Ads by Google Ads by Google

TALA MAI SAMOA

TOATELE TAGATA PALOTA UA FAI A LATOU PALOTA

 

Na molimauina le toatele o le mamalu o le atunuu sa autovaa atu i fale palota eseese i totonu o nuu ma afioaga mo le fa’atinoina o a latou palota, aua le sailia o taitai o le malo mo le isi lima tausaga o lumanai, ina ua tatala fale palota i le ta o le valu i le taeao ananafi. Tiga le vevela o le la i le faagasolo ane i le ogatotonu o le taeao, ae na vaaia le laulaututu pea o tagata i laina uumi i fafo mai o fale palota, ma o le toatele sa faaaogaina fa’amalu e talitali ai le vevela o ave o le la. E 150 sui tauva sa tauva mo nofoa e 45 o lo o totoe, ona o lea ua mautinoa le toe fo’i atu o sui e toafa o le HRPP e aunoa ma se tauvaga e faia i o latou itumalo. O i latou ia e aofia ai le afioga i le alii palemia, le susuga Tuilaepa Lupesoliai Sailele Malielegaoi, lea na manumalo lana tagi faasaga ia Tuula Kiliri Tuitui lea sa resitala la te tauva mo le nofoa o le itumalo Lepa, o minisita e toalua o le Kapeneta ma le minisita lagolago. Ua mautinoa nei la le avea o i latou na sui o le paea’iga fou a le Palemene, ina ua fa’aleaoga e le Faamasinoga Maualuga a latou tagi faasaga i nisi o sui tauva sa resitala e tauva i le faiga palota. O le faiga palota lenei ua aupito i toatele tagata lautele ua resitala e palota ai, ma ua aupito i toatele ai foi ma sui tauva tamaitai ua resitala ma tauva ai. E to’a 24 sui tauva tamaitai. Ua mautinoa foi ia nofoa e 20 mo le vaega faaupufai o le HRPP ona e 16 itumalo e leai ni sui tauva a le Tautua Samoa o tauva ai, ma o lo o toe tauva lava sui o le HRPP i ia itumalo. O lo o mataituina le faagasologa o le faiga palota lautele a le atunuu e se vaega mai le Ofisa o le Fono a Malo o le Pasefika, le Pacific Forum.

 

FILIFILI LE MATAGALUEGA I LE FAASALAGA

 

Ua toe tuuina atu e leoleo i le Matagaluega o le Soifua Maloloina le mataupu e fa’atatau i se alii aoga faatausi soifua i le maota gasegase o Tupua Tamasese Meaole i Motootua, lea na suesueina ona o lona fa’atinoina o ta’otoga pe peritomeina ni tamaiti se toavalu. Na saunoa le sui sooupu o le Matagaluega o Leoleo, le susuga Su’a Muliaga Tiumalu, sa tuuina atu lea mataupu i lo latou ofisa mo suesuega. Peitai, latou te le i maua ni molimau maumaututu e molia ai lea alii aoga, ma ua toe tuuina atu nei lea mataupu i le Matagaluega o le Soifua Maloloina latou te faia se fa’asalaga talafeagai. Na faaalia e Su’a, sa tuuaia lea alii i lona peritomeina o ni tamaiti se toavalu e aunoa ma se laisene faafomai e mafai ai ona ia faia ia ta’otoga. Na saunoa Su’a, i se suesuega na fa’atautaia e le Matagaluega o le Soifua Maloloina, sa oo atu lea alii i aiga o ia tamaiti i se tasi o afioaga i Savaii, ma fai ai lana ofo na te peritomeina ia tamaiti mo nao le $7.00 i le tamaitiiti. Peitai na faaalia i suesuega a leoleo, o matua o ia tamaiti sa latou talosagaina le alii ua molia ina ia faia lea ta’otoga mo o latou fanau tama, ma gaioiga uma a le ua molia sa faia i le fa’atinoina o ia ta’otoga, sa faia ma le malilie atoatoa o matua o ia tamaiti.

 

O’O FINAUGA BLUESKY & DIGICEL I LE FAAMASINOGA

 

Ua oo nei i le Faamasinoga Maualuga le finauga a kamupani telefoni o le Bluesky ma le Digicel, po o ai e ona aia tatau e saunia ai le tautua tau initaneti i le taimi na faia ai le taaloga faavaomalo a le All Blacks ma le Manu Samoa i le Apia Park i le masina o Iulai o le tausaga na tea nei. Na talosaga le loia a le itu tali, le Bluesky i le Faamasinoga ina ia tuuina atu se taimi e sauni lelei ai se latou tali aloaia i le tagi a le Digicel faasaga ia i latou. Na talia e Faamasino Sili Patu Tiavaasue Falefatu Sapolu lea talosaga ma sa ia tuuina atu foi le avanoa i le itu a le Digicel e tali atu ai i le finau a le Bluesky. O le aso 14 o Mati, 2016 ua faatulagaina e tatau ona oo atu i ai ua maea ona saunia lelei folasaga a itu e lua. E pei ona silafia, o lenei feeseeseaiga na mafua ina ua tuuina atu e le komiti faafoe o le taaloga a le All Blacks ma le Manu Samoa ia aia tatau latou te saunia ai le auaunaga tau initaneti i le Apia Park, ae sa fa’atinoina foi e le Digicel lea auaunaga i le aso ao loma le taaloga. Na silafia e le komiti lea tulaga ae sa latou tapeina lava le auaunaga a le Digicel. Ina ua alia’e lea mataupu, sa fa’atonuina e le Ofisa o le Pule Faatonu (Office of the Regulator) ia le Bluesky ina ia tuuina atu se faatoesega aloaia tusitusia i le Digicel. Peitai e lei tupu lea tulaga e oo mai i le taimi nei.