Vaega: 67

Taeao manuia i lou maleifua mai i fanauga lelei o lenei aso fou, e ao ai ona o tatou fa’afo’i le vi’iga ma le fa’amanu i le Atua Soifua, aua o ia o le Mataisau o mea uma lava, ia foi atu pea le vi’iga i Lana Afio e fa’avavau, fa’avavau lava, amene.”

Na finau atu nei Loleni, ae tali mai lava Lulu, “Loleni, ou te le mo’omia lau loia e tu mo a’u, o le a ou ala e su’e sa’u loia, ma afai ae maua, ou te suina oe ma ave oe i le fa’amasinoga.”

Na liliu ane nei Loleni, “Lulu fai le mea o lo’o e mana’o ai, ae a iloa e le Fa’amasinoga, o oe e ‘ai mea lele, e te tago fo’i i le fuala’au fa’asaina ma e alu i ta’aga a tagata ai pia, o lona uiga e leai se mea e te maua, ma le isi itu, e le mafai ona e toe mauaina lau tama, pe afai o le mea lea ua e mana’o e fai.”

Fai mai e fai lava finauga nei e Lulu ma Loleni, ae o o’o fa’alogologo lelei Keisi, fai mai, na o’o ifo i le loto o Keisi le alofa i lona uso, ona ua manatu Keisi e le tatai ona mafaia e Lulu ia le finau a Loleni. E pei ona fai e Lulu i a te ia. Ua toe manatu ai nei e Keisi le la finauga ma lona uso la’ititi, ina ua to Lulu, na finau ai Keisi ia Lulu, e tu’u ane lana tama n ate tausi, peita’i, e le i maluelue ane le loto o Lulu, na mana’o lava Lulu e tausi lava e ia lana tama.

O le isi fo’i lea itu na fa’amanatu e Keisi ia Lulu, ona o Lulu e ulavale, ma ua alu i ta’iga a tagata ‘ai mea lele, ma tagata inu ‘ava. Ae na finau ane lava Lulu, e mafai lava e ia ona tausi lana tama. Ma ua fa’apea lava ona fai, tiga fo’i e alofa o Keisi i lona uso ae maise o lana tama lea ua fanau mai, ae sa le i taofia ai le mana’o o Keisi, ia suia ma ia fo’i Lulu i se tulaga lelei ma mautu.

O lea la ua toe fa’amanatu nei e Lulu le mea lea ina ua finau nei ma le to’alua o Keisi e uiga i ana tupe lea na tu’u e lona tama mo ia. Na toe fa’alogo a’e nei Keisi o fa’apea le tala a lona uso, “Loleni, o afea la e maua ai la’u tupe.?” Na tali Loleni, “O nei, a lea o le a ou tusiina atu le siaki mo oe. “ Fai mai na lagona lelei lava e Keisi le osiosi o le peni, o lona uiga o lea ua saini e Loleni le siaki mo Lulu.

Na ona uma lava ona saini o le siaki fa’apea ane ma Lulu, “Loleni, tusi sa’o mai le aofaiga atoa o la’u siaki, ‘aua ne i ai se sene e misi, aua ou te iloa lelei lava le aofa’iga o le tupe e tatau ona ou maua.”

E faia pea..