O LE POGAI O LE 'AVA I SAMOA

Vaega #4

O le tama lenei o Masautele, o le atalii o Solatetele le uso o Tui Fiti Suasamile’ava’ava, lea na muamua afe i Figao i Safotu i Salafai ma le fasi ‘ava, ma ia toto lua ai fasi ‘ava ia e lua lea na oo ina tupu tele ma avea ma faalavelave i tagata feoa’i i le sami ma le ea. Ona toe faaauau lea o le ausaga a le tama ma le ‘ava lava lenei ua afe i Faleu ma Utuagiagi, ma ua toto ai le ‘ava ma oo ina tupu tele ai, ona maua ai lea o le ‘ava e taua e le atunuu o le “tulafita’i”, ma ina ua tafa le igoaipu a Malietoa Tuilapea, ona faaigoa lea i le “taumasina seufagafaga”, ua maea lea, ona toe faaauau lea o le ausaga a le tama ma le ‘ava lava lenei.

Ona o Samoa e tala lasi, o le ala lea e mau eseese ai le toatele i le gafa o le ‘ava, peitai fai mai le tala e pei ona i ai le taofi lenei, ua toe faaauau mai le ausaga a le ‘ava ma ua taunuu mai i Ma’auga ma Nuuausala, ma o le ‘ava la lea na faapea le mau na fai ai le alofisa a Pasese ma Umaga faapea ai ma le Tuia’ana Aveaumalaga.

Ona toe folau mai lea o le ausaga a le ‘ava ua afe i Malie ma Vaito’elau, ma fai mai le tala o le ‘ava lea o loo faapelepele ma tausi i ai Auimatagi ma le Tuisamau, le foi o loo faapea mai le mau, o le ‘ava foi lea na folafola e le alii o Puleleiite ina ua ea le pologa o Samoa, ma ua ola aso o Malietoa Uilamatutu, poo Malietoa Faiga e pogai mai i lona faigata, le ‘ava la lea ua faaigoaina nei o le “lau ‘ava mu’amu’a” na iloa e Puleleiite.

E ese mai la i le ava lea na sau i Samoa, o le ‘ava lea na afe i Manu’a na toe folau mai ma toe afe i le motu o Salaia, i le taimi tonu lea o loo malosi ai le faigamalo a Magea Faiga, ona toto ai lea iina le ‘ava fai mai ua tupu tele ma ua tupu mafala le ‘ava, lea la na fai ai le alofisa a Tagaloaalagi ma Pava, lea na mafua ai ona talalua le atalii o Pava i Tutuila ina ua ia soliina le alofisa o tamalii, ma o le pogai lea na mafua ai ona fesilafa’i aiga e pei o le mau a Samoa, ona toe afe lea o le ‘ava i Aleipata ma mafua ai loa ona alofisa ai Tafua ma Fuataga.

E umi ma lavelave le gafa o le ‘ava ma lona taunuu mai i Samoa, peitai e ao ona silafia, e tele ni vaega ogaoga o le aganuu ua maua mai ai, ona o le toai taunuu mai o le ‘ava i Samoa. Fai mai le tala o le ‘ava lea na toto i Vailele na toe satia i luga, ma o le ala lea na mafua ai ona toe feiloai le au uso na o mai ma le ‘ava mai Fiti, ona maua ai loa lea o le ‘ava e taua o le ‘ava o le “fetaia’imauso”.