Ads by Google Ads by Google

Talosaga VA poloaiga Fa’amasinoga latou te nonofo ai pea fanua malo

Ua i luma o le fa’amasinoga se talosaga mai le Asosi o Fitafita Tuai a Amerika Samoa (ASVA) ina ia fa’atuatuai le toe fa’afo’i atu o le fanua o le malo o lo o i Tafuna, lea o lo o i ai lona Ofisa autu, se’i maua mai se fa’aiuga o le latou talosaga lea ua i luma o le Fa’amasinoga Apili.O le Aso Faraile na te’a nei na faila ai e le VA sana talosaga apili i luma o le fa’amasinoga, ina ua te’ena e le fa’amasinoga sana talosaga lna faila ia Setema, ina ia toe iloilo e le fa’amasinoga lana fa’aiuga ua mae’a ona tu’uina mai, i le fa’amutaina o le lisi i le va o le VA ma le malo.Fa’atasi ai ma le talosaga mo se avanoa, na talosagaina fo’i e le loia a le VA, o Mark Ude, ia le fa’amasinoga, ina ia silasila toto’a i le tupe e ono fa’aalu e le VA mo le aveesea o ana mea totino mai le fanua i Tafuna, atoa ai ma le toe fausia i luga lava o le fanua lea pe afai e manuia le talosaga apili ua tu’uina atu.Na taua e Ude, e le i tete’e mai e le malo le talosaga a le VA.Na talosaga le loia a le malo o Sala McGuire i le fa’amasinoga, ina ia te’ena le talosaga a le VA e nonofo pea i le fanua i Tafuna, ona e i ai nisi o mafua’aga e le o mafai e le VA ona ausia ina ia mafai ai ona latou nonofo pea i le fanua.O se tasi o mafua’aga e pei ona taua e McGuire o le tulaga lea i le ono le manuia o le talosaga apili a le VA, e le gata i lea, o lea ua silia ma le 6 masina talu ona fai le malo i le VA i na ia tula’i ese ma le fanua, peita’i o lo o tumau pea lo latou nofoia o le fanua.E tele ni mataupu fa’aloia ma talanoaga tau i tulafono na fetalia’i ai le fa’amasinoga ma loia mo itu e lua i le taeao ananafi, a’o taumafai le fa’amasinoga e saili se aano tonu o talosaga ua fa’aulu e le VA.Na taua e Ude, e ui o lea ua te’ena e le fa’amasinoga le talosaga a le VA ina ia toe iloilo e le fa’amasinoga lana fa’aiuga na tu’uina mai i le masina o Setema 2011, peita’i e talitonu le VA o lo’o tumau pea le tulaga lelei o le feagaiga na sainia mo le lisi i le latou va ma le malo.O le aso 1 o Setema na te’a nei na tu’uina mai ai e le fa’amasinoga maualuga sana fa’aiuga tusitusia, e lagolagoina ai le fa’afinauga a le malo, ua mae’a taimi na sainia ai le feagaiga mo le lisi i le va o i latou ma le VA.Ina ua mae’a la ona tu’uina mai e le fa’amasinoga lana fa’aiuga lea, sa tu’uina mai ai loa ma lana poloaiga ina ia fa’ataunu’uina loa lana fa’aiuga pe afai e tuana’i aso e 10 talu mai le aso na tu’uina mai ai lana fa’aiuga, ae le’i faila e le VA se talosaga apili i luma o le fa’amasinoga.Na taua e Ude, e ui o lea ua finau mai le malo o le lisi na amata mai ia Iuni 2 1977 ma mae’a ai i le masina o Iuni 2007, peita’i e talitonu le VA, na fa’atoa amata le faitauina o tausaga e 30 o le lisi ina ua mae’a ona lesitalaina i le masina o Fepuari 26 1987, ae le o le 1977, ma faitau mai ai loa le 30 tausaga o le lisi seia aulia le masina o Fepuari 2017.Na taua e Ude, o le talosaga a le VA e toe iloilo ai e le fa’amasinoga lana fa’aiuga ua mae’a ona tu’uina mai, o lo’o fa’avae i luga o le talitonuga, o lo’o lelei pea le lisi e le’i mae’a, e le gata fo’i i lea, o le lisi ua mae’a ona totogi atoa le 30 tausaga i le tau e $1 i le tausaga e tasi.O se tasi o mataupu sa fia manino i ai le fa’amasinoga i le aso ananafi, pe o tumau pea le fa’aaoga e le VA o fale ma le fanua o le malo o Tafuna, na tali Ude, na te le o iloaina lea tulaga, peita’i na taua e se sui o le VA e le’i finagalo e fa’alauiloa lona suafa, o lo’o tumau pea le fa’aaogaina e le VA o lona nofoaga autu i Tafuna seia o’o mai i le taimi nei.E le’i tu’uina maia se fa’aiuga a le fa’amasinoga e tusa ai o talosaga e lua na faila e le VA, peita’i ua toe tolopo i se isi taimi, se’i mae’a muamua ona tu’uina atu e le itu a le VA nisi o tulaga e fa’amanino atili ai i le fa’amasinoga mafuaaga e ala ai ona taofia le fa’ataunu’uina o lana fa’aiuga ua mae’a ona tu’uina mai.Saunoa le afioga i le ali’i peresetene o le VA ina ua fesiligia i lenei mataupu, e tumau pea le talitonuga a le Asosi o Fitafita tuai a le atunu’u, e i ai le taimi e manino mai ai mataupu o lo’o nenefu i le va o le malo ma le VA, e ala i se fa’aiuga tu’u sa’o mai a le fa’amasinoga.Saunoa le afioga i le kovana sili ia Togiola Tulafono i le aso na fa’amanatu ai le Aso mo Fitafita Tuai, o le a ia fa’auluina i le Fono Faitulafono ia Ianuari 2012 se pili e avea ai le Asosi o Fitafita Tuai ma Matagaluega a le malo, e le gata e mafai ai ona avea le latou ta’ita’i ma sui o le kapeneta, ae o se auala fo’i lea o le a mafai ai ona galulue fa’atasi lea matagaluega ma le kovana, ina ia taofia ai feeseeseaiga o lo’o tula’i so’o mai pea i le va o le VA ma le malo.O le afioga i le fa’amasino sili ia Michael Kruse sa iloiloina lenei mataupu, i le lagolagosua ai a le afioga i le fa’amasino sili lagolago ia Logoai Siaki.