Ads by Google Ads by Google

Taoto atu se fautuaga a le Fono i le alii faipule ia Faleomavaega

Ua taoto atu nei se fautuaga a le Fono Faitulafono e ala i lo latou pasia o se Iugafono Maliliefaatasi a le Senate, i le alii faipule i le Konekeresi, ina ia amata faia ni sailiiliga mo mataupu uma na folasia e le Matagaluega o le Gataifale ma le Vanimonimo a le malo tele (NOAA), e uiga i le faaopoopoina o vaega o le faasao mo le gataifale i le Faga i Fagatele.

O le vaiaso na tea nei na pasia ai e le Senate la latou iugafono lenei ae o le taeao ananafi na pasia ai e le maota o sui.

Na taua i le tino o le iugafono malilie faatasi e faapea, o le faaaliga na tuuina mai e le NOAA, i le aso 21 Oketopa 2011 ina ia toe faaopoopo ogasami latou te puipuia, ua tulai mai ai se manaoga ina ia matua suesueina nisi o vaega taua o lenei mataupu, i tulaga o tulafono tau i le sami ae aofia ai ma tulaga faapolokiki o loo aofia ai i lenei faamoemoe.

O se tasi o tulaga ua tulai mai i le fuafuaga lenei a le NOAA e pei ona taua i le iugafono, o le fesiligia lea o le Poloaiga faa Peresetene na tuuina mai mo Amerika Samoa, lea na faatulaga ai le mamao e 50 maila o ogasami faa taamilo i le motu laititi o Rose Island, e faasa ona fagotaina, peitai o lea ua toe manatu le NOAA e toe faaopoopo i le nofoaga o loo i totonu o le Poloaiga lea isi ogasami o le teritori e faasa foi ona fagotaina.

E le gata i lea, e talitonu le Fono e pei ona pasia i lana iugafono malilie faatasi, o le fuafuaga fou a le NOAA lea ua faalauiloa mai e faasa ai le fagotaina o isi vaega o ogasami o le a taofia ai ma le atina’eina o vaa fagota i totonu o Amerika Samoa, faapea ai ma le tulaga o le faaleleia atili o faiga faiva i le teritori, ma o le a le o gatasi ai ma le fautuaga ua tuuina atu i le Peresetene o Amerika mo le toe fuafuaina o atina’e mo Amerika Samoa, lea e aofia ai le faaleleia o tulaga i faiga faiva.

O le pasiaina o le fuafuaga a le NOAA o le a matua feteenai ai tulafono tau i le puipuiga o le gataifale  a le feterale ma le teritori o Amerika Samoa.

Fai mai le Fono, o Amerika Samoa e laititi ona ogasami e mafai ona fagotaina mo lona atina’e, ma ua tele senituri o galulue pea ona tagata e tausi ma teu faalelei ona ogasami mo le manuia o le atunuu.

O lenei mataupu sa tele i ai finagalo faaalia a le atunuu latou te teena ai i fuafuaga a le malo tele, ona o le manatu e toe faaopoopo isi vaega o ogasami e i lalo o le latou vaavaaiga.

O finagalo faaalia o le atunuu e le gata sa faaalia i le tele o faasalalauga a ofisa faasalalau i le atunuu, ae sa faapea foi ona tuuina atu i le taimi na faataunuuina ai e le alii faipule ia Faleomavaega sana iloiloga i le masina na tea nei, lea na molimau ai le toatele e aofia ai ma le alii kovana.

E ui sa lagolagoina e le alii kovana lenei faamoemoe ma se vaega toaitiiti, peitai o le toatele na o latou teena ia fuafuaga a le malo tele, ona o le latou manatu e faapea, afai o le a toe faaopoopo isi ogasami e i lalo o le vaavaaiga a le malo tele, o le a taotaomia ai le pule saoloto a  tagata Amerika Samoa e fagotaina ai ogasami sa ola ma tua i ai tuaa ua tofafa mai Tia Sa.

Fai mai nisi, afai e pasia le faamoemoe lenei, o lona uiga o le a tele atu ogasami o le a i lalo o le vaavaaiga a le malo tele, ma laititi ai avanoa e tua i ai aiga i le gataifale mo aso faisoo, peitai na saunoa le alii kovana i lana molimau faapea ai ma le tele o ana saunoaga e masani ona tulei saunoa i ai i luga o lana polokalame, o le fuafuaga a le malo tele, o se auala e manuia ai Amerika Samoa mo le lumanai.

Saunoa Togiola, o le puipuia o le soona fagotaina o le gataifale o le atunuu, ua atagia mai ai le manatu alofa o taitai i ona po nei i tupulaga o le lumanai, aua afai ae tele le i’a e faasao, o le a maua se ai mo tupulaga i le lumanai, ae afai e soona fagota i le taimi nei, o le a leai se manuia o le gataifale e tua i ai tupulaga i le lumanai.

O le failautusi o le Senate o le a tuuina atu lenei iugafono i le tofa ia Faleomavaega, faatasi ai ma ni kopi mo nisi o sui Senatoa e aofia ai Daniel K. Inouye, Daniel K. Akaka, o Ken Salazar, o John Bryson, o Anthony M. Babauta ma le afioga i le kovana sili ia Togiola T.A Tulafono.