Ads by Google Ads by Google

Tala o le Pasefika

Na fa’aalia e ni isi o faipule Vanuatu lo latou tete’e, e ala i lo latou le auai i se fono tele tau i fefa’atauaiga a le lalolagi (WTO), ma se fa’amatalaga, o sa latou taumafaiga ina ia u’una’ia le fa’amautu le auai o le atunu’u i totonu o lenei fa’alapotopotoga.

O lenei fonotaga sa fa’afoe e ta’ita’i o fefa’atauaiga a le malo, e ui ina e le i fa’ataunu’uina le palota e fa’amautu ai le avea o Vanuatu ma se tasi o totino o le WTO ma e le o ma’oti mai i le taimi nei, le aso e faia ai lea palota.

Na fa’aalia e Joe Natuman, se tasi o faipule o lo o fa’atu’iese, ua leva ona pasi le taimi e talanoa ai.

TOE FA’AOPOOPO FUAINUMERA TAGATA FITI A’AFIA I LE TYPHOID

Ua mafai ona fa’amaonia mai ni isi o tagata e to’alima, i Fiti, ua a’afia i le fa’ama’i o le typhoid.  E pei ona ta’ua i se ripoti a le FijiLive, o nei tagata e mai i le nu’u o Nanoko ma Navosa i Sigatoka.

Na ta’ua e le so’oupu a le Minisita o le Soifua Maloloina, o Peni Namotu, e to’a 29 ni tagata na taofia i le falema’i i le vaiaso ua mavae, ae to’alima na fa’amaonia ua a’afia i le typhoid.

MANA’O KOVANA CNMI IA AVE’ESE AMERIKA TAGATA ATUNU’U ESE

Ua i luma o le Ofisa o Femalagaaiga a le Malo Tele o Amerika ia se talosaga mai i le kovana o le CNMI, o Benigno Fitial, ina ia ave’ese uma tagata mai atunu’u ese o lo o nonofo faasolitulafono i totonu o lea teritori.

O le vaiaso ua mavae na fa’asalalauina ai e le ofisa feterale le tu’uina atu o se avanoa e mafai ai ona nonofo pea tagata o atunu’u ese i totonu o CNMI, e ui ina ua amata fa’amalosi tulafono fou tau femalagaaiga.

Na fa’aalia le le fiafia o Fitial e tusa ai ma lea fa’aaliga mai i le ofisa feterale ma ia ta’ua le tatau i ofisa feterale ona fa’ataunu’u o latou tiute e ala i le fa’amalosia o tulafono lea ua i ai nei CNMI i lalo o le pule’aga a le malo feterale i tulaga tau femalagaaiga.

Na ta’ua e Fitial, o le ave’esea o tagata mai atunu’u ese mai i totonu o CNMI, o le a mafai ona tatala ai avanoa faigaluega mo tagata nu’u.

FAIA IA FEPUARI 2012 ILOILOGA TAGI A LE MALO O FITI FA’ASAGA I LE FIJI TIMES

O se tagi a le faigamalo le tumau a Fiti, e fa’asaga i le Fiji Times, lea ua fa’atulaga mo le masina o Fepuari i le tausaga fou. 

O le tagi a le malo o Fiti o lo o faia e fa’asaga i lenei nusipepa, e aofia ai le pule o le nusipepa, o Brian O’Flaherty, o Fred Wesley o ia o lo o avea ma Fa’atonu, ona o tu’ua’iga i le le usita’ia o se fa’atonuga a le Fa’amasinoga Maualuga, e ala i le lomia o se ripoti i le masina o Novema e fa’aulutalaina o le “FIFA probes Doc”.

I totonu o lea lava ripoti sa ta’ua ai se fa’amatalaga mai i le failautusi sinia a le OFC (Oceania Football Confederation) o Tai Nicholas, lea na ta’ua e le Loia Sili, ua ta’uleagaina ai le Fa’amasinoga Maualuga.

O lea lava ripoti sa muamua lomia i totonu o se nusipepa i Niu Sila.

(Source: Radio New Zealand)