Ads by Google Ads by Google

Tala ‘oto’oto mai Samoa

Na fa’atumulia le hall a le A’oga a Malua i le fa’ai’uga o le vaiaso na se’i mavae atu nei, i le latou fa’au’uga fa’aletausaga. 

E to’a 22 a’oa’o ua mafai ona fa’ai’uina ma le manuia a latou a’oa’oga i lenei tausaga.

O le pulea’oga a le Kolisi Fa’afaife’au, le susuga Dr. Afereti Uili na avea ma fofoga fa’apitoa o le aso ma sa ia ta’ua e fa’apea, na amata le tausaga a’oga 2011 i a’oa’o e to’a 85, ae ua o’o mai i le aso o le fa’au’uga, e na’o le to’a 18 a’oa’o ma faletua fa’apea a’oa’o nofo to’atasi e to’afa, ua mafai ona fa’ai’uina a latou a’oa’oga.

Na fa’aauau le saunoaga a Dr. Uili e fa’apea, e to’afitu i latou ua ausia ia fa’ailoga fa’ale Tusi Paia (Diplomas of Theology), e to’a 12 ua maua fa’ailoga o le Bachelors of Theology ma le to’atolu ua ausia Bachelors of Divinity. 

Ato’a ai ma i latou e to’afa ua mauaina ni sikolasipi e fa’aauau ai a latou a’oa’oga i le Kolisi Fa’afaife’au a le Pasefika, i Fiti.  E aofia ai Fa’afetai Aiava, Howard Leiataua, Reupena Maulolo ma Semikueva Fa’atoafe.

Na fa’aalia e Dr. Uili ni isi o polokalama ua fa’avaeina i totonu o le a’oga ina ia mafai ona atina’eina ai metotia ma le fa’aleleia atili o galuega, a i latou o lo o a’o’oga ai i lea a’oga fa’afaifeau.

Na fa’aalia e le ali’i pulea’oga ia lona agaga fa’afetai i le lagolago malosi a aiga, uo aemaise o le ekalesia, a’o alo atu i latou nei i a latou a’oa’oga.  Sa ta’ua e Dr. Uili, o lea ua mae’a a latou a’oa’oga, o ni isi o le a amata olaga i fafo atu o le kolisi, o nisi ua i ai nu’u ma afioaga o le a galulue ai, ae o ni isi o le a malaga atu i atunu’u i fafo mo le fa’aauauina o a latou a’oa’oga.

O le atoaga o le vasega fa’au’u, na aofia ai Aperaamo ma Anne Tufuga, Apineru ma Saili Liaina, Feterika Faaofonu’u ma Navy Motu, Kamuta ma Makerita Mataafa, Lealaoo Kapeteni Toma ma Litia nee Visinia Polutea, Lole Fiso, Malotau ma Sina Lafolafoga, o Apineru ma Winona A. Fa’asavalu, Atapana ma Etevise Tupuola Pati, Falani ma Paono Tofilau, Isaia ma Eseta Kalepo, Iuma Patrick James Ah Poe, Sauleone ma Lipale Tanoi, Setefano ma Maria Leatigaga Logovii, Taipisia Lauvi ma Toiata Fiti, Tanielu ma Greenlane Lava, Tanuri Pesaeli ma Pasia Sanaima Setu fa’apea Tavita ma Cynthia Faletagaloa.

AUGANI PALEMIA IA TAOFI SAUAGA I TOTONU O AIGA

E silia ma le to’a selau tagata sa auai i se savali na amata mai i le fale tineimu ae tigi i luma o le fale o le malo, i le fa’ai’uga o le vaiaso, e fa’amanatu ai se aso ua fa’aigoaina o le “Aso Lipine Pa’epa’e”, i totonu o Samoa.

O le lona lua a’i nei o tausaga ua fa’amamaluina lenei aso fa’apitoa, e fa’amanatu ai le sauaga mata’uti’a na fa’ao’o i ni tina po o tama’ita’i e to’a 14, i Kanata, i le aso 6 o Tesema 1989.  Atoa ai ma se taumafaiga ina ia taofi sauaga e fa’asaga i tina po o tama’itai, aemaise i totonu o aiga.

Na fa’aalia e le palemia o Samoa i lana saunoaga i lea lava aso, e avea lea gaioiga ma fa’amanatuga i tamaloloa e tusa ai ma o latou tiute e fa’asaga i tina o aiga.  Ae na saunoa fo’i le afioga Tuilaepa Sa’ilele Malielegaoi, e le fa’apea ai la, e le o sauaina e tina ia ni isi o tama, o lona uiga, o se lu’itau lenei mo le tama ma le tina, ina ia galulue fa’atasi e taofi sauaga i totonu o aiga.

Na saunoa Tuilaepa, ua mae’a ona fa’atulaga tulafono e taofia ai nei amioga, ma o sana fautuaga, taofi loa aua e le toe taga’i mama le tulafono i nei tulaga.  Sa ia u’una’ia fo’i ta’ita’i o nu’u ma afioaga, ina ia taulamua i latou i le tineia o lenei fa’afitauli, e ala i le fa’amalosia o le tausiga o le filemu ma le nofo fealofani i totonu o nu’u.

Na fa’atumulia lenei fa’atasiga i sui mai i fa’alapotopotoga eseese, o sui tofia o le malo, totino o le ofisa a leoleo fa’apea le ma’ave eseese o le atunu’u.  O lenei polokalama na tu’ufa’atasia e le Minisita o Leoleo ma na fa’aalia e Tuilaepa lona agaga fa’afetai i le malo o Niu Sila ma Ausetalia, mo le lagolagoina o le fa’avaeina o lenei polokalama.

TU’UA’IA SE AU USO I LE FASIA O SE AVE TAXI

O se au uso e to’alua mai i Se’ese’e, lea ua tu’ua’ia nei i lo la fa’ao’olima i se ave taxi ma le gaoia o ni ana mea totino.  Na tutula’i i luma o le Fa’amasinoga Fa’aleitumalo i le vaiaso ua mavae ia Asa Foa’i ma lona uso o Shaun Foa’i.

Na ioe Asa i ona moliaga o le fa’ao’olima ma le gaoi, ae ona te’ena le moliaga i lona fa’aleagaina o ni mea totino.  O lona uso o Shaun, sa ia ioe i le moliaga o le gaoi.

E tusa ai ma fa’amaumauga a le ofisa a leoleo, o lenei fa’afitauli na tula’i mai i Se’ese’e i le masina ua mavae.  Na so’a e le taxi ia le ta’avale ma a’o fa’atalitali le ali’i aveta’avale mo se fesoasoani mai i lona aiga, na osofa’ia o ia e Asa.

Na sulufa’i le aveta’avale aga’i i totonu o le nu’u ae e toe fo’i mai ma nisi o le nu’u, ua solo Asa ma ni isi o ana mea totino e pei o le ma’a o le ta’avale, o mea fa’aleotele leitio.

Na ioe Shaun i lona gaoia o le leitio o le ta’avale.  Ua mae’a ona toe tatalaina i la’ua i tua ae o lo o fa’atali le lauina o la fa’asalaga i le aso 12 o Mati, 2012.

(Source: Samoa Observer)