SO’A E SE FAFINE LONA TO’ALUA I LE TA’AVALE

E 38 tausaga o se tina talavou ua tuuaia e le malo i le faaoolima i le tulaga tolu atoa ai ma le faatupu vevesi i totonu o lona aiga, ona o le fa’alavelave na tula’i mai i le aso 29 Setema 2014 i Malaeimi, lea o lo o tu’uaia ai o ia i lona so’a lea o lona to’alua i se ta’avale pikiapu, le ituaiga o le F-150.

O lenei mataupu na tofu atu i le ofisa o leoleo, ina ua logo e le ali’i na a’afia leoleo mo se fesoasoani, ina ua fa’ateia o ia i le fa’alavelave na tula’i mai, i le so’a lea e lona to’alua o ia i le ta’avale ao faia ana galuega.

Na taua e le alii na a’afia i leoleo e fa’apea, na te le i iloaina le taimi na alu atu ai le ta’avale ia te ia, ona o le taimi lea o lo o ola le masini e feula ai le vao (blower) o lo o fai sana galuega i luma o le fale, ae na te’i ina ua taia o ia e le to’avale na ave e lona to’alua ma pau ai i lalo.

Na taua e le isi molimau i leoleo e fa’apea, na te le i iloaina le taimi na tula’i mai ai le fa’alavelave, sei vagana ai le taimi na tauupu ai le ulugalii i totonu o le fale, ae na taua e le isi molimau e fa’apea, sa ia vaai tino lava i le taimi na alu atu ai lona aunty i le ta’avale ma so’a le na a’afia ma pau ai i lalo, ona toe solomuli lea o le ta’avale a lona aunty ma toe alu ese.

Ua poloaina e le fa’amasinoga le tina ua molia ina ia aua nei ona toe taumafai e fa’afeso’ota’i lona to’alua i so o se auala, ao fa’agasolo ai taualumaga o lana mataupu i luma o le fa’amasinoga.

MOLIA SE ULUGALI’I I LE FA’AO’OLIMA

E ta’i tolu moliaga mamafa ua molia ai e le malo se ulugali’i mai Iliili, ona o le fa’alavelave lea na tula’i mai i le po o le aso 29 Setema 2014, lea o lo o tu’uaia ai i laua i lo la fa’ao’olima i se tama’ita’i na a’afia, o le tuafafine lea o le ali’i o lo o nonofo ma le la tama teine.

O moliaga mama ta’itolu ua faia fa’asaga ia Tasimilo Tui, 37 tausaga le matua ma lona faletua o Maria Tui, 41 tausaga le matua, e aofia ai le fa’atupu vevesi i nofoaga faitele, fa’ao’olima i le tulaga tolu, ma le tu fua i le fanua po o le fale o se isi tagata.

E tusa ai ma fa’amaumauga a le fa’amasinoga o lo o taua ai e fa’apea, o se vevesi na tula’i mai i le po o le aso 29 Setema i Iliili pe tusa o le 9:35, ma mafua ai loa ona logo e le tama’ita’i na a’afia le ofisa o leoleo ina ua ulufale fa’amalosi le ulugali’i ua molia ma ni isi o la aiga ma fasi o ia i totonu o le latou fale, ao ia taumafai e fa’afilemu le mataupu ma fa’afeso’ota’i le Ofisa o Leoleo.

Na taua e le tina na a’afia i leoleo lona savali atu i le taimi lea ma tutuli le ulugalii ua molia i fafo ma le fale, ua ova le le mafaufau o le gaioiga ua la faia, sa tatau ona latou tu’itu’i muamua i le faitoto’a o le fale mo se fa’atanaga e ulufale atu ai i totonu, peita’i o le taimi lea o lo o faaauau ai pea ona valaau atu le ulugalii ua molia i le tuagane o le tina na a’afia e alu atu i fafo, peita’i sa fa’atonu e le tina na aafia lona tuagane, e aua ne’i alu i fafo ma le fale.

