Ads by Google Ads by Google

Tala ‘oto’oto mai Samoa

E to’alua ni fanau, vasega 11, ta’i 16 tausaga, mai i le Kolisi a le Sagato Iosefo, ua molia i le fa’ao’olima, ona o se fusuaga a tamaiti a’oga na faia i le Aso Faraile o le vaiaso ua mavae...

i le maketi i Fugalei.  Ua mae’a ona toe tatalaina i tua i la’ua nei e to’alua, ae sa tumau ai pea i lalo o le va’ava’aiga a leoleo, nisi tamaiti a’oga se to’a 10.

O lenei fusu’aga na tula’i mai i le va o tamaiti a’oga o le a’oga a le Sagato Iosefo ma le Kolisi a Leififi.

Na fa’aalia e le sui Komesina o Leoleo, le susuga Le’aupepe Fatu Pula, o le aso 8 o Tesema o le a tutula’i ai i latou nei, i luma o le fa’amasinoga.

Na ta’ua fo’i e Pula, ua tele ni fa’asea ae o ni atugaluga mai i faipisinisi, ua fa’ao’o atu i lo latou ofisa, ona o ni isi fa’alavelave e toe tula’i mai ona o fusu’aga a fanau a’oga, ma fa’aleagaina ai a latou mea totino.

O lea na fa’ama’oti mai ai e Pula, o le mafua’aga tonu lea o le loka o so’o se tamaititi a’oga e maua o a’afia i nei ituaiga fa’alavelave, ona o se taumafaiga ina ia malu puipuia le mamalu lautele.

TU’UA’IA SE PULE O SE KAMUPANI I LE GAOI

Na tula’i i luma o le ali’i fa’amasino sili, le susuga Vui Clarence Nelson ma le Fa’amasinoga Maualuga a Samoa ia Arshed Fareed, le pule sili o le Singapore Motors, e tali i tu’ua’iga e 31, i le gaoia o ni meatotino e silia ma le $600,000 le tau.

O Leone Su’a ma Leinafo Taimalelagi, na tutula’i mo le malo, ae o Semi Leung Wai na tula’i mo Fareed.  O lo o molia Fareed i lona gaoia o ni ta’avale e 31, o lona tau atoa e $652,000, mai i le kamupani ta’avale na galue muamua ai, o le Alnima Motors.  O lo o masalomia le fa’aaogaina e Fareed o nei ta’avale, e amata ai lana pisinisi, o le Singapore Motors.

I le fa’ato’a tatalaina o le Alnima Motors i Lepea i le 2008, o Fareed sa gafa ma le fa’atauga o ta’avale ma toe fa’aulu atu ripoti i le pulega o le kamupani i Singapore, e tusa ai ma se ripoti a le malo.

Na fa’aalia e le malo, o le aso 4 o Iuni, 2009 na tatalaina ai loa e Fareed ia lana pisinisi, o le Singapore Motors, ae e e le’i fa’amavea mai i le Alnima Motors, seia o’o mai ia Fepuari 2010.

O se tasi o molimau na vala’auina i luma o le fa’amasinoga, o le pule o le LP Rentals i Apia, o Alapati Pupi.  Na molimau le susuga Pupi, na o la feiloa’i ma le pule o le Alnima Motors, o Panjwani Nooruddin, i le 2008 ma sa fa’ailoa atu e Nooruddin ia te ia, lona mana’o e fa’atau se fanua e fai ai sana pisinisi mo ta’avale ua i le itu taumatau foeuli, ae e le’i fa’amalosia le suiga fou mo ta’avale, i le 2009.

Na ta’ua e Pupi i luma o le fa’amasinoga, sa ia ofoina atu lona fanua ma le fale sa i ai, ia Nooruddin, lea na tatalaina ai loa le kamupani o le Alnima Motors.   Ma ina ua tatalaina lea pisinisi, sa ta’ua e Pupi, o Fareed na fa’afoeina le ofisa, ma fesoasoani i le fa’atauga o ta’avale ma galuega fa’aofisa.

Na molimau fo’i Pupi e fa’apea, na fa’ailoa atu e Fareed ia te ia, ae e le’i suia tulaga i luga o le alatele e tusa ai ma le tulafono fou, o le a toe tatalaina seisi lala a le Alnima i Fugalei ma sa talosagaina e le ua molia ia Pupi mo le la’uina mai o ana ta’avale i Fugalei.

Sa ta’ua e Pupi, o le tele lava o taimi faigaluega na o latou la’uina ai taavale, o isi taimi e faia lea galuega pe a manava, ae o isi taimi, e usu atu i le taeao, ua uma ona la’u ta’avale. 

FALEPUIPUI SE SUI O LE PUNJAS ONA O MOLIAGA I LE GAOI

O se ali’i na galue i le kamupani ua ta’ua o le Punjas Co. Ltd., ua ta’usalaina nei i moliaga o le gaoi, ma ua fa’asala i le 12 masina i le falepuipui.

Na masalomia Falefa, e 23 tausaga mai i Lotofaga i Safata, i lona fa’atauina o ni oloa mai i le kamupani a le Punjas. ma sa ta’ua i fa’amaumauga a leoleo, o lenei ali’i na gafa ma le aoina o tupe ma le tusia o lisiti mo i latou sa fa’atauina oloa a le Punjas.

E tusa ai ma tulafono a lenei kamupani, a alu le aoga pili a Falefa, afai ae le maua le tupe, ona ia tusia lea o upu “unpaid” i luga o le lisiti, ona toe fo’i mai lea i se taimi mulimuli ane mo le toe aoina atu o le tupe.

Ae peita’i, mai i le masina o Iulai seia o’o mai ia Setema 2011, na tusia ai e le ua molia ni lisiti e 45, ia le upu “paid” ma tu’uina i tagata fa’atau, ae ona tusia i luga o lisiti a le kamupani “Not Paid”, ae ona taga le tupe.

E pe a ma le $6,527.70 le faitau aofa’i o le tupe sa molia ai lenei ali’i, i lona gaoia.

(Source: Samoa Observer)