Ads by Google Ads by Google

SAVALI: Fai i Senatoa e onosa’i mai

Na fautuaina e le Fofoga Fetalai o le Maota o Sui ia Savali Talavou Ale le Failautusi a le maota, ina ia logo le Maota Maualuga, “e lava mai pea le onosa’i” i tulaga o galuega, e i ai lava le taimi e fai ai le finagalo a afioga i faipule i le pili a le senate e si’i ai alauni a senatoa ma faipule, lea o lo o taoto pea lava i le maota o sui e le i faia i ai se finagalo a afioga i faipule.

 

O le saunoaga a Savali na tuuina atu ina ua taunuu i le maota o sui se fa’aaliga mai le Failautusi o le Maota Maualuga, e talosagaina ai afioga i faipule, mo se latou fa’aiuga i le pili e sii ai alauni a le fono, lea e lei faia lava i ai sa latou faaiuga ae ua le toe umi ni aso fono o totoe.

 

“Talu ai ua utiuti le taimi, e talosaga atu ai i la outou maota mo so outou finagalo i le pili a le maota maualuga 33-21 ua pasia e le maota maualuga, e sii ai alauni a faipule o le Fono”, o le fa’aaliga lea sa tuuina mai i le Failautusi o le Senate na faitau e le Failautusi a le maota o sui.

 

“Ave se avea’i i le maota maualuga e logo i ai e lava mai pea le onosa’i, ae taoto mai le mataupu sei saili i ai le tofa a le maota ona logo atu lea”, o le fa’atonuga lea a Savali sa tu’uina atu i le Failautusi a le maota o sui.

 

O le pili 33-21 a le senate e pei ona fesiligia, o le pili e fa’aopoopo ai le ta’i $10,000 i alauni a senatoa ma faipule mo le tausaga tupe fou 2015, lea ua mae’a ona pasia e le senate i le faitauga fa’atolu, ao lea lava e taoto i le komiti o le Paketi a le maota o sui e le i faia i ai se fa’aiuga.

 

Ina ua fesiligia e le Samoa News le ta’ita’ifono o le Komiti o le Paketi a le maota o sui ia Timusa Tini Lam Yuen e uiga i lenei tulafono, sa ia taua ai e fa’apea, o le a faia se iloiloga a le komiti i se taimi o le vaiaso fou e tusa ai o le tulafono taufaaofi, ma fai ai loa se fa’aiuga pe ripoti le pili i luma o le maota pe leai fo’i.

 

“O fea lava e fulisia i ai finagalo o le komiti, o le fa’aiuga lena e fai”, o le saunoaga lea a Timusa.

 

I luma o le maota maualuga i le amataga o le vaiaso nei, na fesiligia ai e le Sui Peresetene o le Senate ia Nuanuaolefeagaiga S. Nua le taitaifono o le Komiti o le Paketi a le Senate ia Laolagi Fonoti Savali Vaeao, pe fa’amata e aloaia i totonu o le Paketi a le malo mo le tausaga tupe fou siitaga o alauni a le Fono, pe afai e pasia e le Fono le pili o le paketi ao lea e lei faia se finagalo a le maota o sui i le pili e sii ai alauni.

 

Saunoa Laolagi, ua maea ona fautuaina o ia e le Loia a le Fono, e le mafai ona toe fai se suiga i le paketi ua pasia, ina ia toe fa’aofi i ai se suiga fou i alauni a le Fono.

 

Na fesili Leatualevao Asifoa, po o le a le mea e tupu i le tupe lea na fuafua e sii ai alauni a le Fono, pe afai e le pasia e le maota o sui le pili, ae na tali Laolagi, e ta’atia ai lava i totonu o le paketi a le fono.

 

Ina ua mae’a o le faitauga muamua o le tulafono lenei i luma o le maota o sui i le vaiaso na te’a nei, na saunoa ai le afioga i le ali’i faipule mai Aua ia Faimealelei Anthony F. Allen ma ia fa’aalia lona le lagolagoina o lenei tulafono, ona e le o uia auala e tatau ona faia e tusa ai o siitaga o totogi o le Fono.