MOLIA SE ALI’I I LE FAIA O UIGA MATAGA I SE TEINEITITI

E $25,000 le tupe lea ua faatulaga e le faamasinoga e totogi ona faatoa mafai ona tatala i tua se ali’i ua tuuaia i moliaga o le faia o ni uiga mataga i se tama’ita’i e 16 tausaga le matua i le masina o Me, 2010.

E tolu moliaga ua molia ai lenei alii 37 tausaga, e aofia ai le faiaiga ma se teineititi e laititi i lalo o le tulafono; faia o amioga mataga faafeusuaiga, faapea ai ma lona tagofia o itutinosa o le teineititi na aafia.

Na taua e le teineititi na aafia i leoleo e faapea, o le masina o Me 2010 na amata ai ona la masani ma le ua molia ma o iina foi na amata mai ai ona la faiaiga seia oo mai i le 2012.

Ina ua fesiligia e leoleo le aunty o le tamaitai na aafia e tusa ai o lenei faalavelave, sa ia faamaonia ai le masani ona alu atu o le ua molia e tafafao ma eva ma lona ‘niece’ i lo latou fale i Leone.

Ma na fa’amaonia e lenei alii i leoleo le i ai o se mafutaga i le va o ia ma le tamaitai na aafia.

Ua poloaina lenei alii e le faamasinoga ina ia aua nei ona toe taumafai e faafesootai le tamaiti na aafia po o nisi foi o lona aiga i soo se auala, ua faasa foi ona ia toe soli se tulafono a le malo.

MOLIA SE ALII  I LE FAIAIGA MA SE TEINEITITI 15 TAUSAGA

E tolu moliaga mamafa ua molia ai e le malo se alii 30 tausaga ona o se faalavelave lea ua molia ai o ia i le faiaiga ma se tamaitai e 15 tausaga.

O le vaiaso nei na tulai ai i luma o le faamasinoga faaitumalo lenei alii ma ua toe tolopo lana mataupu e toe fofogaina i le taeao nei, lea o le a iloa ai pe tuu atu sao loa lana mataupu i le faamasinoga maualuga, pe faataunuu foi sana uluai iloiloga i luma o le faamasinoga faaitumalo.

Ua faatonuina e le faamasinoga le ua molia ina ia aua nei ona toe taumafai e faafesootai le tamaitai na aafia i lenei mataupu i soo se auala, pe afai ae tatala o ia i tua, ua faasa foi ona ia toe soliina se isi tulafono a le malo, a ia avea o ia ma tagata lelei e tausisi i tulafono i taimi uma.