Ads by Google Ads by Google

Silia 12,000 turisi na asia Amerika Samoa i le Kuata 1

E silia i le 12,000 turisi atoa ai ma tagata faigaluega e silia i le 5,000 na latou asia Amerika Samoa i le Kuata 1 o le Tausaga Tupe fou lenei 2016, e pei ona taua e le Ofisa o Turisi i le latou ripoti o Galuega Fa’atino o le Kuata 1, lea sa tauaao atu i le ofisa o le ali’i kovana fa’apea ai kopi sa tu’uina mai i le Fono Faitulafono i le vaiaso na te’a nei.

 

O le taua o ripoti mo Galuega fa’atino a Ofisa ma Matagaluega ta’itasi a le malo o lo o tauaao atu i le Ofisa o le Kovana atoa ai ma le Fono Faitulafono, e malamalama ai Vaega eseese o le Faigamalo i le tulaga o lo o i ai tautua ma auaunaga a Ofisa ta’itasi, aemaise ai tulaga o le fa’aaogaina o a latou tupe ua mae’a ona pasia i totonu o a latou paketi fa’asoasoa.

 

I le masina o Oketopa, 2015, e 6 va’a meli na asia le atunu’u i taimi eseese, ma latou aumaia ai turisi e to’a 12,692, fa’apea ai ma tagata faigaluega i luga o va’a e to’a 5,396, ma o le to’atele o i latou nei sa maua le avanoa latou te asia ai nofoaga eseese i totonu o le teritori e aofia ai le maketi fou i Fagatogo, o mata’aga fa’apitoa i itu eseese o le motu o Tutuila fa’apea ai ma faleoloa, ma latou fa’atauinam ai ai ni oloa sa fai ma fa’aoso o le latou toe fo’i atu i o latou atunu’u na malaga mai ai.

 

Na taua e le pulesili o le Ofisa o Turisi ia David Vaeafe i lana ripoti e fa’apea, o va’a meli na turisi sa latou asia le teritori i le kuata 1 fa’apea ai ma isi va’a meli o lo o fa’aauau pea ona latou ulufale mai i le teritori i masina eseese, na mafua ona latou asia Amerika Samoa ona o pepa fa’asalalau sa mafai ona tufatufaina atu e le Ofisa o Turisi i vaega eseese o le lalolagi o lo o malosi ai maketi tau turisi e pei o Europa, Asia, vasa Pasefika ma Amerika i Matu.

 

E silia i le to’a 896 le aofa’i o i latou mai nofoaga eseese nei sa mafai ona latou faitau i tusitusiga o lo o fa’asalalau e le Ofisa o Turisi i luga o fesootaiga tau initaneti, ma latou naunau ai loa e lesitala o latou igoa i nei tusitusiga, ma sosoo ai lava ma lo latou filifili e malaga mai se’i maimoa ma asiasi ia Amerika Samoa.

 

“O le taua o tusitusiga nei o lo o matou tufatufaina atu i atunu’u eseese o le lalolagi, e le gata o lo o fa’ailoa atu ai fa’amatalaga uma e fa’atatau ia Amerika Samoa, ae o lo o matou ta’uina atu ai fo’i gaioiga ma atina’e o lo o tutupu i totonu o le atunu’u i lea aso a lea aso, ina ia fa’atosina mai ai tagata turisi e ulufale mai i le teritori,” o se vaega lea o le ripoti a Vaeafe.

 

O ni isi o gaioiga o lo o taumafai ai pea le Ofisa o Turisi fa’apea ai le Komiti Fa’afoe, o le galulue fa’atasi lea ma le Kamupani va’alele a le Hawaiian Air i le fa’atumauina pea lea o tulaga lelei o lana auaunaga, aemaise ai o le faia lea o feutanaiga mo le i ai o se isi va’alele fou e tele atu ma to’atele pasese e mafai ona malaga ai, atoa ai ma le toe faia o ni isi malaga fa’aopoopo a le Hawaiian Air mo Amerika Samoa i isi taimi fa’apitoa e aofia ai le sisigafu’a i tausaga ta’itasi, ona o le isi lea taimi e pito sili ona matagofie e mafai ona malaga mai ai turisi ma maimoa i fa’agaioiga eseese e aofia ai tuuga fautasi, siva ma pese fa’aleaganu’u i taimi o fa’afiafiaga o le fu’a, atoa ai ma polokalame o lo o fa’agasolo e le malo i le vaiaso atoa o le fu’a.

 

Mai le paketi na pasia mo le Ofisa o Turisi mo le tausaga tupe fou lenei e $700,000, sa mafai ona toe fa’aopoopo i luga lea vaega tupe ina ua tu’u i ai ma le $18,683.79 sa totoe mai a le Ofisa o Turisi mai le Tausaga tupe tuai 2015, ma tula’i mai ai loa le latou paketi fou mo le tausaga tupe lenei e $718,683.97.

 

I le mae’a ai o le kuata muamua i tulaga o galuega fa’atino, e $208,909.87 le tupe na mafai ona fa’aalu e le Ofisa o Turisi, totoe mai ai loa le latou paketi o lo o i ai e $509,774.10 i le taimi nei.

 

O ni isi o galuega sa mafai ona fa’atinoina e le Ofisa o Turisi i le kuata muamua e aofia ai le fesoasoani lea i le atina’eina o turisi i le teritori, aemaise ai o le fa’atinoina o galuega e maua ai galuega fa’aopoopo mo le atunu’u.

 

“O le matou talosaga, e le mafai ona tupu i luga le atina’e tau turisi i Amerika Samoa pe afai e na o le to’atasi se vaega e galulue mo le fa’aleleia, ae mafai onatupu olaola le atina’a tau turisi mo Amerika Samoa, pe afai e galulue fa’atasi uma i ai tagata i le unaia ma le fa’aleleia, aua o le fa’aleleia o le atunu’u ina ia fa’atupulaia ai le atina’e tau turisi, o le matafaioi lena a tagata uma o le atunu’u,” o le saunoaga lea a Vaeafe i lana ripoti.