Ads by Google Ads by Google

Tatala ta’amilosaga golf

“Ua malaga mai tama fanau a Samoa mai vaega eseese na aumai ai, ina ia auai fa’atasi i lenei fa’amoemoe, na moemiti i ai o tatou tua’a ua malolo mai i ti’asa, ina ia tatou ola ma fa’aauau pea, ia tatou ola feso’ota’i fo’i e fa’ailoa ai lo tatou fealofani!”

O se vaega lea o le saunoaga fiafia a le Kovana Sili, Togiola Tulafono, e fa’afeiloa’ia ai le to’atele e silia ma le 150 o tama fanau a Samoa mai i’inei ma atunu’u fafo, ua fa’atasi mai mo le fa’amoemoe e tauva i le ta’amilosaga tapolo lona 35 lenei o le All Samoan Invitational Golf Tournament i o tatou laufanua.

Ona o le mafutaga na amatalia i le afiafi o le aso Lua i le faletalimalo Tradewinds, sa fa’afeiloa’ia aloa’ia ai le vasega o ‘au tapolo masi’i mai fafo e le Asosi Tapolo a Amerika Samoa, le susuga le Peresetene John Mitchell, le Faipule o le Itu’au TaotasioAtua Archie Solia’i, Willie Teleso ma le latou laulauatofi, o lea sa taufai fiafia fa’atasi i latou e toe feiloa’i mo le amataga o le tauvaga i le malae i Lupelele.

Ua atoa nei le 35 tausaga o fa’atula’ia lenei so’otaga matagofie i le va o Uso, aloali’i ma alotama’ita’i o le atunu’u, ma e fa’asolo fo’i le latou tulaga talimalo fa’aletausaga. Ua fa’ailoa mai e ono Kalapu Tapolo o lo’o aofia i le All Samoan Golf Association: San Diego, San Francisco, Los Angeles, Hawaii Islands, New Zealand ma Amerika Samoa.

O i latou uma o e fiafia e Tapolo o alo o Samoa i so’o se vaipanoa o lenei lalolagi e fia auai i le Ta’amilosaga lea, e tatau ona avea o se totino o so’o se Asosi Tapolo po’o le Kalapu Tapolo ua lisia.

Ua fa’ailoa mai fo’i e Taotasi Soli’ai, “O le tausaga talu ai sa talimalo ai San Diego, ae o le a soso’o nei ma le avanoa matagofie e talimalo ai uso fo’i i Los Angeles.”

O lenei tausaga ua maoa’e le to’atele o alo o Samoa ua pa’au mai, ona o le naunau fo’i e asia mai ai ma Aiga ma e pele ia i latou, a’o tauva i lenei tausaga i le ta’amilosga tapolo a le “All Samoans.”

Mai le amataga o le mafutaga lenei, sa amatalia ai i le latou ‘aiga fiafia fa’afeiloa’ia ai le mamalu uma ua auva’a potopoto i Pago Pago mo le ta’amilosaga, ma sa faia lea ‘aiga i le faletalimalo fou o le Tradewinds i Naumati, Tafuna. Soso’o lea ma le toe fetaui i le taeao segisegi i le Malae o Lupelele mo le amatalia o le ta’amilosaga.

O ‘au tapolo uma, ua mae’a fa’atulaga e ta’ito’avalu tagata e ta ai, ma e fa vaega ua fa’avasega ai, ae o le Ta’ita’i o Kalapu ta’itasi e tofia ma fa’avasega mai ana tagata tapolo mo vaega nei e fa: A Flight, B Flight, C Flight ma le Senior Flight, e ta’ito’alua sui tapolo i le vaega e tasi.

O fa’ailoga, ua fa’atulaga e tufatufaina ma tolaulau i latou ua manumalo i le afiafi o le aso Faraile, o anapo lea, e lautogia mo fa’ailoga eseese.

O Kamupani ua latou fesoasoani malosi i le taligamalo a le Asosi Tapolo a Amerika Samoa i lenei tausaga ua aofia ai: GHC Reids Co. Ltd., Star Kist Samoa Inc. ma le Kamupani AECOM [NZ], fa’atasi ai ma le fesoasoani mai fo’i a le McConnell Dowell.

O le aiga fiafia lenei, o le toe mafutaga fo’i lenei a le All Samoans Invitational Golf Tournament i le Lee Auditorium i Utulei, ona tatalia fo’i lea se’ia toe feiloa’i i le tausaga a sau i Los Angeles Kalefonia.