Apia, SAMOA — “Fa’afetai mo le tapua’iga a matua ma aiga ae maise le atunuu pele ma le Asosi o Ta’aloga Volleyball i le tatou atunuu pele, lea ua toe taliu mai i fanua au ‘au sa tauva fa’atausala i le Malo Tuto’atasi ma ua fa’amauina lenei tausaga, o se tasi o tausaga sili ona mata’ina le taumafaiga sa fa’atino ai a’o alofaiva a outou fanau i le filigamaea i malae o le Malo Tuto’atasi o Samoa. Ua i’u ma le manuia, ua faamanuiaina fo’i i pine siliva ma apameme nisi o tatou ‘au.”

“I le fa’ailogaina ai le 60 tausaga o Samoa le usoga, ua mafai e Amerika Samoa ona tauva fa’atausala, ua i’u manuia faiva, ae le mafai lava ona sola le moafolau ma se manumalo a’ia’i, ua tuuina lava i le moafanua. O upu ia a le atunuu tautai lua e le masuia e se tasi, masalo o le tatou ‘ai e sailia fo’i i o tatou laufanua, pe a oo ina masi’i mai Samoa i le tatou Mosooi Festival 2022 ia Oketopa 2022.”

O le fa’amatalaga tomua lea a le tamaitai failautusi o le ASVA poo le Asosi Volleyball a Amerika Samoa, Jayleen Chun, lea sa malaga ma toe ta’alo fo’i i lana ‘au mataina o le Sparkles Queens Team. O se tiute sa faia ma fa’asalalauina mai uma latou ta’aloga i luga o ala feso’ota’i fa’ainiteneti a le Facebook ma sa toatele na fiafia e maimoaina taumafaiga a ‘au ta’itasi na masi’i atu a le tatou lava Asosi Volleyball.

Fa’afetai fo’i le atunuu i nei ala o feso’ota’iga e mafai ai ona maimoaina ta’aloga ma taumafaiga a fanau a’o alofaiva i fa’agatama. 

“O se ua iloga i lenei tausaga, o le to’atele o aiga, uo pele ma e masani sa tapua’ia o latou faiva, ma ua i’u manuia lava le taumafaiga a tatou ‘au uma na tauva, ua le gata i aiga o alaalata’i ai ae ua fa’apena ma aiga o sui ta’a’alo uma lava, fa’afetai i le tausiga lelei ma le alofa sa fa’aalia mo i matou uma, o le a matou fa’atali fo’i i nisi o le a suia atu Samoa i le Moso’oi Festival ia Oketopa 2022.”

“O le tausiga alofa ma le agalelei e pale ai i matou i aso uma, e oo i aso o matou ta’aloga, ua fa’afetai tele lava!”

I ‘au uma sa malaga, ua fa’afetali le talimana’o, ua outou faia le mea silisili ma ua tali fo’i le Atua i a tatou taumafaiga. O le mea sili i soo se mea e faia, ia maua le tatou nofo fealofani ma le fa’amasania’i i le alofa moni fa’aleuso.Fa’afetai fa’aeaea i so tatou malo e ala i le tomai fa’atino i fa’agatama ma le taumafaiga ua au. O i tatou uma lava ua manumalo i le va’aiga a le Silisili Ese e ona le poto ma le malosi uma lava. Ua tatou ta’a’alo fa’atausala ma ave i ai le tatou fa’amuamua ia nofo fealofani ma fetufa’i i tomai i nei ta’aloga.”

“O le lu’iga, e oso pea le la i le atamai, e fa’apena fo’i le malosi, ae fai aso le Atua i mea uma lava! Malo le fa’aeaea, malo le taumafai ae silisili malo le ta’a’alo fa’atausala.” O se tautalaga fo’i lea a Jayleen Chun i lana vaega o ‘au taa’alo sa masi’i atu.

Ua fa’ailoa mai e le’i tuuina i luga o laina feso’ota’i le vaitau tonu e fa’atautaia ai le Liki o ta’aloga Volleyball i Amerika Samoa, peita’i o le a vave ona faia lea tulaga ina ia mafai ona fa’amauina mai e Samoa a latou ‘au e malaga masii mai mo lea fa’amoemoe i le masina fou, aua le tatou Moso’oi Festival 2022.

O ‘au nei na masi’i ma le fa’ai’uga o latou taumafaiga: BTI mai Nuuuli ‘au a tamaitai, na manumalo mai lava i a latou ta’aloga uma na faia mai pool se’ia oo ina tauva i le sailiga o le Siamupini, peita’i ua faia’ina ai ma ua ltou umia nei le pine Siliva mo le ta’amilosaga a Tama’ita’i.

“Au Malosi mai le Afio’aga o Aoa, “Alo o Alii” na oo le latou taumafaiga i le sailiga o ‘au e ta’a’alo mo le Siamupini ma ua umia nei e i latou le pine Apamemea.

O le ‘au masi’i mai a Kuini o Amerika Samoa  “Sparkles Queens” e tasi lava le latou faia’ina i latou ta’aloga o Pools ma ua maua le avanoa e tauva ai mo ni ‘au e sailia le Siamupini, ua maua fo’i e i latou le pine siliva i le latou taumafaiga mo le siamupini o le Teuila 2022.

O le au Volleyball a le Originals #1 na mafai ona oo le taumafaiga i le sailiga o ‘au e fetaui mo le sailiga o le Siamuoini o le liki peita’i ua umia nei e i latou le pine apamemea molenei tausaga ma lona ta’amilosaga Volleyball o le Teuila Festival i Samoa.

O isi ‘au sa iloga fo’i le latou taumafai i lenei ta’amilosaga sa taumafai mai ai le au talavou a tama o le Uso Kings ma toeititi lava a gafatia e i latou ona manumalo ma ulufale ai i le tauvaga a le to’avalu maualuga i le latou pool, peita’i, o nisi nei o fanau talavou o le a fa’amoemoe i ai ta’aloga faitaulia mo Amerika Samoa i le Volleyball. Malo lava le taumafai.

O le Originals #2 fo’i na le fa’amanuia le taumafaiga mo le sailiga o le to’avalu maualuluga i le Teuila o lenei tausaga, ae o fa’amoemoega lenei o le ASVA i le lumana’i, Division a le Queens.

O lo ua toe taliu mai i fanua tatou ‘au uma nei ma le fa’amoemoe o le a latou taimalo fo’i i le ta’amilosaga Volleball mo le Moso’oi Festival 2022 i ni ‘au masi’i mai Samoa.