Ads by Google Ads by Google

TA’ALOGA KIRIKIRI MATAINA I LE VA O TEINE SASA’E – ALAO vs LAULI’I LIKI TAMAITAI

Cricket player at bat
Tusia: Leua Aiono Frost

Pago Pago, AMERICAN SAMOA — O le ta’aloga i le va o Alao ma Laulii e foliga mai o se tauiviga i le va o ‘au o sailia se siamupini i le afiafi ananafi ile malae ta’alo i Faga’alu

Mai le amataga na tata ai le au mai Alao  sa malo i le vili e tata muamua, na o fa’atasi lava pe ma ‘ai. E oo atu i le 11 ‘ai ae o lae e e iva pe, ae fa’ato’a maua lava ‘ai fa’asili mai le aofaiga o pe ina ua 18 ‘ai ae ua 14 pe. E maua ane ‘ai o le tataga muamua a Tula i le sailiga o se ‘au e aumaia le falelima i sasa’e mo le sailiga siamupini i le tau fa’asiusiuga o le ta’amilosaga o le Liki Kirikiti a tamaitai o le Sisigafu’a 2022, e na’o le 29 ‘ai ae ua 19 pe.

Na tuu sina taimi e fa’amalosi ai Kapeteni i a latou ‘au, ona soso’o lea ma le pate o Laulii ae talitua’a mai Tula.

O le tauiviga e leai se toe gase pe a oo ina fita se tau sailiga o le ‘ai. E i ai avanoa o nisi o ta a le ‘au tata, ae ua fa’afaigata ona tulia ‘ai ona o le popole i le pe pe afai e vave o’o le polo i le fa’ate’a ma maumau ai le avanoa. O le toe amataga o le afa mulimuli o le ta’aloga mata’ina lenei,sa iloga ai le tau fai malolosi fo’i o le talitua’a a nei ‘au uma e lua.

Ta le ‘au a le Moli o le Ava mai Laulii, e leai lava ma se eseesega tele mai le amataga o le tata fo’i a Tamaitai mai Alao, e o fa’atali lava ‘ai ma pe. E fai ane ‘ai ae o le la e fa fo’i pe. Ua i ai nisi taimi ua sili ai pe ae itiiti ‘ai. E oo ane i le 9 pe ae o le la e 8 ‘ai. Peita’i o le tamaitai na ‘ai silia i le ‘au a Laulii o le tamaitai ua iloga lelei e le Komiti le tau’au lelei i le fa’agatama lenei.

O le tamaitai fo’i lea sa faate’a fo’i i le latou ‘au, le teine o Saolotoga.

Na tele ona ‘ai na tau’avea ‘ai fa’atasi ma is isa ta i le isi ituolo ma e pe ane o ia i le olo ua oo ‘ai i le 23. Toe ono ‘ai toe tolu pe. E le’i ausia lena faamoemoe e tamaitai o le Moli o le Ava mai Lauli’i. E mae’a ane le tataga a le masaga e na’o le 26 ‘ai na maua, ua fa’amauina fo’i le manumalo o Alao mai ia Laulii i le la’ua filigamaea i malae ma ua fa’afetaia fo’i le ta’a’alo fa’atausala i ‘au e lua.

O le tala mai le Komiti e lima ‘au Kirikiti a tamaitai mai le falelima i Sisifo, ae valu ‘au Kirikiti mai le Falelima i Sasa’e, ma o lo’o fa’agasolo le ta’amilosaga Kirikiti a le falelima i sisifo fo’i latou e sailia mai se latou ‘au e suia mai le latou falelima mo le sailiga siamupini  o le Liki lenei a tamaitai mo le Sisigafu’a 2022, lea e fa’atautaia latou ta’aloga i le Malae i Valoatai i afiafi lautogia mo a latou fo’i ta’aloga.