VA’ATAUSILI TOFAEONO

O le aso Faraile o le vaiaso nei lea ua tolopo i ai le tu’uina mai o se fa’asalaga a le fa’amasinoga maualuga fa’asaga i le ali’i o Va’atausili Tofaeono, ina ua manatu le fa’amasinoga latou te fia iloa atili isi fa’amatalaga e fa’atatau i le mataupu lea ua mafua ai ona ta’usala le ua molia i le solitulafono o le ave ta’avale a o se’i lona laisene.

E silia i le 10 minute na malolo ai le fa’amasinoga maualuga i le taeao ananafi, ae aga’i atu ali’i fa’amasino e iloilo sa latou fa’aiuga fa’asaga ia Tofeaono, i le mae’a ai lea ona fa’afofoga o ali’i fa’amasino i fa’afinauga a loia mo se fa’asalaga e tatau ona fa’asala ai le ua molia, atoa ai ma le talosaga a le ua molia mo se isi avanoa e tu’uina atu mo ia.

Na finau le loia a Tofeaono i le fa’amasinoga ina ia talia le talosaga a le ua molia mo se avanoa e tatala ai o ia i tua e faigaluega, pe afai e manatu le fa’amasinoga e fa’asala o ia i se fa’asalaga fa’a falepuipui, peita’i na finau le itu a le malo, o le 90 aso lea e fa’atulaga mai e le tulafono e tatau ona taofia ai se tasi e ta’usala i le moliaga mamafa lenei i le falepuipui, ua lava ma totoe e avea ma fa’asalaga a Tofeaono.

Na taua e Tofaeono i lana talosaga i luma o le fa’amasinoga e fa’apea, o le gaioiga sa ia faia, e le gata ua a’afia ai lona aiga ae fa’apea fo’i ia i latou uma e alolofa ma latalata ia te ia.

Sa ia fa’atoese i le fa’amasinoga e tusa ai o lona soliina o le tulafono a le malo, ma ia talosagaina ai loa ali’i fa’amasino mo se avanoa e fa’ataga ai o ia ona alu i tua e faigaluega ao tuli ai lana fa’asalaga.

I le mae’a ai o le malologa puupuu a le fa’amasinoga, na poloaina ai loa e le fa’amasino sili le toe tolopo o le mataupu a Tofaeono seia aulia le aso Faraile o le vaiaso nei, ona o lo o i ai ni isi o fa’amaumauga o lo o naunau le fa’amasinoga latou te fia maua, lea ua taoto atu i le Ofisa Fa’anofovaavaaia latou te galulue e saili mai.

“O ni isi o fa’amaumauga o lo o naunau le fa’amasinoga latou te fia mauaina, o fa’amaumauga e feso’ota’i ma le mataupu lea ua ta’usala ai Tofaeono, ona o ripoti ua matou maua, e fa’a fa ona taofia e leoleo le ua molia i le moliaga o le ave ta’avale ‘ona”, o le saunoaga lea a le ali’i fa’amasino sili ia Michael Kruse.

Ua poloaina fo’i e Kruse le Failautusi a le Fa’amasinoga ina ia saili atu le faila o le isi fo’i mataupu e tai foliga tutusa ma le matuapu a Tofaeono, se’i silasila i ai ali’i fa’amasino i le latou fa’aiuga sa faia i lea mataupu.

O le faila e pei ona fesiligia e le fa’amasinoga, o le faila lea a le tama’ita’i pagota o Stephania Sulusulu, lea o lo o tuli sana fa’asalaga fa’a falepuipui e 20 masina, ina ua ta’usala o ia e le fa’amasinoga i le moliaga o le ave ta’avale ‘ona a o se’i lona laisene.

E pei ona taua i fa’amaumauga a le fa’amasinoga maualuga, o le fa’alua ai lea ona ta’usala Sulusulu i le moliaga o le ave ta’avale ‘ona a o se’i lona laisene.

PULUMU FIFITA

Ua talia e le fa’amasinoga maualuga le talosaga a Pulumu Fifita ma lana loia ina ia toe tolopo le mataupu a Fifita mo se isi 30 aso, se’i tau fa’amautu lelei talanoaga mo se ofa ma le malo ma fa’amuta ai loa taualumaga o lenei mataupu.

O le ali’i o Fifita, lea o lo o taofia pea i le toese i le taimi nei, o lo o tu’uaia i le moliaga mamafa o le gaoi ma le talepe fale, e mafua mai i le fa’alavelave lea na ia osofaia ai le fale o se aiga i Leone i le masina o Tesema na te’a nei.

FREDDIE FA’AOSO VILIAMU

O le aso 8 Aperila lea ua toe tolopo i ai le iloiloga o le mataupu a le ali’i o Freddie Fa’aoso Viliamu ma le fa’amoemoe o le fa’amasinoga maualuga, e tatau ona o o atu i le aso lea ua mae’a ona totogi e Viliamu le salatupe sa poloaina o ia e le fa’amasinoga e totogi pe a tatala o ia mai tua o le falepuipui.

Ina ua valaau le mataupu a Viliamu i le taeao ananafi, na fa’ailoa ai loa e le fa’amasino sili ia Michael Kruse ia Viliamu ma lana loia, na pau le itu o lo o naunau le fa’amasinoga e fia vaai i ai, o le mafai lea e Viliamu ona totogi le tupe na poloaina o ia e totogi, lea e foliga mai e lei taitai na mae’a ona totogi.

E $100 na mafai ona totogi e Viliamu i le taeao ananafi, fa’atasi ai ma le ta’utinoga a lana loia fautua ia Michael White sa tu’u atu i le fa’amasinoga e fa’apea, ua sauni Viliamu na te totogiina fa’amae’a lana salatupe i totonu o le isi 30 aso, ae na fa’ailoa i ai e le fa’amasinoga e fa’apea, afai ae mae’a le 30 aso e le mae’a ona totogi le salatupe, lona uiga e ono avea lea ma auala e ono tu’uaia ai o ia i lona le usitaia o tuutuuga o lana nofovaavaaia.

O Viliamu na ta’usala e le fa’amasinoga maualuga i le moliaga o lona taliaina lea o ni oloa sa ave fa’agaoi e isi tagata, e mafua mai i le fa’alavelave lea na ia talia ai ni masini computer na ave fa’agaoi e ni isi ali’i mai le ofisa o le pule aoga o le Aoga Maualuga i Leone i le masina o Ianuari 2012.

O ni isi o tuutuuga o le nofovaavaaia a Viliamu sa tu’uina atu i le fa’amasinoga, o lona totogiina lea o le salatupe e $1,000 pe a magalo mai i tua i le toese i Tafuna.