JENNIFER TOFAEONO

Ua talia e le fa’amasinoga maualuga i le taeao ananafi se talosaga na fa’aulu e le tama’ita’i o Jennifer Tofaeono, tauala atu i lana loia fautua ia Sharron Rancourt, e talosaga ai le fa’amasinoga ina ia fa’ataga ona tatala o ia i tua e faigaluega ma tuli pea lona fa’asalaga.

O le fa’aiuga e talia le talosaga a Tofaeono, na fofoga e le afioga i le fa’amasino sili ia Michael Kruse, ina ua mae’a ona fa’afofoga le fa’amasinoga i le molimau ma le sui o se kamupani ua latou sauni e ofo atu se galuega mo le ua molia.

O aiaiga mo le tatalaina o Tofaeono i tua mai le toese, e mo le aso Gafua, aso Lulu ma le aso Faraile, amata mai i le 6:00 i le taeao e o o atu i le 6:00 i le afiafi, fuafua lea i aso ma taimi faigaluega e pei ona tu’uina atu e le kamupani i le fa’amasinoga, o le amata lea i le 7:30 i le taeao ae mae’a i le itula e 4:00 i le afiafi, mo aso e tolu e pei ona taua.

Ae afai e mana’omia ona galue Tofaeono mo le vaiaso atoa, ona toe talosaga fo’i lea i le fa’amasinoga mo se poloaiga e tatala ai o ia mo le vaiaso atoa.

E ui na taua e le loia a le malo ia Mitzie Jessop ina ua fesiligia e le fa’amasinoga, le leai o se fa’atuiese a le malo mo le taimi lenei i le talosaga a Tofaeono ma lana loia, peita’i na toe fa’amanatu e Kruse i le itu a le malo le vaega o le tulafono 46.2524 (e), o lo o manino ai le tulaga tonu e tatau ona taoto ai se fa’aiuga mo talosaga a i latou e tuli a latou fa’asalaga i le toese.

I lalo o le tulafono e pei ona taua e Kruse o lo o manino mai ai le tulaga lea, “o pagota uma o lo o tuli a latou fa’asalaga fa’afalepuipui e silia ma le tausaga le umi, ae le itiiti ifo i le 28 masina, e agava’a i latou i polokalame e tatala ai i tua e faigaluega, pe afai e mae’a ona latou tuliina le ulua’i 6 masina o le latou fa’asalaga”.

O le aso 8 Ianuari 2015 na fa’asala ai e le fa’amasinoga ia Tofaeono e taofia i le falepuipui i Tafuna mo le 20 masina, o se tasi lea o tu’utu’uga o lana nofovaavaaia e 5 tausaga, ina ua ta’usala o ia e le fa’amasinoga maualuga i le moliaga mamafa o le taupulepule lea ma se isi tagata e gaoi tupe a le falema’i o le LBJ i le taimi ao galue ai, o ia o le Pule mo le vaega o Pisinisi a le falema’i.

O le isi tuutuuga o le nofovaavaaia a Tofaeono, o lona totogiina lea o le tupe e $50,915 aga’i i le LBJ.

MAPU FETUAO

O le ali’i talavou e 20 tausaga le matua lea ua ta’usala e le fa’amasinoga fa’aitumalo i le tagofia o le ‘ava malosi ae le i atoa le 21 tausaga, fa’apea ai ma lona faia oni gaioiga e save’u ai le nonofo filemu o tagata i totonu o le falekalapu o le Bowling Alley i le masina o Tesema 2014, ua nofovaavaaia mo le 24 masina i lalo o poloaiga e ao ona ia usita’i i ai.

O ni isi o ia poloaiga ua tuuina atu mo Mapu Fetuao e aofia ai le faasa ona ia toe tagofia le ava malosi, fa’asa ona ia toe ulufale i le Bowlling Alley i totonu o le isi 24 masina, ma ia aua fo’i ne’i ona toe solia se isi tulafono a le malo.

O se tafaoga a Fetuao ma ana uo i le faaiuga o le tausaga na te’a nei, na afua mai ai moliaga e pei ona ta’usala ai o ia e le fa’amasinoga, ina ua fa’atonu atu e Leoleopo o le kalapu o ia i sana gaioiga sa faia i totonu o le fale kalapu, ae ita ai le ua molia ma tago una’i le Leoleopo, palauvale ma ee i luga, ma vili ai loa leoleo mo se fesoasoani.

Ua poloaina fo’i o ia na te totogi le salatupe e $125 i le fa’amasinoga.