lea, ua fa’apea manatu o Keisi, “Pesi, ave uma mea e te mana’o ai, ae ave’ese a’u mai totonu o le fale lenei.”

 

Fai mai, a’o fa’agasolo le asiasiga a Pesi i lavalava ma mea uma a Keisi, o le taimi lea, o lo’o tagi mai Keisi mai totonu o lona nofoaga pogisa, “Pesi, fesoasoani mai i a te a’u, fesoasoani mai.” Na lagona ane e Pesi le tala a Keisi, o la na liliu ane ai ma fesili ia Keisi, “O le a?” Ae ua le mafai e Keisi ona toe tautala ane.

 

“Keisi, ua ou fefe, ua ou le iloa pe ua e iloa tautala pe leai, ae sili pe a ou alu ‘ese vave loa.” O le taimi lea, o lo’o fa’ataitaio ane lava Keisi, “Pesi, ‘aua e te alu, fa’atali mai fa’amolemole.”

 

Na toe liliu ane Pesi, ua toe fu’e i totonu o lana ‘ato isi lavalava o Keisi, ua pei lava o ana ia meatotino. “Keisi, ou te iloa o lo’o tele lava isi ou lavalava, ia malie maia, o lea ave isi mea ia ma a’u, ua e fa’alogo mai.

 

“Pesi, ‘aua le tu’ua a’u, ave a’u fa’amolemole.” Fai mai e tagi ane lava mai totonu o lona nofoaga pogisa, ae fu’e lava Pesi latou e le ano ane i ai. Na avea le naunau atu o Keisi, ina ia iloa ane e Pesi ia ma ala na sa’a solo ai ona vae, ua a’apa a’e i luga lona lima e foliga mai o lo’o tau su’e se mea e mapu i ai. “Pesi, fesoasoani mai, fesoasoani mai fa’amolemole.”

 

E fai pea…