Ads by Google Ads by Google

Pasia Fono pili aiaia ai malolosi vailaau mo fa’atoaga

Ua pasia nei e le Fono Faitulafono se tulafono sa talosagaina e le faigamalo a Lolo ma Lemanu, mo se tulafono e sailia ai le fa’aaogaina o le tulafono feterale o lo o aiaia ai le malolosi o vailaau e tatau ona fa’aaoga i fa’atoaga, ina ia mautinoa e tausisia e le aufai fa’atoaga le malosi o le vailaau e tatau ona maua i luga o le tino o le fualaau ‘aina

 

O le tulafono lea ua pasia nei e le Fono Faitulafono, o lo o taua ai e fa’apea, e le fa’atagaina i lalo o le tulafono lenei le fa’aaogaina o se vailaau i luga atu o le maualuga o lo o fa’atulaga mai e le tulafono feterale i tulaga tau vailaau (40 CFR 180).

 

So o se tasi o le a fa’amaonia lona le usitaia o lenei tulafono, o le a taoto atu i le Ofisa o Fa’atoaga mo se fa’aiuga atoa ai ma le fa’amalosia o le tulafono.

 

O lenei tulafono na afua mai ina ua tauaao e le faigamalo le tele o fa’asea mai le mamalu o le atunu’u, i le masalomia lea o le tele ma le malolosi o vailaau o lo o fa’aaoga e ni isi o le aufai fa’atoaga e tausi ai a latou fa’atoaga togalaau ‘aina.

 

O le tulafono i mea tau vailaau a Amerika Samoa o lo o i ai, e le o fa’atulafonoina ai le maualuga o le vailaau e mafai ona tausi pe maua i le tino o le fualaau ‘aina.

 

Ae o le fa’afitauli o lo o maitauina i le taimi nei, e le o i ai ni mea faigaluega a le Ofisa o Fa’atoaga a le malo, e mafai ai ona fa’amalosia ma mata’ituina le malolosi o vailaau o lo o fa’aaoga i togalaau ‘aina.

 

O le tulafono la lenei e pei ona taua e le faigamalo, o le a galulue fa’atasi ai le Ofisa o Fa’atoaga atoa ai ma le Ofisa o le Soifua Maloloina a le atunu’u, i le mataituina lea o vailaau o le a fa’aaogaina, atoa ai ma le mautinoa lelei, o vailaau uma nei o lo o aiaia i lalo o tulafono tau vailaau a le feterale.

 

O ni isi o atugaluga e pei ona taua e afioga i senatoa ma faipule i le mataupu lenei, e tele naua le aufai fa’atoaga i le atunu’u, aemaise lava i tagata mai Asia e le o fa’amaoni i le fa’aaogaina o vailaau.

 

O ni isi o atugaluga mai le fono ma le atunu’u i togalaau ‘aina o lo o fa’atauina atu i le polokalama e le School Lunch atoa ai ma le maketi ma faleoloa i le atunu’u, e le gata i le lapopo’a uiga ese o fualaau ‘aina, ae masalomia fo’i o lo o malolosi vailaau o lo o tausi ai.

 

Na taua e le Fa’atonusili o le Ofisa o Fa’atoaga ia Lealao M. Purcell i luma o le fono ina ua fesiligia o ia i lenei tulafono, o lo o fa’aauau pea ona asia e lona ofisa fa’atoaga o lo o toto ai laau ‘aina, ina ia mautinoa o lo o latou tausisi i tulafono e aofia ai le fa’aaogaina o vailaau aemaise ai o le tu mama.

 

Talu mai le fa’aiuga o le masina na te’a nei, e 7 fa’atoaga i le atunu’u ua tapunia e le Ofisa o Fa’atoaga, ina ua fa’amaonia le le usitaia o tulafono i le tausi leleia o fa’atoaga.

 

O lo o i ai le fa’amoemoe o le Ofisa o Fa’atoaga, o se taimi o le masina nei e taunu’u mai ai masini laiti ua fa’amoemoe e fa’aaoga e siaki ai le malosi o vailaau i luga o togalaau ‘aina, a o fa’atalitali ai le taimi e maua mai ai le masini lapo’a lea ua fa’amoemoe e siaki ai le malolosi o vailaau mo fa’atoaga.

 

O lenei tulafono ua pasia e le fono faitulafono, o le a fa’amalosia pe a atoa le 60 aso talu ona mae’a le tauaofiaga a le Fono Faitulafono sa pasia ai.