Ads by Google Ads by Google

TALA MAI SAMOA

LEAI NI VAILAAU MA FUALAAU I LE FALEMAI

 

Ua toatele le mamalu o le atunuu ua faaalia lo latou faasea ona o le leai o ni vailaau ma fualaau i le fale talavai i le maota gasegase i Motootua. Na faaalia e nisi o matua sa auina atu o latou alo i le falemai faaitumalo i Leulumoega e faapea, na fautuaina i latou e fomai e saili i fale talavai tumaoti i Apia mo fualaau ma vailaau ua faatonuina e fomai e faainu ai o latou alo, ona ua leai ni fualaau ma vailaau i le falemai i Leulumoega. O le tulaga foi lea na molimauina e nisi o matua i le falemai autu i Motootua. Na faaalia e ia matua, na fautuaina i latou e le aufaigaluega a le fale talavai e saili fualaau ma vailaau e le o maua i Motootua i fale talavai tumaoti i Apia. Na saunia se tasi o sui o le Ofisa o Tautua tau le Soifua Maloloina (Public Health) lea o lo o pulea le falemai e faapea, ua uma sapalai o fualaau ma vailaau a le falemai ona ua le aumaia nisi sapalai mai fafo. Ua mafua lea faaletonu ona o le le totogia o aitalafu a le falemai i kamupani i fafo e gaosia fualaau a vailaau tau le soifua maloloina. Fai mai a ia o lea faaletonu e patino tonu i le Matagaluega o Tupe, ona o le le totogiina o ia aitalafu. O le taimi nei la o lo o agai le atunuu i fale talavai tumaoti i Apia. E lei maua se faamatalaga aloaia mai le pulega o le Ofisa o Tautua tau le Soifua Maloloina i lea faaletonu.

 

FAAULU TAGI A LE ALII LEOLEO UA FAATE’A

 

Ua faailoa e se alii sa avea muamua ma leoleo, le susuga Dave Tomasi, e faaulu sana tagi i le Faamasinoga e faasaga i le Matagaluega o Leoleo faapea le Komesina o Leoleo, le susuga Fuiavailili Egon Keil, ona o le faate’aina o ia. O le amataga o le tausaga nei na faamalolo ai o ia mai lana galuega. O le faaiuga a lea alii e faaulu lana tagi i le Faamasinoga, ona e talitonu o ia, o le faatinoina o lona tiute faaleoleo e pei ona aoaoina ai o ia, ua mafua ai ona oo o ia i lea tulaga. O lenei mataupu na alia’e ina ua taofia e lea alii leoleo sa tiute, ia le taavale a le alii komesina ona e sese le pakaina o lona sa. O le tulaga ua oo ia te ia ona o lona faatinoina o lona tiute, e talitonu le alii o Tomasi, e le amiotonu. Fai mai a ia, e ui ua faate’a o ia mai lana galuega, o lona talitonuga, o lona valaauina o le leoleo. Ae ua avea lona mulimulitai i le tulafono ma tulaga ua tulaga faaletonu ai o ia, ma o lea la ua sauni ai e tuuina atu lea mataupu i le Faamasinoga.

 

TOLU SUIGA I LE MAEA FAITAUGA FAALUA O PALOTA

 

I le maea ai o le faitauga faalua o palota na faia i itumalo eseese e aofia ai ma palota faapitoa, i le faiga palota lautele a le atunuu, e tolu suiga ua tulai mai i iuga sa i ai ina ua maea le faitauga muamua I le afiafi o le aso 4 o Mati. O ia suiga e aofia ai le afioga Sili Epa Tuioti lea ua toe manumalo I le tofa Pauli Matamua Ivan Williams I le itumalo Faasalaleleaga Numera 1, o Aumua Isaia Lameko lea ua tulai mai i le tofi o le itumalo Falealili I Sisifo lea sa seei ai le afioga Tusa Misi Tupuola, ma le susuga Nafoitoa Talaimanu Keti lea ua manumalo i le nofoa o le itumalo Gagaemauga Numera 3 lea sa seei ai le afioga Faamoetauloa Faale Tumaalii. O le uluai paeaiga foi lenei o le Palemene i le tala faasolopito o le malo Samoa, ua faaopopoina ai nofoa ina ia mautinoa le lima o nofoa e nofoia e sui faipule tamaitai, lea ua saofia ai nei le afioga Faaulusau Rosa Duffy-Stowers, ina ua aupito i maualuga le pasene o palota na ia maua faatusatusa i le aofai atoa o palota na faia i le itumalo Gagaifomauga Numrea 3.

 

TULAGA IVA LE MANU SAMOA 7s

 

E ui e na o le to’asefulu tama taaalo o le Manu Samoa Taitoafitu i le vae na faagasolo i Vancouver, Kanata i le faaiuga ole vaiaso na te’a nei, ae sa maitauina le finau malosi o le au ma faamanuiaina ai i le ipu mafolafola o le tauvaga ina ua manumalo i le au a Amerika e 31 i le 19. Na faaalia e le alii faiaoga ulu, le susuga Damien McGrath, e toalua tama e lei mafia ona taaalo i lea vae o le taamilosaga. O le isi na le mafai ona taalo ona o manuaga, ao le isi, le susuga Tila Mealoi, na toe foi mai i Samoa ona o le maliu o lona tua’a. Peitai, sa maitauina le finau malosi o le au i le taitaiga a le alii kapeteni, le susuga Faalemiga Selesele, e ui ina malolo i le latou taaloga muamua ia Fiti i ai e 38 i le 5. Na manumalo isi a latou taaloga o le pulu ia Sikotilani, Kenya ma Portugal ma ofi atu ai loa i sailiga o quarter-final o le ipu autu, lea na malolo ai ia Niu Sila. Ua siisii nei i luga le faatulagaga o le Manu Samoa i le faatulagaga ooao o au i lea tauvaga mai le tulaga 11 sa i ai, i le tulaga 9.