Ads by Google Ads by Google

Tala o Faamasinoga

LOGO FAAMAUSILI & GAFATASI TAVEUVEU

Ua fa’atonuina e le Fa’amasinoga Maualuga ia ni ali’i talavou iina ia totogia se sala tupe atoa ma lo la faia o ni galuega mo tagata lautele, i lalo o le va’ava’aiga a le Ofisa Fa’anofova’ava’aia, ae fa’amalumalu ni o la fa’asala fa’afalepuipui.

O Logo Faamausili ma Gafatasi Taveuveu na uluai tuuaia uma i laua i moliaga o le faaoolima i le tulaga lua ma le faatupu vevesi i nofoaga faitele, ae i lalo o se maliliega sa latou sainia ma le malo ma talia e le faamasinoga, na sui ai e le malo le moliaga e tali ioe ai Faamausili i le faaoolima i le tulaga tolu, ae o Taveuveu na tali ioe i le moliaga mama o le faatupu vevesi i nofoaga faitele.

Ao lei tuuina atu le faasalaga a le faamasinoga, na faatoese i laua nei e tusa ai o le gaioiga sa laua faia, ma la tautino ai i le faamasinoga la te le toe faia lenei solitulafono i le lumanai. E leai se isi o i laua na faatoese i le alii na manu’a i lenei mataupu.

Na faailoa e loia fautua a i laua nei i le faamasnoga, o i laua nei o ni alii talavou e lei solitulafono muamua lava. Na talosaga foi loia ina ia faanofovaavaaia i laua.

E 180 aso na manatu le faamasinoga e faasala uma ai i laua nei i le toese, peitai o le a faamalumalu le tuliina o lea faasalaga, ae o le a faanofovaavaaia i laua i lalo o poloaiga a le faamasinoga.

O nisi o poloaiga e aofia ai lo la totogiina o salatupe e $1,000 mo Faamausili ae $500 mo Taveuveu, faatasi ai ma le poloaina o i laua la te faia ni galuega mo le atunuu lautele mo le umi e 80 itula, lea o le a vaavaaia e le Ofisa Faanofovaavaaia.

O isi poloaiga e aofia ai le faasa lea ona o la toe tagofia le ava malosi poo fualaau faasaina, faasa ona la toe soli se tulafono, pe toe taumafai foi e eva ma mafuta ma i latou o  loo  tagofia le ava malosi, a ia la asiasi i le ofisa faanofovaavaaia i masina taitasi poo nisi lava taimi e faatonu atu e lea ofisa la te o atu ai.

TUU ATU MALO LE OFA I LE ALII TUUAIA FAAFEFE LONA AFAFINE

Na faamaonia e le loia fautua a le alii lea o loo tuuaia i lona faafefeina lea o lona afafine, le tuuina atu e le malo o se ofa ia te ia ma faamuta ai loa le mataupu e pei ona tuuaia ai o ia.

E le o mafai ona faalauiloa le suafa o lenei alii ona o puipuiga i le ono iloa lea o lona afafine, peitai na faailoa e lana loia o Leslie Cardin i le faamasinoga e faapea, ua maea ona  tuuina atu e le malo se ofa mo lenei alii, ma e manaomia se vaiaso e toe tolopo ai lana mataupu, ina ia maua ai le avanoa la te talanoa ma fetufaai ai i le ofa ae o lei tuuina atu i luma o le faamasinoga.

O le aso 4 Iuni lea ua toe tolopo i ai lenei mataupu ma le faamoemoe o le faamasinoga, e tatau ona oo atu i ai ua maea ona faila le maliliega i le va o itu e lua.

O loo tuuaia e le malo lenei alii i lona umia faasolitulafono o se fana faapea ai ma le faaoolima, ona o se faalavelave na tulai mai i le masina o Aperila na te’a nei, lea na ia faalala ai se fana i lona afafine ina ua ia fesiligia poo ai lea na vili atu i lana telefoni ma fesili atu ia te ia.

O loo tumau pea poloaiga o loo tatala ai le ua molia i tua e faatali ai le isi ana iloiloga lea ua faatulaga i luma o le faamasinoga.

TALIA FAAMASINOGA TALOSAGA A LE MALO

Ua talia e le  faamasinoga maualuga le talosaga na faaulu e le malo, ina ia tuu faatasi iloiloiga o le mataupu a Mike Kim ma Motau Samani, lea o loo tuuaia i le mataupu e pei ona faia ai ni uiga mataga faasaga i se teineititi e 17 tausaga le matua, lea foi o loo tete’e i ai i laua nei.

I le talosaga a le malo sa taua ai e faapea, o le fai faatasi o iloiloga o mataupu ia e lua, o le a sefe ai le taimi o le faamasinoga atoa ai ma meatotino a le malo e ono faaalu i mataupu e lua.

Fai mai le malo, e tasi lava le mataupu o loo tuuaia ai Kim ma Samani, ona o le faalavelave lea na tulai mai i le masina o Iulai 2010.

Fai mai le malo, na ave e Samani le tamaitai e 17 tausaga i le Tumu’s apartment ma lana faaupuga, e maua ai se galuega mo ia, peitai ina ua la taunuu, sa tuu ai loa e Samani le tamaitai i le Tumu’s apartment ma alia’e mai ai loa tu’uaiga e pei ona faia fa’asaga i le alii faipisinisi o Kim, i lona faamalosiina lea o ia.

O le alii loia ia Fiti Sunia o loo tulai mo Kim ae o Ruth Risch Fuatagavi o loo tulai mo Samani i lenei mataupu.