Na taua fo’i e le tina na a’afia i leoleo, e tiga lava ona ia tutuli ese le ulugalii, ae sa la taumafai pea e una’i ese le faitoto’a o le fale ma lafo atu upu mamafa i lona tuagane fai mai o ia o le ta’ifau (tulou).

O le taimi lava na aapa atu ai le tina na aafia i lana telefoni e vili ai leoleo mo se fesoasoani, o lea taimi fo’i lea na osofa’i ai loa o ia e Maria e pei ona taua i fa’amaumauga a le fa’amasinoga, e ala i lona po o lona gutu ma futi lona ulu, ma fai atu e leai sana feau i le la tama teine ma lona to’alua, o le taimi fo’i lea na tulioso atu ai isi tama’ita’i se to’alua ma futi lona ulu ma fasi loa o ia.

Na taua e le tina na a’afia lona iloa o le taimi na sasau atu ai le tu’i a le tamaloa o Tasimilo i ona foliga, peita’i sa ia fa’aaoga lona lima e tali ai le tu’i, ma unaoa atoa ai lona lima, sa ia iloa fo’i le taimi na sasa faatolu ai e le tama tama a le ulugalii ua molia lona papatua i se pate tenisi.

Na teena e le ulugalii ua molia tuuaiga a le fa’amasinoga i le aso na tutula’i ai i luma o le fa’amasinoga fa’aitumalo, ma ua poloaina i laua ina ia aua nei o la toe tuvae i le fale na tula’i mai ai le fa’alavelave, pe la te toe faia ni isi gaioiga e ono toe tula’i mai ai se isi vevesi i le lumana’i.

TOGI E LE PASESE LE TAXI NA MALAGA AI

Ua molia nei e le malo i luma o le fa’amasinoga fa’aitumalo se ali’i mai Asia i le moliaga o le fa’atupu vevesi i nofoaga faitele atoa ai ma le fa’aleaga meatotino, ona o le fa’alavelave lea na ia togiina ai le taxi sa la malaga ai ma lona to’alua, i le mae’a ai lea ona la tulioso i fafo ma le taxi ao alu le taxi i luga o le auala, ma mafua ai ona poloka ta’avale i luga o le auala i le taeao o le aso To’ona’i nei i Iliili.

I fa’amaumauga a le fa’amasinoga o lo o taua ai e fa’apea, o se telefoni sa sau mai le faleoloa o le Pacific Mart i Iliili aga’i i le Airport Taxi stand, mo se taxi e malaga ai se ulugali’i i Leone.

Ao aga’i atu le taxi i Leone, sa fesili le fafine i le ave taxi pe fia le totogi mo le alu i Leone, ae na tali le ave taxi e $10, ma o iina na vaaia ai e le ave taxi le ita o le fafine Asia ma amata ona tautala i le gagana Saina i lona to’alua, ma toe finau atu ia te ia e le tatau ona $10 le totogi o le taxi, afai e le $7 lona uiga e tatau ona $8, peita’i sa faailoa e le ave taxi i le ulugalii, afai e oo atu i le pitonuu ogatotonu o Leone lona uiga e $10 le totogi, ae sa faaauau pea ona finau le fafine Asia ma fai atu i le ave taxi e leai.

Na faafuase’i ona tatala e le alii ua molia o Gheng Guo Gheng le faitoto’a o le taxi ae oso i fafo ma le ta’avale ae o lo o alu le ta’avale i le taimi lea, e lei umi ae tatala fo’i e le fafine Asia le ta’avale ma oso o ia i fafo, ao pisi ta’avale i luga o le auala i le taimi lea.

Ina ua sauni le ave taxi e oso i fafo ma lana taxi i le taimi na tu ai, sa ia vaaia le alii ua molia ua aapa i se ma’a ma togi ai lana ta’avale ma leaga uma ai le itu o le pasese.

A o taumafai leoleo e fesiligia le ua molia e tusa ai o le fa’alavelave sa tupu, sa faalogoina le manogi pia o lea alii, sa ia faia foi ni gaioiga e faailoa atu ai lona tete’e i leoleo.