Ads by Google Ads by Google

Tala otooto mai le Fono Faitulafono

FA’APIPI’I ‘DEBIT METER’ I MANU’A MA AUNU’U

E ui ua toatele nisi o le atunuu ua mafai ona o latou molimauina le faasaoina o tupe pe a faaaoga le polokalama a le Faalapotopotoga o le Eletise ma le Suavai (ASPA) o le ‘debit meter’  peitai o le vaiaso nei na faamaonia mai ai e le pulega a le ASPA lo latou taumafai atu e uunaia aiga e faaaoga le polokalama lea, lea foi ua amata ona faia i Manu’a ma Aunu’u.

O le faaaogaina o lenei tautua, ua molimauina ai le tele o le fesoasoani i le faasaoina o le tupe faaalu a aiga.

Na taua e le Pulesili o le ASPA ia Andra Samoa e faapea, ua amata faamalosia e le latou pulega aiga totogi pili e faaaoga le tautua lea, ona e lelei toe sefe mo tagata.

Saunoa faipule mai Manu’a i le iloiloga a le maota o sui ma le ASPA i le taeao ananafi, o le faaaogaina o lea polokalama mo le motu o Manu’a, o se vaaiga lea ua atagia mai ai le agai pea i luma o galuega mo le faasaoina o le tamaoaiga o tagata.

TEENA SENATE TOFIGA KOVANA MO SUI KOMISI FEFA’ATAUAIGA

Ua teena e le Senate tofiga a le alii kovana sili ia Togiola Tulafono, mo i latou e toatolu ua ia tofia e avea ma nisi o totino o le Komisi o Fefa’atauaiga a le malo.

I le palota a le Senate i le vaiaso nei, na maua ai e Vaiausia Yandall ma Faalae Tunupopo palota ioe e 7 ae 9 palota leai, ae o Foinuu Folauo’o na ia maua palota ioe e 4 ae 12 le leai.

O le faaiuga a le Senate na faia lea ina ua maea sa latou iloiloga sa faia i le aso Lulu na te’a nei, lea na fesiligia ai agavaa o i latou nei.

I se tusi a kovana Togiola na tuuina atu i le peresetene o le Senate ia Gaoteote Palaie Tofau, sa ia faailoa atu i ai agavaa o i latou nei ua mafua ai ona ia tofia e avea ma totino lea komisi taua a le malo.

Mo se faataitaiga e pei ona taua e Togiola, o Vaiausia ma Faalae sa avea muamua ma faipule o le Fono Faitulafono, o loo lava lo la tomai i mataupu tau tulafono, ae o Folauo’o o se tasi o loo i ai lona tomai i mataupu tau suesuega ma pisinisi tua.

E toa 5 totino o le Komisi o Fefaatauaiga a le malo o loo faatulaga mai e le tulafono, lea e aofia ai le toafa e tofia mai e le kovana ma faamaonia mai e le Senate, ae toalima i le Faatonusili o le Matagaluega o Fefaatauaiga ma Alamanuia a le malo.

O i latou e toatolu na tofia mai e le kovana sa fai ma sui o le Falelima i Sasae, Sisifo ma Manu’a, o le isi sui e toatasi e lei tofia o se sui mai le aufaipisinisi.

MAE’A FAAIUGA SENATE I LISI E LUA A LE MALO

O le taeao ananafi na faia ai le faaiuga a le Senate i lisi o fanua e lua mai le malo, ae toe o le maota o sui e lei faia sa latou faaiuga i lea mataupu.

O lisi e lua e pei ona taua e kovana Togiola Tulafono i sana tusi i taitai o le fono e aofia ai le lisi i le va o Martin Anderson ma le fanua o le malo i le Pago Park, ma le isi lisi i le va o le malo ma le Pritchard Airport Service i le Malaevaalele i Tafuna.

O lisi e lua o loo i ai i le va o le malo ma kamupani e lua o loo i lalo mai o le tai 10 tausaga le umi, ma ua faamoemoe e maea i le aso 29 Tesema 2012 le lisi a Anderson, talu ona sainia mai ia Mati 2004, ae o le lisi a Pritchard e maea i le aso 27 Ianuari 2013 talu ona sainia mai i le 2005.

I lalo o le tulafono, o le a mafai ona pasia lisi a le malo pe afai e teena e le Fono iugafono e faaulu ai lisi nei, ae afai e tuanai aso e 30 talu ona tuuina atu i le fono lisi ae leai sa latou faaiuga e faia i ai, o le a pasia loa lisi ma faagaioi loa.