TANU E SE ULUGALII LE LA TAMA E 6 TAUSAGA AO OLA PEA O IA

O lo o tau sailia nei e leoleo i le aai o Uttar Pradesh i Initia le ulugalii lea na la taunu ola le la tama e 6 tausaga le matua i le amataga o le vaiaso nei. Na taua e ni molimau i leoleo e faapea, e to'atolu tagata sa latou vaaia o savavali atu i le isi vaega o le aai, ma oo atu ai i le vaega o lo o i ai le faatoaga tolo lea e gaosi mai ai le suka, ae na masalosalo tagata e i ai se mea ua tupu, ina ua latou toe vaaia na o le ulugalii i le isi itu o le fa'atoaga ae ua leai se teineititi, o lea na lolofi atu ai loa tagata sa galulue i le faatoaga e saili pe faamaonia a latou masalosaloga, ae latou maua atu ai se teineititi o lo o tanu mai i se pu o lo o ola o ia. Ua toe te'a i tua mai le falema'i le teineititi ae ua sailia nei e leoleo ona matua.

FA’AAUAU PEA ONA TU’I POMU AMERIKA MA FARANI LE ISIS

O lo o fa’aauau pea ona tu’i pomu e va’alele tau a Amerika ma Faraile vaega eseese o lo o lalafi ma fa’amautu ai le vaega fa’atupu fa’alavelave o le ISIS i totonu o le malo o Suria, e pei ona ripotia mai i televise ma ala ata i le vaiaso atoa lenei. O le vaega lona tolu o le osofaiga a Amerika lea na faataunuuina i le aso ananafi, ua fa’atutu atu ai a latou va’alele pomu i nofoaga o lo o maua mai ai e le ISIS le suauu, lea e masalomia o iina o lo o tafe mai ai alagatupe o lo o fa’aaoga e le ISIS e fa’atupe ma totogi ai ana taumafaiga fa’atupu fa’alavelave. I se ripoti mai le Pentagon a Amerika sa taua ai e fa’apea, e tusa ma le $2 miliona le tupe e maua e le ISIS i le aso e tasi mai le suauu lea, ao lea ua osofaia ma fa’aleagaina e Amerika.

TA’UTINO LE ALI’I SENATOA O IA E ‘GAY’

Na fa’ateia le to’atele o tagata i Amerika ina ua ta’utino le ali’i Senatoa mai Pittsburgh ia Jim Ferlo, o ia e gay, ma o se olaga ua ia fiafia tele i ai. O le faasalalauga le totogia a le alii senatoa ia Ferlo na faia lea i le taimi na faapotopoto ai sui o le konekeresi e fa’alauiloa suiga i le tulafono e puipuia ai tagata o lo o taua i le gagana faaperetania o le ‘gay’ ma le ‘lesbian’, po o ituaiga tagata e fiafia i o latou lava ituaiga. Na tete’i le silia i le to’a 100 tagata na i ai i lea faapotopotoga atoa ai ma le to’atele sa maimoa atu i luga o televise, ina ua tula’i le ali’i senatoa ia Ferlo ma saunoa e fa’apea, “Ou te talitonu e leai se mafua’aga e tau fa’ailoa atu ai fua lenei tulaga, o a’u e gay, o se olaga ou te fiafia tele i ai”. I le taimi na faia ai le faasalalauga lea a Ferlo, o le taimi foi lea ua aga’i atu ai leoleo e fa’ataunuu se poloaiga a le fa’amasinoga, e saili mai ai ni ali’i se to’atolu ua tu’uaia i lo latou fasi fa’amo’amo’a o se ali’i e gay.

MUSU SE TAMAITAI E TOE VAAI I LONA TINA NA LEILOA MO LE 11 TAUSAGA

E lei mana’o le tamaitai o Morgan Heist, 20 tausaga le matua e feiloa’i atu i lona tina ua ova ma le 11 tausaga o leiloa, ina ua toe alu le tina ma fa’ailoa o ia i le ofisa o leoleo i le aai o Key Largo i Florida. O le masina o Fepuari 2002 na leiloa mai ai le fafine o Brenda Heist mai lona aiga, ina ua mae’a ona alu e momoli lana fanau i le aoga, ona tuua ai loa lea na o lona to’alua ma le la fanau e to’alua, o se ali’i ma se tama’ita’i. I le taimi atoa na leiloa ai o ia, e le gata sa galulue malosi leoleo e saili o ia, ae sa matua pagatia foi lona aiga i lona toalua ma lana fanau e tau saili o ia, ina ua masalomia le fasiotia o ia e se tagata, peitai na faaalia e le fafine i leoleo i le vaiaso na te’a nei, na mafua ona alu ese ma lona aiga ona ua tele le mau mea sa mamafa ma popole i ai lona mafaufau. Na faaalia e lana tama i luga o le CNN e faapea, e le taitai toe fia pupula i lona tina, lea ua 54 ona tausaga le matua i le taimi nei.