Ads by Google Ads by Google

TAUASO LE ALOFA

[E toe fa’atalofa atu i le mamaluo le aufaitau i lenei aso, atonu sa outou maua se vaiaso fiafia ma le manuia, ae alo mai loa, o le toe sosooina lenei o le tatou fagogo, lea na gata mai i le vaiaso na te’a nei i le taimi lea na fa’ateia ai le ali’i o Keli ina ua toe alu atu lana uo ma fai atu i ai, vaai Silia lea laa toe vili atu ia te ia i le telefoni.]

 

Na pei e fofo’e fa’apa’ufa’i le alu ese vave atu o le fia moe ma le fia ‘ai o le ali’i o Keli, ae ua nofo a’e nei i luga ma savali ane ua nofonofo i le fasitepu o le la faleoo ma si ona to’alua, ma fa’atlitali ai le taimi e tatai ai le telefoni. E nofo fua le tama o Keli ae o lona loto ua matua tumu i le fiafia ina ua ia iloa, o lea ua sauni e toe fa’alogo tasi atu lava i le leo o si ona to’alua ao le’i tu’u va’a ese atu mo Niu Sila.

 

Sei o tatou liliu atu lava i le tapenaga o le malaga a Silia ma ona matua lea ua taunu’u i le malae va’alele i Faleolo. Ua uma ona fa’atulaga pepa malaga a le tama’ita’i, o lea fo’i ua mapu teisi ane ma nai ona matua i luga o le laulau ma inu ai a latou ipu ti e fa’atalitali ai le taimi e gasolo ai le pasese i totonu o le potu e fa’atalitali ai le taimi e aga’i atu ai i le va’alele. Na ona tago atu lava o Silia i lana telefoni ua aumai i fafo mai le ato a lona tina, ma vili ai loa le numera e maua i ai Keli. “Siaula, o ai lega eke viliiga” o le fesili lea a le tina o Silia ma ona foliga fa’asi’asi’a, ae sa le’i tali i ai le tamaitai. “Silia, o e fa’alogo mai pe leai, o ai lega e ke viliiga”, o le toe fesili lea a le fafine ma ona foliga ita, ae na tali atu i ai Silia isi ona leo lemu, “O lea e vili atu si o’u to’alua o Keli poo a ana mea o lo o fai, ma se’i o’u faatofa atu i ai.” O le te’i o le olomatua i le tali a Silia na mafua ai ona aapa atu ma vavau mai le telefoni o loo uu i le lima o Silia ma avaavau atu i ai, “O le a le kala ga fai aku ia ke oe, loga uiga o lea lava e ke mafaufau ia Keli a, aua lava ge’i o’u koe fa’alogo aku o e koe kaua mai le igoa lega eh”.

 

O le avaavau ma le leotele o le olomatua na mafua ai ona masalosalo isi tagata o lo o tumu tumu i totonu o le fale’aiga i totonu o le malae va’alele, e i ai le mea o lo o tupu i le laulau lea. O le te’i o taliga o le toeaina i le pisapisao o le olomatua ma Silia na mafua ai ona ia fesili fia malamalama ia Silia i le mea ua tupu, peita’i sa leai se tali a le tama’ita’i ae ua na o le tagi ma punou. Na lilo i le ulugalii, e aveese mai e le olomatua le telefoni mai lima o Silia ae o le taimi lea ua uma ona vili e le tama’ita’i le numera, o lea fo’i ua tali mai Keli. Na fiu le ali’i o Keli e hello mai i le telefoni ae leai ma se isi na tali atu, se’i vagana ai lona fa’alogoina o le olomatua o loo avaavau ma pisapisao lona gutu ae o lo o ola pea lava le telefoni. Na lagona e Silia o Keli lea e taumafai e talanoa atu i le telefoni ae paga lea e leai se isi o tali atu i ai, o lea na tago atu ai loa le tama’ita’i ua oomi le sipika o lana telefoni, ma fa’ateia ai loa le tama’ita’i ina ua latou lagona atu upu mulimuli a Keli e fa’apea,  “ ... Silia, ou te iloa o lena e te fa’afofoga mai, ae pau la’u vala, alu ia manuia lau malaga, o lea ua ou maua lau tusi na aumai, o le a ou fa’atali atu fo’i mo lou toe fo’i mai ...”