Ads by Google Ads by Google

Taumai se tina e pule i lona ola ao sii lana pepe

O le fa’aiuga o le vaiaso na te’a nei na taofia ai e leoleo se tina e 28 tausaga le matua, ona o tu’uaiga i lona taumafai lea e pule i lona soifua a o ia si’i lana pepe e lua tausaga le matua.

 

O ni isi na latou vaaia lenei fa’alavelave i gatai o Fogagogo i le afiafi o le aso To’ona’i na te’a nei, Aokuso 2, 2014 pe tusa o le itula e 3:15 i le afiafi, na latou fa’afeso’otaia le ofisa o leoleo mo se fesoasoani.

 

O se vevesi i le va o le ua molia ma lona to’alua, na mafua ai ona ia taumafai e pule lona soifua i tua o le Maliu Mai i Fogagogo, e ala i lona savali aga’i i le sami ao sii i ona lima lana pepe.

 

Na taua e se molimau sa i ai i le taimi na tula’i mai ai le fa’alavelave i leoleo e fa’apea, na fa’ateia o ia ina ua ia vaaia se tina o savali aga’i i le sami ao ia sii lana pepe, sa latou valaau fo’i i le tina ma taumafai e fa’afo’i mai laua ma lana tama i tua, ae sa lei fa’alogo o ia, ae sa faaauau pea ona la aga’i ma lana pepe i tai i le sami.

 

Na taua e molimau i leoleo lo latou vaaia o le taimi na fati mai ai se tasi o galu tele lava, ma taia ai le ua molia ma lana tama, ma toetoe lava a tafefea ai i tai, ae o le vave o gaioiga o le to’alua a le tina na a’afia na mafua ai ona leai se fa’alavelave na tula’i mai.

 

Na taunuu leoleo ma latou vaaia ai le tina na a’afia o lo o nonofo mai ma lona toalua ma le la tama i le isi itu o le vaega na tula’i mai ai le fa’alavelave, ma taumafai loa e fa’atalatalanoa i laua e tusa ai o le mea sa tupu.

 

Na taua e le tamaloa i leoleo e fa’apea, o se feeseeseaiga na tula’i mai i le la va ma lona to’alua, na mafua ai loa ona tula’i mai le fa’alavelave, peita’i o le itu na fa’ateia ai o ia, o le tele o taimi e tula’i mai ai se vevesi i lo la va, e masani ai lava ona o lona toalua ma le tama i lona aiga i Mesepa e nonofo ai mo sina taimi ona toe fo’i ane fo’i lea i le latou aiga, ae na fa’ateia o ia ina ua tula’i mai le fa’alavelave e pei ona taumafai ai lona to’alua e pule i lona soifua ao sii le la tama.

 

Ina ua fesiligia e leoleo le ua molia e tusa ai o lenei fa’alavelave, sa ia taua ai e fa’apea, o le vevesi i le va o ia ma lona toalua na mafua mai ina ua toe laga e lona to’alua le mataupu e fa’atatau i le ‘affair’ na tula’i mai i le va o ia ma nisi tamaloloa, peita’i sa ia fa’ailoa i ai, e le tatau ona la toe talanoaina lea mataupu, ona ua uma ona la talanoaina i aso ua mavae, peita’i o lo o fa’aauau pea ona taumafai lona to’alua e laga lea mataupu, atoa ai ma le fa’aigoa o ia i le mau igoa eseese e pei o le ‘fafine pa’umutu’, ma ua lagona ai lona ma faapea ai ma le manu’a o lona loto.

 

Na taua e le tina ua molia, na pau le fa’aiuga sa ia faia ina ia taofia ai le toe tula’i mai o le tiga o lona loto atoa ai ma le toe fa’alogo atu i upu a lona to’alua, o lona pule lea i lona ola.

 

Na teena e le tina na a’afia le moliaga o lona taumafai e fai ni gaioiga e lamatia ai le saogalemu o lana pepe, ma ua toe tolopo lana mataupu e toe fofogaina i le faaiuga o le masina nei.