Ads by Google Ads by Google

Pasia e le Kovana $10,000 mo ni fa’amoemoega se lua

Ua faalauiloa aloaia e le afioga i le kovana sili i sana tusi i taitai o le Fono i le vaiaso nei lona sainia o le pili lea sa latou pasia, e faasoasoa atu ai le $100,000 e fesoasoani i le faatupeina o le ‘au a tamaiti aoga lea o lo o faamoemoe e malaga atu i Texas, atoa ai ma le isi vaega tupe e faamaea ai le fale Samoa a le malo i Utulei.

O le tupe na pasia e le Fono Faitulafono, e  faasoasoa atu ai le isi $50,000 e fesoasoani ai i le faatupeina o le au football a tama aoga e i lalo o le 19 tausaga le matutua, lea o lo o faamoemoe mo Texas i le masina fou, ae o le isi $50,000 e tuuina atu e faamaea ai le fale Samoa a le malo i Utulei.

O le taamilosaga football e taua o le International Federation of American Football’s World Championship Tournament (FAFWCT), ua faamoemoe e faatautaia i se taimi o le tausaga nei, lea ua sao atu i ai le au tama aoga a le atunuu, ina ua manumalo i le la taaloga ma le au a tama aoga a Ausetalia i le masina na te’a nei,  ai e 93-7.

O se pili tupe na tuuina atu e le alii kovana i luma o le Fono Faitulafono i le masina o Mati, e talosagaina ai le faamatuu mai e le Fono o lea vaega tupe e  fesoasoani ai i manaoga o le malo e pei ona taua.

Na taua e le alii kovana i sana tusi i taitai o le fono e  faapea, o le tupe lea na tuuina mai e le Initeria e fausia ai le fale Samoa i le malae o le Si’ugaula a le Atuvasa, ua maea ae le’i uma vaega o loo fuafua e faia mo le fale.

E pei ona silafia, o le aso Gafua na te’a nei na faapaia aloaia ai le fale Samoa a le malo, ina ua agai atu le atunuu i le faamanatuina o le 112 tausaga o lana sisiga fu’a.

E ui sa toatele nisi o Senatoa ma Faipule e lei lagolagoina le toe tuuina atu o lenei vaega tupe e faamaea ai le fale Samoa, ona o loo i ai nisi o manaoga e tatau ona faamuamua e le malo, peitai na lagolagoina ona o le manaoga  taua, e tatau ona tuuina atu se fesoasoani a le malo i au taaalo a fanau aoga.

I se vaega o le tusi a le alii kovana na ia taua ai e faapea, o le manumalo mataina a le au lakapi a tama aoga i le au a Ausetalia, ua maua ai lona avanoa e tausinio ai i le taamilosaga o le Ipu o le lalolagi a tama aoga e i lalo o le 19 tausaga le matutua, lea ua faamoemoe e faia i Austin i Texas i se taimi o le tausaga nei.

Saunoa Togiola, sa galulue punoua’i fanau nei ina ia ausia lea tulaga maualuga, ma ua mataina foi lo latou tauaveina o le igoa o Amerika Samoa.

“Ou te faafetai  atu i le fono ona o lo outou taliaina o se talosaga sa tuuina atu e faamatuu mai ai lenei vaega tupe e faatupe ai le faamoemoe e alo ma fanau, ona ou te iloa, e taua le faamoemoe o le a latou alo atu i ai mo le faalauiloaina o le igoa o Amerika Samoa,” o se vaega lea o le tusi a le alii kovana.

E talitonu le alii kovana, e tutusa o latou lagona ma matua faapea ai faiaoga o le au, i le tele lea o se isi taimi e manaomia ai le toe faia o nisi koleniga ma aoga mo le au, ina ia faatumauina ai le tulaga lelei ua latou ausia.

Ae mo le fale Samoa, na faafetaia ai foi e le alii kovana le finagalo o le fono, ina ua latou pasia le tupe sa ia talosagaina e faamaea ai le fausiaina o le fale, lea foi na maitauina e le atunuu ina ua tatalaina i le vaiaso na te’a nei, tulaga mataina o lea faamoemoe.

 

Feso’ota’i mai i le tusitala ia ausage@samoanews.com