Ads by Google Ads by Google

Fa’auau Liki Fa’avaomalo Volleyball a Le Asosi Volipolo Amerika Samoa

Le ‘au volipolo a Amerika Samoa, SideOut
tusia: Leua Aiono Frost

Pago Pago, AMERICAN SAMOA — Ua amatalia le Liki Volleyball Fa’avaomalo e fa’ailoga ai le Moso’oi a le Asosi Volleyball i Amerika Samoa nei, ma ua faamauina ai le to’a 12 o ‘au a tamaita’i ua mae’a fa’auluina ma ua milo ai i le ta’amilosaga fa’avaomalo a le Volleyball o le Moso’oi 2022.

Ua to’avalu ‘au a tamaitai Kuini ua fa’atasia i le Liki lenei ma le to’a 26  a’u a Ali’i ua fa’amauina ma o se Ta’amilosaga sili lea ona tele ‘au ua fa’aulu mai e fia auai ma o le a sailia ai le siamupini.

I nisi o taaloga sa maimoaina i le afiafi o le aso Gafua sa fetaui ai nisi o ‘au malolosi mo ulua’i ta’aloga o latou Pool o milo fa’atasi ai i lenei liki. Ua na’o ‘au a le itupa o Ali’i sa faatautaia ma sa tatala malae ai Fagatogo2 ma Aiga Moni i le malae #1 ae tatala malae Lucky 7 na fetaui ma Tautai Oe i le Malae #2.

Peita’i o ta’aloga sa sili ona mata’ina o le fetauiga lea a le Sinapi ma Masausi na finau lava le manumalo i ta’aloga e lua na soso’o, peita’i na i’u ane le ta’aloga ua ‘ave e le Sinapi le manumalo i seti e lua a i latou.

O le ta’aloga fita i le va o Manu’a ma le Aiga Moni sa faia lea i le Malae #2, sa va’aia e le’i seki lelei lava Manu’a, masalo ona o le sou o le vasa i lenei vaitau ae sa matua mata’ina le latou toniga lanu moli i lea afiafi e saili ai le manumalo. E lua fo’i latou seti na ta’alo ma manumalo ai uma le ‘au a le Aiga Moni.

O le taaloga faitaulia ma soso’o mai i le Malae Numera lua o le Fetauiga lea a le Knights ma Amouli Boom1. O ta’aloga uma e lua na ave lea e le Knights ma ua manumalo ai i latou i a latou seti nei e lua. Peita’i o le ta’aloga na soso’o ai o le Amouli Boom 2 na fetaui ai ma le Soul Shakaz ma sa tolu seti o le ta’aloga faitaulia lea.

O se mea mata’ina e to’atasi lava le sui matua o le ‘au lea a le Soul Shakaz, ae le fa’afiti le ‘au nini’i i le va’ai i mauga maualuluga na latou fetaui mai le Amouli Boom 2. O le fua fa’atatau o le faigata ma le le fo’i o le Shakaz, matua faigata ona fa’afaia’ina e oo lava i le toe seti na finau lava ma tutusa ‘ai i le tele o taimi o lea fetauiga. O se tala moni, e tatau ona mata’aina pea le fa’agasologa o le taumafai a le fanau talavou nei i le fa’agatama lenei, e le taumate o nisi ia e fa’aea ai fo’i lea fa’agatama i nisi liki fa’avaomalo i le lumana’i.

Mai le malae numera tasi sa oo ane i le fetauiga a le Side Out ma le Big Island o le ‘au Masi’i mai Samoa, ma o le ‘au malosi mai Savaii. O le au tapua’i a le ‘au lea e le fa’avaivai le e’e ma le fa’amalosi’au mai i le latou ‘au, peita’i e i ai nai mea sese iti sa fa’aaogaina lelei mai e le Side Out ma latou mauaina ai le seti muamua o le latou fetauiga. 

Le ‘au volipolo mai le motu o Savai’i i Samoa i lo’o auai i le ta’amilosaga o le Liki Volleyball o le 2022 Moso’oi. [ata: Leua Aiono Frost]

Oo atu i le seti lona lua, ua saoasaoa le sau a le Big Island i le naunau mo se manumalo. Peita’i o le mea mata’ina sa fa’afaigata ai le seti lea ona sa matua iloga ona iso tama o le Big island i le serve malosi a le #4 a le Side Out - le tama o Bab Stanley sa ta’alo mai fo’i i le Annex mo sina vaitau. Fitu lelei ‘ai o le ta’aloga lena o maua e le serve lea.

Peita’i i le fa’aiuga na maua le avanoa o le BIg Island e oso ai i le seti lona tolu ma e le’i faigofie lava le fetauiga lea. O le tala lava, “O le ‘au e sili ona tele mea e sasi, e fa’aaoga mai e le isi ‘au mo le ‘ai.” E oo lava i le taimi mulimuli o le seti lona tolu o taufao le manumalo, ae o sasi e lua o tama o le Big Island, masalo ina ua le to’a fo’i, ua maua ai le avanoa lelei o le Side Out e faauma ai le ta’aloga ma umia le manumalo.

Na fa’aauau pea ta’aloga ua lautogia mo lea afiafi a tamali’i e fa’atauva ai ta’aloga a Pool ina ia maua nisi ‘au e fetaui mulimuli ma fa’atulaga ai le to’avalu o ‘au maualuluga, sailia ai le to’afa e maua ai ‘au fetaui mo le sailiga o le siamupini o lenei tausaga ma le liki fa’avaomalo i le Volleyball.

O ta’aloga o le afiafi o le aso Lua ua fa’atulaga ai fo’i ta’aloga a tamaitai ma tatou Kuini ma ua fa’ailoa mai e fa’ato’a uma fo’i nei ta’aloga i le itula e 11:00 i le afiafi. 

Ua fa’apa’aga nei le DYWA ma le ASVA le tatou Asosi o Volleyball i Amerika Samoa ina ia fa’atautaia lenei ta’amilosaga tele fa’avaomalo i le faagatama o le Volleyball, ma ua fa’ailoa mai e le ali’i Peresetene o le Asosi Volleyball, Ben Solomona Vaomu, “Ua tau le toe sailia lava se nofoaga lelei ma le mautu mo tatou ta’aloga ma ta’amilosaga volleyball, fa’afetai tele i le Malo ma le DYWA, ua le toe popole e tau saili malae ta’alo lelei mo le fa’amoemoe o le tatou Asosi i taimi uma e faia ai ta’aloga fa’avaomalo ma ta’amilosaga a le tatou lava fo’i Asosi iinei.”