[E toe fa’atalofa atu i paaga masani a le tatou polokalame i lenei fo’i vaiaso, malo le soifua laulelei, malo fo’i le onosa’i, ae o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua tuu atu ai e le toeaina o Feo le tupe ma le fa’atau i le lima o Lami e alu ma ia i lona aiga.]

Na tu le tamaititi o Lami mo ni nai sekone ma fa’atau pupula i le toeaina, ao tuu mai e le toeaina Leoleopo le tupe ma le fa’atau i lona lima. Na vaaia e le toeaina o Feo le maligi o loimata o le tamaititi au tu tu e le tago i le fa’atau ma le tupe, ona tago atu loa lea o le toeaina ua uu mai le lima o le tamaititi ma fa’asaofa’i i luga o le nofoa ma fai atu i ai, “vaai oe Lami, ou te iloa le manatu lena ua oso ane i lou loto, ae faalogo lelei mai oe, tago i le tupe lea e te alu ma oe i le tou aiga, tuu le tupe i le lima o lou tina ma fai i ai, o le tupe sa maua i lau faatauga atigi fagu, ae ole fa’atau lea, fai i ai o le meaai sa fa’atau i le isi tupe sa maua i lau taega atigi fagu, aua lava e te ta’uina i ai se tupe sa avatu ia te a’u, ua e fa’alogo mai,” o le fesili atu lea a le toeaina ma tago atu lava ua tuu le $30 i le taga o le ofu vae pupu’u a le tamaititi o Lami o loo fai, ona ia toe fai atu lea i ai, “sau loa ina alu i le fale, a e usu mai taeao, sau sa’o i i e inu se ta iputi ona amata ai fo’i lea o lau galuega, ua e iloa,” na luelue le ulu o le tamaititi, ma tago atu loa ua uu mai le taga pepa fa’atau o loo taatia i luga o le nofoa, ma savali ese loa mai le nofoaga o loo i ai le toeaina o Feo.

Talu ai o le tamaititi o Lami e le masani i pasi e o aga’i i Palisi, o lea na manatu ai o ia e sili pe a savali i le fale, aua e le mamao tele fo’i Palisi ma le nofoaga lea o loo i ai.

Sei tatou liliu atu i le aiga o le tamaititi o Lami ma le tulaga lea ua latou i ai, ina ua fiu e saili le tamaititi o Lami. E ta loa le 5:00 i le afiafi ae taunuu loa fo’i ma le tamaloa o Tomasi i le fale ua manava mai galuega o le aso, ae taunuu atu o loo faafesaga’i to’alua lava lona to’alua ma Sei lona tuafafine, o loo talanoa i le tamaititi o Lami poo fea ua alu i ai i le aso atoa. E na o le misi alofa o le aiga poo fea ua alu i ai le tamaititi, ae o le mafaufau o Sei, ua masalosalo le fafine, pei lava lana tama ua alu e saili galuega, ona o lea sa talanoa atu ia te ia i le isi po, e fia alu e saili sana galuega e tausi ai lo la aiga, ma fesoasoani ai i le aiga o Tomasi lea o loo tausia i laua. Ua saofa’i le tamaloa o Tamasi i lalo ma inu lana ipu ti vevela lea ua ligi ane e lana fanau, ma to manatu poo fea sa vaega o le taulaga o le a saili aga’i i ai le tamaititi o Lami, e lei umi ona talanoa le aiga, ae vaaia loa le fotu a’i atu o le tamaitiiti o Lami i luma o le fale ma se fa’atau o loo uu i lona lima. Na ona taunuu lava o le tamaititi i le vaega tonu o loo talanoa mai ai lona aiga ma le latou aiga, ona ia tuu atu loa lea o le fa’atau i lona tina ma le fa’aupuga, “Mama, vaai le fa’atau lea e fai ai sa tatou meaai o le afiafi ...”