TOE FAILA ISI MOLIAGA FAASAGA IA HYMIE SEFO

O le vaiaso na te’a nei na toe faila ai e le malo i luma o le faamasinoga le isi mataupu faasaga i le alii o Hymie Sefo, lea o lo o tuuaia i lo latou osofaia ma ni isi alii le faleoloa o le FJ & P Kruse i Leone i le 2009, ae ave faagaoi tupe ma se pusa tupe.

O le mataupu fou e pei ona tuuaia ai e le malo o Sefo, ua molia ai o ia i lona taliaina o ni oloa sa ave faagaoi e se isi tagata.

I faamaumauga a le faamasinoga o lo o taua ai, e toalua ni alii na o la gaoia ni komipiuta feaveai mai i le aoga, ae o la fa’atau atu ia Sefo.

Ina ua fesiligia e leoleo Sefo, sa ia taua ai lona tia’ia o nei komipiuta feavea’i, ona e le mana’o e aafia ai fua o ia pe afai ae suesueina lea mataupu.

E $5,000 le tupe ua faatulaga e totogi ona faatoa mafai ona tatala Sefo i tua mai le toese, i le mataupu fou ua faia faasaga ia te ia, ae i le isi ana mataupu lea ua i luma nei o le faamasinoga maualuga, e $30,000 le tupe o lo o faatulaga e tatala ai o ia i tua, ma o le taimi nei, o lo o i ai pea o ia i le toese i Tafuna ina ua le mafai ona ia totogia tupe e pei ona faatulaga e le faamasinoga.

O le vaiaso nei lea ua faamoemoe e toe valaau ai le mataupu a Sefo, mo le iloiloina o se aso e faataunuu ai lana ulua’i iloiloga i luma o le Faamasinoga Faaitumalo.

I le mataupu e uiga i le talepeina o le faleoloa o Kruse i Leone i le aso 13 Setema 2009, o lo o tuuaia ai Sefo i le gaoi, talepe fale i le tulaga muamua, atoa ai ma le taupulepule  e faatino le solitulafono o le talepe fale.

TUU ATU E LE MALO SE OFA I LE ALII FAIAOGA

O le alii faiaoga mai le aoga a Manumalo lea o lo o tuuaia i lona tagofia o se teineititi i se auala e le fetaui, o le a le faataunuuina lana faamasinoga autu lea na faamoemoe e faia i le Aso Faraile o le vaiaso nei, ina ua maea ona tu’uina i ai e le malo se maliliega e mafai ona faamuta ai lenei mataupu.

O Dave Tupua o lo o tuuaia i moliaga mama e tolu e aofia ai moliaga e lua o le faaoolima i le tulaga tolu ma lona taofia faapagota o se tagata i se auala sese, ua suia nei lana loia fautua mai ia Fiti Sunia ia Barry Rose.

I lana iloiloga sa faia i le vaiaso na te’a nei i luma o le Faamasinoga Faaitumalo, na faailoa ai e Rose e fa’apea, e manaomia se taimi la te iloiloina ai ma faitau mae’ae’a vaega uma o lenei maliliega.

Na talia e le alii faamasino o John Ward II le talosaga a Rose, ina ia tolopo le mataupu mo le aso 14 o Setema, o le Aso Tofi o le vaiaso nei ae o lo o tumau pea poloaiga o lo o tatala ai Tupua i tua ao faagasolo ai taualumaga o lana mataupu.

TALEPE SE FALE E AUNOA MA SE MAFUAAGA

O le alii lea na ulufale i totonu o le fale e mautotogi ai se tamaitai i le masina o Me o le tausaga na te’a nei e aunoa ma se mafuaaga tatau, ua molia nei o ia e le malo i le moliaga o le talepe fale i le tulaga muamua.

Na teena e le alii o Malieo Maui Jr le moliaga faasaga ia te ia, ma ua taofia nei o ia i le toese i Tafuna sei vagana ua totogi le $10,000 ona faatoa mafai lea ona tatala o ia i tua.

I faamaumauga a le faamasinoga o lo o taua ai e faapea, na logo e le tamaitai sa nofo i le potu lea na osofaia e Maui, le ofisa o leoleo i le po o le aso 30 Me 2011 mo se fesoasoani, ina ua ia vaaia se tagata i totonu o lona potu, o lo o ki atu se moli uila ia te ia.

O le alii leoleo suesue ia Det. Sili Sea sa gafa ma le suesueina o lenei mataupu.

I faamaumauga a le faamasinoga o lo o taua ai e faapea, ina ua fesiligia e leoleo Maui e uiga i lenei mataupu, sa ia taua ai e faapea, o le gaioiga sa ia faia sa le tatau lava ona tupu, peitai na te le faailoa le mafuaaga na ala ai ona alu i totonu o le fale.

O lo o taua i faamaumauga a le faamasinoga le sasae e le ua molia i le uaea o le faamalama o le potu ma tatala ese tioata sa i ai, ma ulufale ai i totonu o le fale.