TAUAAO ALOAIA ATU TUANAIMATO I MALO AUFAATASI

Ua tauaao aloaia atu nei le nofoaga o le a usuia ai le fonotaga lona tolu a atunuu laiti tau atia’e o le lalolagi i Tuanaimatoma fale uma o lo o i ai, i sui o le Faalapotopotoga o Malo Aufaatasi i se sauniga taualoa sa auai taitai o le malo ma sui o Malo Aufaatasi.O lea tulaga e moomia ona faatinoina i lalo o porotokoro a Malo Aufaatasi i so o se atunuu e talimalo i so o sana fonotaga tele e pei o le fono o le a faagasolo i le aso Gafua.

Na saunoa le alii palemia, le susuga Tuilaepa Lupesoliai Sailele Malielegaoi ma ia faaalia le agaga faafetai o le malo ma tagata o Samoa i lenei avanoa le au maua e talimalo a ii se fonotaga tele faapenei ua potopoto mai ai sui o atunuu aupito i toatele i le tala faasolopito o Samoa. Na saunoa foi le sui o Malo Aufaatasi, le susuga Wu Hongbo ma ia faaalia le faamalieina o komiti a Malo Aufaatasi i tapenaga a Samoa mo lea fono tele. Ina ua maea saunoaga, sa faapea loa ona sisiina a’e le fu’a o Samoa ma le fu’a o Malo Aufaatasi e faailoa ai le tuuina atu o le nofoaga i lalo o le pule a Malo Aufaatasi.

Ua taitaia nei e vaega o le puipuiga a Malo Aufaatasi le vaaia o le lotoa atoa i Tuanaimato ma ua matua faasaina so o se tasi e leai sona ID ona ulufale i totonu. O le afiafi o le aso Sa o le a faagasolo ai le sauniga e tatala aloaia ai le fono.

TATALA LE CASINO MUAMUA I SAMOA

O le aso ananafi na tatala aloaia ai le nofoaga o taaloga tupe po o le casino muamua i Samoa, lea o lo o i le faletalimalo o Aggie Grey’s Resort i Mulifanua. O le afioga i le alii palemia, le susuga Tuilaepa Lupesoliai Sailele Malielegaoi na saunoa i le saunoaga autu i le sauniga e tatala aloaia ai lea faamoemoe.

Na saunoa Tuilaepa, o se tasi lea o fuafuaga a le malo ina ia faatosina mai ai tagata tafafao maimoa mai fafo i Samoa e faaalu ai a latou tupe ma fesoasoani a ii le tamaoaiga o le atunuu. E le gata i lea, na faaalia e le alii palemia le faamanuiaina ai o gasegase e moomia le auina atu i fafo mo togafitiga ae le gafatia e aiga le pasese. “O le a fesoasoani foi tupe e maua mai i lea atinae e faatupe ai a tatou au taaalo e masii atu i tauvaga faavaomalo faapea aoaoga a le fanau,” o le saunoaga lea a Tuilaepa. E lua laisene mo le faagaioia o casino na faamatuu atu e le malo i kamupani e lua i totonu o le atunuu talu ona pasia le tulafono e faataga ai ia ituaiga taaloga i totonu o le atunuu.

E pei ona lipotia muamua i a tatou tala, sa tele faitioga a nisi o le mamal;u o le atunuu ina ua pasia lea tulafono. Peitai na saunoa le alii palemia, afai o le a faasa taaloga tupe i Samoa, o lona uiga e tatau foi la ona faasaina taaloga bingo o lo o faatautaia e nisi o faalapotopotoga e saili ai seleni e atinae ai faalapotopotoga ma ekalesia.

KONESETI O LE “RAY OF HOPE”

Na faalogoina le leo o musika o lenei talutalu fou i le po o le aso Faraile na sei mavae atu nei i le paka i Matautu-tai lea na matua faatumulia i le mamalu o le atunuu aemaise lava le tupulaga talavou, sa molimauina le koneseti ua faaigoaina o le “Ray of Hope.”

O lea koneseti na tuufaatasia e manatua ai se tasi o alii faipisinisi ua faiilagi le folauga, le susuga Raymond Fruean lea sa pulea le falekalapu o le Club X i Matautu-tai, ma sa faafiafia ai nisi o tama fanau ua iloga i le taleni o le musika. O i latou sa faafiafia ai e aofia ai le tamaitai o Aaradhna, Scribe, Savage, Monsta, Pieter T, Sammy Johnson, Vince Harder ma Julie Ta’ale ma sa malaga faapitoa mai i latou mai Ausetalia, Niu Sila, Hawaii ma Amerika.

Na latou faaalia i se feiloaiga ma le au tusitala e nfaapea, ua latou malaga mamao mai e faaali lo latou faaaloalo ma le faafetai i le susuga Raymond Fruean ona sa tele se fesoasoani a lea tamalii i le taumafaiga mai o a latou taleni pese. Na faaalia foi lo latou lagolagoina o le taumafaiga e fausia se vaega mo tina maitaga i le Maota o le Faamoemoe (House of Hope) a le faalapotopotoga o le Toomaga mo e Puapuagatia i lo latou ofisa i Tuanaimato. O seleni na maua mai lea koneseti ua tuuina atu nei e fesoasoani i le faatupeina o lea faamoemoe.

SAUNIA: Lilomaiava Andrew Fa’asau, Naenae Productions